TIMHAKA 3

₁Petro na Yohane a va tlhandlukela kun'we etempeleni hi nkarhi wa xikhongelo; a wu ri wa ntlhanu na mune (nimadyambu).

₂Kutani a ku rhwariwe munhu la nga tswariwa a ri xigono, a va n'wi veka hi masiku hinkwawo enyangweni ya tempele leyi va nge leyo Saseka, leswaku a ta kombela swo hananiwa eka lava nghenaka etempeleni. ₃Munhu loyi, kakuloko a vona Petro na Yohane va lava ku nghena etempeleni, a kombela eka vona. ₄Kambe Petro a n'wi honolela mahlo, swin'we na Yohane, a ku: “Hi langute.” ₅Kutani yeloyi a va langutisisa, a ehleketa leswaku va ta n'wi nyika xanchumu. ₆Kambe Petro a ku eka yena: “A ndzi na silivhere, hambi wu ri nsuku, kambe lexi ndzi nga na xona, ndza ku nyika: Hi vito ra Yesu Kriste wa Nazareta, yima, u famba!” ₇Kutani a n'wi khoma hi voko ra xinene, a n'wi yimisa; kutani hi nomu lowu, mikondzo ni mahlakala ya yena swi tiyisiwa. ₈Kutani a suka a nghena etempeleni na vona, a ri karhi a famba, a tlula, a dzunisa Xikwembu. ₉Kutani vanhu hinkwavo va n'wi vona a famba, a dzunisa Xikwembu. ₁₀Kambe a va n'wi tiva leswaku hi yena la tshameleke ku hananiwa eNyangweni leyo Saseka ya tempele; kutani va tala hi ku hloleriwa ni ku hlamala ni leswi a swi endleriweke. ₁₁Kutani, hikuva a a namarhela Petro na Yohane, vanhu hinkwavo va hlamala, va tsutsumela erikupakupeni leri va nge i ra Solomoni.

₁₂Kakuloko Petro a swi vona, a byela vanhu, a ku: “Vavanuna va Israele, mi hlamalela yini mhaka leyi? Kumbe mi hi tlhavela yini hi mahlo kukota loko ingi hi fambisile munhu loyi hi matimba ya hina, kumbe hi vukhongeri bya hina. ₁₃Xikwembu xa Abrahama, ni xa Isaka, ni xa Yakobo, Xikwembu xa vatata wa hina, xi dzunisile nandza wa xona, Yesu loyi mi n'wi nyiketeke Pilato, mi n'wi landzula emahlweni ka yena, kasi yena a a n'wi avanyisela ku n'wi tshunxa. ₁₄Kambe n'wina mi landzurile la kwetsimeke, la lulameke kutani mi komberile ku nyikiwa mudlayi. ₁₅Kasi mi dlele Hosi ya vutomi, yeloyi Xikwembu xi n'wi pfuxeke eku feni; kutani na hina hi timbhoni ta swona. ₁₆Hikwalaho ka ku pfumela vito ra yena, hi rona vito ra yena leri tiyiseke munhu loyi mi n'wi vonaka, mi n'wi tivaka; kutani ku pfumela eka Yesu ku n'wi hanyisile swinene emahlweni ka n'wina hinkwenu.

₁₇“Sweswi, vamakwerhu, ndza swi tiva leswaku mi endlise sweswo hi ku ka mi nga swi tivi, na tona tihosi ta n'wina; ₁₈kambe Xikwembu xi hetisisile hi mukhuva wolowo timhaka leti xi nga rhanga xi ti vula hi milomu ya vaprofeta va xona hinkwavo, leswaku Kriste wa xona u ta twisiwa ku vaviseka.

₁₉“Hundzukani hakona, mi tlhelela eka Xikwembu, leswaku swidyoho swa n'wina swi hlanguriwa, ₂₀leswaku ku nga fika nkarhi wa ku susa mikarhalo, lowu humaka eka Hosi ni leswaku a rhuma Yesu Kriste, loyi a mi vekeleke yena eku sunguleni, ₂₁loyi tilo ri faneleke ku n'wi amukela, ku ko ku fika nguva ya ku vuyetela swilo hinkwaswo, leyi Xikwembu xi yi vuleke hi milomu ya vaprofeta lavo kwetsima hinkwavo va xona ka ha ri eku sunguleni. ₂₂Hikuva Muxe u vurile, a ku: ‘Hosi, Xikwembu xa n'wina, yi ta mi humesela exikarhi ka vamakwenu, muprofeta la fanaka na mina, mi ta n'wi yingisa eka hinkwaswo leswi a nga ta mi byela swona; ₂₃kutani ku ta endleka leswaku un'wana ni un'wana loyi a nga yingisiki muprofeta yeloyi, u ta susiwa exikarhi ka tiko.’ ₂₄Na swona, vaprofeta hinkwavo lava nga vulavula, ku sungula eka Samiele ni lava n'wi tlhandlamaka, hinkwavo va bvumbhile masiku lawa. ₂₅Hi n'wina vana va vaprofeta ni va ntwanano lowu Xikwembu xi nga wu endla ni vatata wa hina, loko xi ku eka Abrahama: Tinxaka hinkwato ta misava ti ta katekisiwa hi vatukulu va wena. ₂₆Xikwembu xi sungurile ha n'wina, ku mi humesela nandza wa xona Yesu, xi n'wi rhuma ku ta mi katekisa, hi ku hundzuluxa un'wana ni un'wana wa n'wina eku biheni ka yena.”