Muapostola a tsakela Gayo.
1Nkulukumba, eka murhandziwa Gayo, loyi ndzi n'wi rhandzaka entiyisweni.
2Murhandziwa, ndzi rhandza leswaku u kateka etimhakeni hinkwato, u tsaka emirini wa wena, kukotisa leswi moya wa wena wu tsakeke. 3Hikuva ndzi tsakile ngopfu loko vamakwerhu lava fikeke halenu va vurile vumbhoni lebyinene ehenhla ka wena hilaha u fambaka entiyisweni. 4A ndzi na ku tsaka loku tlulaka loku ndzi nga na kona, loko ndzi twa leswaku vana va mina va famba entiyisweni.
5Murhandziwa, u landza ku pfumela emitirhweni hinkwayo leyi u tirhelaka ha yona vamakwerhu, va nga vaendzi. 6Hi vona lava nga endla vumbhoni bya rirhandzu ra wena emahlweni ka kereke; volavo kambe, u ta endla swinene loko u va longisa erendzweni ra vona, hi mukhuva lowu fanelaka Xikwembu. 7Hikuva va fambile hikwalaho ka vito ra xona, va nga amukelanga nchumu eka vamatiko. 8Hikwalaho hina hi fanele ku amukela lavo tano, leswaku hi tirhela ntiyiso swin'we na vona.
Diyotrefo na Demetriyo.
9Ndzi tsalerile kereke; kambe Diyotrefo la rhandzaka ku tiendla nkulukumba wa vona, a nga hi amukeri. 10Hikwalaho, kungakuloko ndzi ta, ndzi ta n'wi tsundzuxa mitirho leyi a yi endlaka loko a hi hleva hi timhaka to biha; kutani a nga kolwi ha swona, kambe na swona a nga amukeri vamakwerhu, a engeta a sivela ni lava rhandzaka ku va amukela, a va hlongola ni le kerekeni.
11Murhandziwa, u nga etisi swo biha, kambe u etisa leswinene. La endlaka swinene, i wa Xikwembu, kambe la endlaka swo biha, a nga vonanga Xikwembu.
12Demetriyo u kumile vumbhoni lebyinene eka hinkwavo, na kona ka ntiyiso; kambe na hina hi timbhoni ta yena; kutani ma swi tiva leswaku vumbhoni bya hina hi lebyi tiyeke.
13A ndzi ri ni timhaka to tala ta ku ku tsalela, kambe a ndzi rhandzi ku ti tsala hi peni ni inki; 14kambe ndza tshemba leswaku ndzi ta hatla ndzi ku vona, hi kona hi nga ta vulavula swin'we hi milomu.
15Ku rhula a ku ve na wena.
Vanakulorhi va ku rungula. Rungula vanakulorhi hi mavito ya vona.
