Ta ku xanisiwa ka kereke ya Yerusalema.
1Kambe Sawulo u khensile ku dlawa ka Stefano.
Enkarhini wolowo, kereke ya Yerusalema yi humeleriwa hi ku xaniseka lokukulu, va hangalasiwa hinkwavo ematikweni ya Yudiya ni ya Samariya; ku sala vaapostola ntsena. 2Kutani vavanuna van'wana va vakhongeri, va lahla Stefano; va ba nkosi lowukulu ehenhla ka yena.
3Kambe Sawulo a a ri karhi a hlasela kereke, a nghena endlwini yin'wana ni yin'wana, a kokela vavanuna ni vavasati, a va nyiketa ku nghenisiwa ekhotsweni.
Ta ku pfumela ka Vasamariya.
4Kutani lava ingi va hangalasiwile, a va ri karhi va vula rito hinkwako laha va yaka kona.
5Loko a ri Filipi, a xikela emutini wa tiko ra Samariya, a vula Kriste kona. 6Kutani vunyingi byi va mbilu yin'we ku yingisa leswi vuriwaka hi Filipi loko byi twa, ni loko byi vona mahlori lawa a ma endlaka. 7Hikuva mimoya ya thyaka a yi suka eka lavo tala lava ngheniweke hi yona, yi huwelela hi rito lerikulu; kutani lavo tala lava ingi va khwanyale swirho, ni swigono a va hanyisiwa. 8Kutani ku tsaka lokukulu ku va kona emutini wolowo.
Ta mungoma Simoni.
9Wanuna, loyi va nge i Simoni, a a ri kona emutini wolowo, a tirha ntirho wa vungoma, a hlamarisa tiko ra Samariya, a tivula munhu lonkulu. 10A va n'wi namarhela hinkwavo, ku sungula hi lontsongo ku fikela eka lonkulu, va ku: “Loyi, i matimba lamakulu ya Xikwembu.” 11Va n'wi namarhelisa sweswo, hikuva ni khale, a a va hlamarisile hi vungoma bya yena. 12Kambe kuteloko va pfumela eka Filipi, loyi a va byelaka Evhangeli ya ku fuma ka Xikwembu, ni vito ra Yesu Kriste, vavanuna ni vavasati van'wana va khuvuriwa. 13Na yena Simoni a pfumela, kutani a khuvuriwa, a namarhela Filipi; kambe a hlamala ngopfu hi ku vona swikombiso ni masingita lamakulu lama endliwaka.
14Kambe vaapostola lava seleke eYerusalema, loko va twa leswaku Vasamariya va amukela rito ra Xikwembu, va va rhumela Petro na Yohane; 15volavo kuteloko va fikile, va va khongelela leswaku va nyikiwa Moya lowo Kwetsima; 16hikuva a wu nga si xikela ni ka un'we wa vona; a va khuvuriwile ntsena hi vito ra Yesu. 17Kutani va va tlhandleka mavoko ehenhla, kutani va amukela Moya lowo Kwetsima.
18Kambe Simoni, kakuloko a vona leswaku Moya lowo Kwetsima wu nyikiwa hi ku tlhandleka ka mavoko ya vaapostola, a va humesela mali, a ku: 19“Ndzi nyikeni, na mina, matimba lawa, leswaku un'wana ni un'wana loyi ndzi nga ta n'wi tlhandleka mavoko ehenhla, a nyikiwa Moya lowo Kwetsima.” 20Kambe Petro a ku eka yena: “Mali ya wena a yi love na wena, leswi u nga ehleketa leswaku ku nyika ka Xikwembu ku xaviwa hi mali! 21A ku na ku averiwa ni ku pambuleriwa emhakeni leyi, hikuva mbilu ya wena a yi lulamanga emahlweni ka Xikwembu. 22Hikwalaho, hundzuka eku biheni ka wena, u khongela Hosi leswaku kumbexana u nga khomeriwa ku anakanya ka mbilu ya wena; 23hikuva ndzi vona leswaku u tele nyongwa leyi bavaka ngopfu, ni ku bohiwa hi ku homboloka.” 24Simoni a hlamula, a ku: “Ndzi khongeleleni mi ri n'wina eka Hosi, leswaku ndzi nga tshuki ndzi humeleriwa hi xilo xin'we xa leswi mi swi vuleke.”
25Kuteloko vaapostola va vula vumbhoni bya rito ra Hosi, va tlhelela eYerusalema, va ri karhi va vula Evhangeli emitini leyo tala ya Vasamariya.
Filipi ni ndhuna ya hosi ya Etiyopiya.
26Kutani ntsumi ya Hosi yi byela Filipi, yi ku: “Suka, u ya tlhelo ra dzonga endleleni leyi xikaka hi le Yerusalema, yi rhelela eGaza,” laha ku nga mananga; 27kutani a suka a famba. Kutani a vona wanuna wa Muetiyopiya, a nga mutsheniwa ni ndhuna leyikulu ya Kandake, hosi ya wansati ya Etiyopiya, ni mulanguteri wa rifuwo ra yona hinkwaro, loyi ngi a tile eYerusalema, ku ta gandzela kambe a a tlhelela ekaya, 28a tshamile egolonyini ya yena, a hlaya buku ya muprofeta Esaya. 29Moya wu ku eka Filipi: “Famba, u tshinelela golonyi leyiya.” 30Kutani Filipi a tsutsuma, kuteloko a n'wi yingisile a hlaya buku ya muprofeta Esaya, a ku eka yena: “Xana wa twisisa lexi u xi hlayaka xana?” 31Yeloyi a ku: “Ndzi nga twisisisa ku yini loko ndzi nga ri na muhlamuseri?” Kutani a kombela leswaku Filipi a khandziya, a ta tshama na yena.
32Ndzimana ya buku leyi ingi a yi hlaya hi leyi: “U yisiwile ku tlhaviweni kukota nyimpfu, kambe a ri tanihi xinyimpfana xa mbheveve emahlweni ka la xi tsemelaka voya, kutani a xi ahlamisinga nomu wa xona. 33Ku avanyisiwa ka yena ku hetisiwile eku titsongahateni ka yena; kambe i mani la nga vulaka rixaka ra yena? Hikuva vutomi bya yena byi susiwile emisaveni.” 34Kutani ndhuna yi vutisa Filipi, yi ku: “Wa nga ndzi byela; xana muprofeta u vula mani hi mhaka leyi? Xana wa tivula, kumbe u vula un'wana-ke?” 35Kutani Filipi a ahlamisa nomu, a sungula hi tsalwa leri, a n'wi byela Evhangeli ya Yesu.
36Va ku va ha famba endleleni, va fika laha mati ingi ma ri kona, kutani ndhuna yi ku: “Vona, mati hi lawa; ku nga sivela yini leswaku ndzi khuvuriwa xana?” 37Filipi a ku: “Loko u pfumela hi mbilu ya wena hinkwayo, u nga pfumeleriwa.” A hlamula, a ku: “Ndza pfumela leswaku Yesu Kriste i n'wana wa Xikwembu.” 38Kuteloko a lerisile leswaku golonyi yi yima, va ngirimela ematini havambirhi, Filipi ni ndhuna; kutani Filipi a yi khuvula. 39Kuteloko va tlhandlukile ematini, Moya wa Hosi wu susa Filipi, kutani ndhuna a yi vuyanga ya ha n'wi vona; kambe yi ya emahlweni endleleni ya yona hi ku tsaka lokukulu. 40Kambe Filipi a tshuka a va le Azoto; kutani a famba a ri karhi a vula Evhangeli emitini hinkwayo a kondza a fika eKhezariya.
