TIMHAKA 23

₁Pawulo a honolela va Sinedri, a ku: “Vavanuna varikwerhu, ndzi hanyile hi ripfalo lerinene hinkwaro emahlweni ka Xikwembu ku fika siku leri.” ₂Kavaloko Ananiya, muprista lonkulu, a lerisa lava yimeke ekusuhi na yena leswaku va n'wi ba enon'wini. ₃Kambe Pawulo a ku eka yena: “Xikwembu xi ta ku ba, khumbi leri basisiweke, hikuva u tshamele ku ndzi avanyisa hi nawu, kasi u tlula nawu hi ku lerisa leswaku ndzi biwa.” ₄Kutani lava nga ekusuhi na yena va ku: “Xana u sola muprista lonkulu wa Xikwembu xana?” ₅Pawulo a ku: “Vamakwerhu, a ndzi nga swi tivi leswaku i muprista lonkulu, hikuva ku tsariwile leswaku: ‘U nga tshuki u rhukana hosi ya tiko ra rikwenu.’ ”

₆Kambe Pawulo, hikuva a a swi tiva leswaku van'wana exikarhi ka vona a va ri Vasaduki, kambe van'wana a va ri Vafarisi, a tlakusa rito exikarhi ka Sinedri, a ku: “Vavanuna varikwerhu, ndzi mufarisi, n'wana wa Vafarisi, ndzi avanyisiwa hikwalaho ka ku tshemba ni ka ku pfuka ka vafi.”

₇Kuteloko a vule sweswo, ku humelela ku hambana exikarhi ka Vafarisi ni Vasaduki, kutani vunyingi byi avana. ₈Hikuva Vasaduki a va ku, a ku na ku pfuka ka vafi, hambi yi ri ntsumi, hambi wu ri Moya; kasi Vafarisi vona a va pfumela sweswo hinkwaswo. ₉Kutani ku endliwa huwa leyikulu; vatsari van'wana lava yimeleke Vafarisi, va yima, va hlamula, va ku: “A hi kumi ku biha ni kun'we eka munhu loyi; kumbexana moya wun'wana wu vulavurile na yena, swimbe ntsumi xana?” ₁₀Kakuloko dzolonga ri engeteleka, ndhuna yi chava leswaku va nga handzula Pawulo, kutani yi lerisa ntlawa leswaku wu ngirimela wu n'wi vutla exikarhi ka vona, wu n'wi tlherisela ekhokholweni.

₁₁Evusikwini lebyi tlhandlamaka, Hosi yi tikombisa eka yena, yi ku: “Tiyisa mbilu, Pawulo, hikuva kukotisa leswi u vuleke vumbhoni bya timhaka ta mina eYerusalema, swi fanele leswaku u vula vumbhoni bya tona ni ti le Rhoma.”

₁₂Kuteloko byi xile, Vayuda van'wana va endla ximhuku, va tiboha hi ku hlambanya, va ku va nga ka va nga dyi, va nga n'wi, va nga si dlaya Pawulo. ₁₃Lava endleke ximhuku lexi, a va tlula mune wa makume. ₁₄Kutani va ya eka vaprista lavakulu ni ka vakulukumba, va ku: “Hi hlambanyile hi ku tiyisa leswaku hi nga ka hi nga dyi nchumu hi nga si dlaya Pawulo. ₁₅Sweswi, n'wina ni Sinedri, tivisani ndhuna leyikulu leswaku a ta n'wi rhumela eka n'wina mundzuku, swi va tanihi loko mi rhandza ku vutisisa swin'wana etimhakeni ta yena; loko hi ri hina, hi ta va hi tilunghisile ku n'wi dlaya a nga si fika.”

₁₆Kambe n'wana wa makwavo wa xisati wa Pawulo, a twa ta ku etlelela ka vona, kavaloko a famba a ya ekhokholweni, a tivisa Pawulo. ₁₇Pawulo a vitana yin'wana ya tindhuna ta dzana, a ku eka yena: “Yisa jaha leri eka ndhuna leyikulu, hikuva u ni mhaka leyi a nga ta n'wi byela yona.” ₁₈Kutani yeloyi a n'wi teka a n'wi yisa eka ndhuna ya khume ra madzana, a ku: “Pawulo, loyi a bohiweke u ndzi vitile, a ndzi khongela leswaku ndzi tisa jahanyana leri eka wena, u ni mhaka leyi a nga ta ku byela yona.” ₁₉Ndhuna yi n'wi khoma hi voko, yi ya etlhelweni na yena, yi n'wi vutisa, yi ku: “Mhaka hi yihi leyi u ndzi byelaka yona?” ₂₀Yeloyi a ku: “Vayuda va kanele kun'we va ku va ta ku khongela leswaku u rhuma Pawulo ehubyeni mundzuku, va ta endla swange va rhandza ku vutisisa timhaka ta yena. ₂₁Kambe u nga tshuki u va pfumelela, hikuva vavanuna lava tlulaka mune wa makume va n'wi lavelela, va tibohile hi ku hlambanya va ku va nga ka va nga dyi, hambi ku ri ku nwa, va nga si n'wi dlaya; kambe sweswi, va tilunghisile va langutele ku pfumela ka wena ntsena.” ₂₂Kavaloko ndhuna leyikulu yi tlherisa jahanyana rero yi ri lerisa, yi ku: “U nga tshuki u byela munhu leswaku u ndzi tivisile timhaka leti.”

₂₃Kuteloko yi vitanile tindhuna timbirhi, yi ku eka tona: “Lunghisani tinhenha ta madzana mambirhi, ni vakhandziyi va ntlhanu wa makume na makume mambirhi, ni vamavura va madzana mambirhi, va ta ya eKhezariya hi nkarhi wa vunharhu wa vusiku. ₂₄Mi lunghisela Pawulo xifuwo lexi a nga ta xi khandziya, a ta yisiwa eka hosi Felikisi a ha hanya.”

₂₅Kutani a tsala papila leri nge:

₂₆“Klawudiyo Lisiya, eka Felikisi, hosi ya mafundza, xewani!

₂₇“Vayuda va khomile munhu loyi; kakuloko va rhandza ku n'wi dlaya, ndzi fika ni masocha, ndzi va vutlela yena loko ndzi twa leswaku i Murhoma. ₂₈Kutani hi ku rhandza ku tiva lexi va n'wi hehlaka ha xona, ndzi n'wi yise ehubyeni ya vona, ₂₉kwalaho ndzi kumile leswaku va n'wi hehla hi timhaka ta nawu wa vona, kambe ku nga ri na nandzu lowu fanekeleke rifu, hambi ti ri timpecana. ₃₀Kambe, hikuva ndzi byeriwile leswaku Vayuda va ta lavelela munhu loyi, ndzi hatlisile ndzi n'wi rhumela eka wena kutani ndzi rhambile vahehli va yena leswaku va vula emahlweni ka wena timhaka ta yena.

“Salani.”

₃₁Tinhenha ti endla hilaha ti lerisiweke hakona: Ti teka Pawulo, ti n'wi yisa le Antipateri nivusiku. ₃₂Byi xa, ti siya Pawulo ni vakhandziyi leswaku va famba na yena; kutani tona ti tlhelela ekhokholweni. ₃₃Volavo, loko va fikile eKhezariya, va nyika hosi papila, va humesa na Pawulo emahlweni ka yena. ₃₄Kuteloko hosi yi ri hlayile, yi n'wi vutisa leswaku i wa tikwanyana rihi ra Varhoma; kuteloko yi twile leswaku i wa Kilikiya, ₃₅yi ku: “Ndzi ta ku yingisa loko vahehli va wena va fikile.” Kutani a lerisa leswaku a hlayisiwa endlwini ya Heroda.