TIMHAKA 21

₁Kuteloko hi avene na vona, hi suka hi wela hi kongomile swinene eKosi, hi ya fika kona; loko byi xa, hi fika eRhoda; kutani loko hi suka kona, hi ya nghena ePatara. ₂Kona hi kuma ngalava leyi hundzelaka eFenikiya, kutani hi nghena eka yona, hi suka. ₃Kuteloko hi humelela exihlaleni xa Kipra, hi xi bela evokweni ra ximatsi, hi kongoma eSiriya, kutani hi fika eTiri, hikuva ngalava a yi fanele ku humesa mirhwalo kona.

₄Kambe, hikuva hi kumile vadyondzisiwa, hi xwa kona ntlhanu wa masiku na mambirhi. Vona a va byela Pawulo hi Moya leswaku a nga tshuki a tlhandlukela eYerusalema. ₅Kambe loko hi hetile masiku walawo, hi suka, hi heleketiwa hi hinkwavo ku ya fika ehandle ka muti, va ri ni vavasati ni vana; kutani hi khinsama eribuwini, hi khongela. ₆Kutani, kuteloko hi lelanile, hi khandziya engalaveni; kambe vona va tlhelela ekaya. ₇Loko hi ri hina, hi suka eTiri, hi ya fika ePtolemayi laha riendzo ra hina ra ku wela ri nga helela kona; kuteloko hi xewetane ni vamakwerhu, hi xwa siku rin'we na vona.

₈Hi siku leri tlhandlamaka, hi suka hi ya fika eKhezariya; kutani hi nghena endlwini ya Filipi, mufundhisi, a nga un'wana wa lava ntlhanu na vambirhi; kutani hi tshama eka yena. ₉A a ri ni mune wa vana va vanhwana lava profetaka. ₁₀Kuteloko hi tshamile kona masiku ma nga ri mangani, muprofeta loyi va nge i Agabo, a fika, a pfa eYudiya. ₁₁Kuteloko a te eka hina, a teka nghole ya xifunga ya Pawulo, a tiboha mavoko ni milenge ha yona, kutani a ku: “Moya lowo Kwetsima wu vula leswaku wanuna loyi nghole leyi, yi nga ya yena, Vayuda va ta n'wi bohisa sweswo eYerusalema, va kondza va n'wi nyiketa emavokweni ya vamatiko.” ₁₂Sweswi loko hi twa mhaka leyi, hi n'wi khongotela swin'we ni va muti wolowo leswaku a nga tshuki a tlhandlukela eYerusalema. ₁₃Kambe Pawulo a hlamula, a ku: “Xana mi endla yini hi ku rila, mi ndzi tlhava mbilu xana? Kasi mina ndzi tilunghisile, ku nga ri ku bohiwa ntsena, kambe ni ku fela vito ra Hosi Yesu eYerusalema.” ₁₄Kuteloko a tialele, hi miyela hi ku: “A ku endliwe leswi rhandziwaka hi Hosi!”

₁₅Endzhaku ka masiku walawo, loko hi longile, hi tlhandlukela eYerusalema. ₁₆Kambe vadyondzisiwa van'wana va Khezariya, na vona va famba na hina, va hi yisa eka Mnasoni, mudyondzisiwa wa khale, la pfeke Kipra, loyi hi nga ta rhurheriwa eka yena.

₁₇Kuteloko hi fikile eYerusalema, vamakwerhu va hi amukela hi ku tsaka. ₁₈Loko byi xile, Pawulo a ya na hina eka Yakobo, kutani vakulukumba hinkwavo va hlengeletana kona. ₁₉Kuteloko a va xewetile, a va byela hi ku tlhandlamana timhaka hinkwato leti Xikwembu xi ti endleke ematikweni hi ku tirha ka yena. ₂₀Loko va twa timhaka teto, va dzunisa Xikwembu. Kambe va ku eka yena: “Makwerhu, wanga vona vunyingi bya madzanadzana ya Vayuda lava pfumeleke, kutani hinkwavo va hisekela nawu. ₂₁Kambe va byeriwile leswaku u dyondzisa Vayuda hinkwavo lava nga ematikweni ku hambana na Muxe, u ku: ‘Va nga tshuki va yimbisa vana va vona na swona va nga tshuki va ya hi mikhuva.’ ₂₂Kutani ku nga endliwa yini kwalaho? Vunyingi byi ta hlengeletana hikuva va ta twa leswaku u fikile. ₂₃Loko swi ri tano, endla leswi hi nga ta ku byela swona. Kwala hi ni vavanuna va mune lava tiboheke hi ku hlambanya; ₂₄u famba na vona, u tibasisa na vona, u va rihelela, va tibyewula tinhloko; kutani hinkwavo va ta tiva hi sweswo leswaku a ku tiyi ni yin'we ya timhaka leti va ti tweke, leti u vuriwaka ha tona, ni leswaku na wena u famba u ri karhi u hlayisa nawu. ₂₅Loko va ri vamatiko lava pfumeleke, hi va tsalele loko hi avanyisile leswaku va nga tshuki va bohiwa hi leswo tano, ntsena va chava leswi nga tlhaveriwa swifaniso, ni ngati, ni leswi nga dlawa hi xihluku, ni vuoswi.”

₂₆Kutani loko byi xa, Pawulo a ya ni vavanuna valavo, a tibasisa na vona a nghena etempeleni ku vula masiku ya ku tibasisa ka vona, laha ma nga ta hela hakona, ku kondza ku humesiwa magandzelo ya ku khensa ya un'wana ni un'wana wa vona.

₂₇Kakuloko masiku ya ntlhanu na mambirhi ma ri kusuhi ni ku hela, Vayuda va Asiya va n'wi vona etempeleni, kutani va pfuxa ntshungu hinkwawo, ₂₈va n'wi khoma, va huwelela, va ku: “Vavanuna va Israele, hi pfuneni! Hi loyi munhu la dyondzisaka hinkwako vanhu hinkwavo, dyondzo leyi lwaka ni tiko, ni nawu ni xivandla lexi; u engetile hi ku tisa Vagriki etempeleni, u nyamisile xivandla lexo kwetsima.” ₂₉Hikuva a va vonile Trofimo wa Efesa a famba na yena exikarhi ka muti, kutani va anakanya leswaku Pawulo u n'wi nghenisile etempeleni.

₃₀Kutani muti hinkwawo wu endla dzolonga, ni vanhu va tsutsumela swin'we exivandleni xin'we, kuteloko va khomile Pawulo, va n'wi kokela ehandle ka tempele; kutani hi nomu lowu, tinyangwa ti pfariwa. ₃₁Kakuloko va lava ku n'wi dlaya, ndhuna ya nyimpi yi twa leswaku hinkwako eYerusalema ku ni dzolonga. ₃₂A hatlisa a ta ni masocha ni tindhuna ta madzana, a tsutsumela eka vona; kuteloko va vona ndhuna ya nyimpi ni masocha, va tshika ku ba Pawulo. ₃₃Kavaloko ndhuna ya nyimpi yi tshinela, yi n'wi khoma, kutani yi lerisa leswaku a bohiwa hi timpecana timbirhi; kutani a vutisa leswaku i mani, ni leswaku xana lexi a xi endleke i yini? ₃₄Kutani van'wana va huwelela swin'wana, van'wana va huwelela swin'wana exikarhi ka ntshungu; kambe leswi a hluleka ku kuma mhaka leyi nga yona hikwalaho ka pongo, a lerisa leswaku a yisiwa ekhokholweni. ₃₅Kuteloko va fikile eswikhandziweni, a kondza a rhwariwa hi masocha, hikwalaho ka ntshungu lowu endlaka hi matimba; ₃₆hikuva vunyingi bya vanhu a byi n'wi landzelela, byi huwelela, byi ku: “N'wi suse!”

₃₇Pawulo, loko a ta nghenisiwa ekhokholweni, a ku eka ndhuna: “Xana ndzi nga vulavula mhaka na wena xana?” Kutani ndhuna yi ku: “Kasi u tiva Xigriki xana? ₃₈Xana a hi wena Muegipta loya, la pfuxeke dzolonga emasikwini lama hundzeke, a yisa emananga vavanuna va vadlayi va mune wa makume ya madzana?” ₃₉Pawulo a ku: “Mina ndzi Muyuda, munhu wa Tarso, muti wa Kilikiya lowu twaleke; kambe wanga ndzi tshika ndzi vulavula ni tiko.” ₄₀Kuteloko a n'wi tshiketile, Pawulo loko a ri karhi a yimile eswikhandziweni, a koweta vanhu hi voko. Kutani, kuteloko va miyele swinene, a vulavula na vona hi ririmi ra Xiheveru, a ku: