2 SAMIELE 3

₁Ku lwa ku va kona enkarhini lowo leha exikarhi ka yindlu ya Sawulo ni yindlu ya Davhida, kutani Davhida a a tinyiketa matimba, kambe yindlu ya Sawulo a yi ri karhi yi tsana. ₂Vana va xinuna va velekeriwe Davhida eHebroni: mativula ya yena i Aminoni, wa Ahinowama wa Yizriele; ₃wa vumbirhi, Kileyabu, wa Abigayele nkata Nabala, wa Karmele; wa vunharhu, Abixalomu, n'wana Maaka, n'wana Talimayi, hosi ya Gexuri; ₄wa vumune, Adoniya, n'wana Hagiti; wa vuntlhanu, Xefatiya, n'wana Abitali; ₅wa ntlhanu na un'we, Yitereyamu, n'wana Egila, nkata Davhida. Hi vona lava velekeriweke Davhida eHebroni. ₆Kakuloko ku lwa ku ri kona exikarhi ka yindlu ya Sawulo ni yindlu ya Davhida, Abinere a tiyela eka yindlu ya Sawulo. ₇Kambe a ku ri ni nsati lontsongo wa Sawulo, vito ra yena a a ri Risipa, n'wana Aya; kutani Ixi-Boxete a ku eka Abinere: “U nghenise ku yini eka nsati wa tatana xana?” ₈Kutani Abinere a kariha ngopfu hikwalaho ka marito ya Ixi-Boxete; a ku: “Xana ndzi nhloko ya mbyana ya Yuda xana? Namuntlha ndzi endla hi tintswalo ni yindlu ya Sawulo, tata wa wena, ni vamakwavo, ni vanakulobye va yena, kambe a ndzi ku nyiketangi emavokweni ya Davhida; kutani namuntlha u ndzi vekela nandzu wa nsati loyi! ₉Xikwembu a xi endle hi matimba ni ku engetela eka Abinere! Kunene hi laha Xikwembu xi hlambanyeleke Davhida hakona, ndzi ta n'wi endlela sweswo, ₁₀ndzi ta tiyisa xiluvelo xa Davhida ehenhla ka Israele ni le henhla ka Yuda, ku suka eDani ku fika eBerexeba.” ₁₁Kutani Ixi-Boxete a nga kotanga ku hlamula rito ni rin'we eka Abinere, hikuva a a n'wi chava.

₁₂Kutani Abinere a rhuma tintsumi eka Davhida, a ku: “Tiko i ra mani xana?” A engeta a ku: “Endla xinakulobye na mina, kutani voko ra mina ri ta va na wena ku hundzuluxela eka wena Vaisraele hinkwavo.” ₁₃Davhida a hlamula, a ku: “Hi swona, ndzi ta endla xinakulobye na wena; ndzi kombela xilo xin'we ntsena eka wena, ndzi ri: U nga ka u nga voni mombo wa mina loko u nga si ndzi tisela Mikala, n'wana Sawulo, siku u taka ku ndzi vona.” ₁₄Kavaloko Davhida a rhumela Ixi-Boxete, n'wana Sawulo tintsumi, a ku: “Ndzi nyike nsati wanga Mikala loyi ndzi n'wi lovoleke hi misuvu ya dzana ya Vafilista.” ₁₅Kutani Ixi-Boxete a rhuma vanhu va ya n'wi teka eka nuna wa yena, eka Palatiele, n'wana Layixi. ₁₆Nuna wa yena a ta na yena, a n'wi landza a ri karhi a rila ku fika eBahurimi; kutani Abinere a ku eka yena: “Tlhela u muka!” Kavaloko a muka.

₁₇Abinere a vulavula ni vakulukumba va Israele, a ku: “Tolo ni le tolweni a mi lava Davhida leswaku a va hosi ya n'wina; ₁₈swi endleni sweswi, hikuva Yehovha u vurisile ehenhla ka Davhida u te: ‘Hi voko ra Davhida, nandza wa mina, ndzi ta ponisa tiko ra mina ra Israele emavokweni ya Vafilista ni le mavokweni ya valala va yena hinkwavo.’ ” ₁₉Abinere a vulavula ni le tindleveni ta Benjamini, kutani a ya byela ni le tindleveni ta Davhida, eHebroni, timhaka hinkwato leti sasekeke emahlweni ka Israele, ni le mahlweni ka yindlu hinkwayo ya Benjamini. ₂₀Kavaloko Abinere a ta eka Davhida eHebroni, a ri ni vanhu va makume mambirhi kutani Davhida a endlela Abinere ni vanhu lava ingi a ri na vona xifihlulo. ₂₁Kavaloko Abinere a ku eka Davhida: “Ndzi ta pfuka, ndzi ya hlengeleta Vaisraele hinkwavo eka hosi, mufumi wa mina; va ta endla xinakulobye na wena, kutani u ta fuma hinkwako laha mbilu ya wena yi ku navelaka.” Kavaloko Davhida a lelana na Abinere, kutani yena a famba hi ku tsaka.

₂₂Kutani waswivo, malandza ya Davhida, ni ya Yowabu, a ma ri karhi ma vuya enyimpini, a ma tisa xuma lexikulu; kambe Abinere a nga ha vanga na Davhida eHebroni, hikuva a a n'wi tlherisile kutani a fambile hi ku tsaka. ₂₃Yowabu a fika ni nyimpi hinkwayo leyi ngi yi ri na yena, kutani va ya byela Yowabu, va ku: “Abinere n'wana Neri, u tile eka hosi, kutani u yi lerile, kutani u fambile hi ku tsaka.” ₂₄Kavaloko Yowabu a ta ehosini, a ku: “U endle yini xana? Waswivo, Abinere u tile eka wena! U n'wi tlherisele yini, a famba hi ku tsaka? ₂₅Wa tiva Abinere, n'wana Neri; u tile eka wena ku ku kanganyisa, ni ku tiva ku huma ka wena ni ku nghena ka wena, ni ku tivisisa hinkwaswo leswi u swi endlaka.” ₂₆Kavaloko Yowabu a huma eka Davhida, kutani a rhuma vanhu va landza Abinere, va n'wi tlherisa a ri exihlobyeni xa Sira; yena Davhida a a nga swi tivi. ₂₇Kuteloko Abinere a vuyile eHebroni, Yowabu a n'wi vitana hitlhelo enyangweni ku vulavula na yena khwatsi; kavaloko a n'wi tlhava khwiri, a fa, ku ri hikwalaho ka ngati ya makwavo Asahele. ₂₈Davhida a swi twa ndzhaku, kutani a ku: “A ndzi na nandzu wa ngati ya Abinere n'wana Neri, mina, ni vuhosi bya mina emahlweni ka Yehovha hi masiku, ₂₉a yi ve enhlokweni ya Yowabu ni le ndlwini hinkwayo ya tata wa yena. Ku nga pfumariwi ni siku ni rin'we endlwini ya Yowabu munhu la nga ni ngati, hambi wa nhlokonho, hambi la xongotelaka hi nhonga, hambi la waka hi tlhari, hambi la pfumalaka vuswa.” ₃₀Sweswo Yowabu na Abixayi makwavo, va dlayile Abinere, hikuva a a dlayile Asahele, makwavo wa vona, eGibiyoni, enyimpini.

₃₁Davhida a ku eka Yowabu ni ka tiko hinkwaro leri ngi ri ri na yena: “Handzulani tinguvu ta n'wina mi ambala tinguvu leto khwaxa, mi endla nkosi emahlweni ka Abinere.” Kutani hosi Davhida a yi famba endzhaku ka vuhlaka. ₃₂Va lahla Abinere eHebroni, kutani hosi yi tlakusa rito, yi rila esirheni ra Abinere, na rona tiko hinkwaro ri rila. ₃₃Hosi yi endla risimu ra swirilo hikwalaho ka Abinere, yi ku:

₃₅Tiko hinkwaro ri tshama ri n'wi rila; kutani tiko hinkwaro ri ta eka Davhida ku n'wi khongotela leswaku a dya loko wa ha ri nhlekanhi; kambe Davhida a hlambanya a ku: “Xikwembu a xi ndzi endle hi matimba ni ku engetela, loko ndzi nantswa vuswa, hambi xi ri xilo xihi, dyambu ri nga si pela!” ₃₆Tiko hinkwaro ri twisisa mhaka leyi, kutani xi va xilo xo saseka emahlweni ka rona; hinkwaswo leswi endliweke hi hosi, swi ri swo saseka emahlweni ka tiko hinkwaro. ₃₇Kutani tiko hinkwaro, va ri Vaisraele hinkwavo va tiva siku leri, leswaku Abinere, n'wana Neri, a nga dlayiwanga hi ku lerisa ka hosi. ₃₈Kutani hosi yi ku eka malandza ya yena: “A mi swi tivi leswaku hosi yin'wana, yi nga nhenha leyikulu, yi wile namuntlha eIsraeleni! ₃₉Ndzi tsanile namuntlha, hambi ndzi cheriwile hi mafurha, ndzi vekiwe hosi; hikuva vanhu lava, vana va Seruya, va ndzi tlula hi matimba. Yehovha a a rihisele la dyohaka hi lunya ra yena.”