Marito ya Davhida ya ku hetelela.
1Hi wona marito ya Davhida ya ku hetelela:
Rito ra Davhida n'wana Yese,
Rito ra munhu la tlakusiweke,
Ra muhlawuriwa wa Xikwembu xa Yakobo,
Ra muyimbeleri la rhandzekaka wa Israele.
2Moya wa Yehovha wu vulavula ha mina,
Rito ra wona ri le ririmini ra mina.
3Xikwembu xa Israele xi vurisile,
Ribye ra xichavelo xa Israele ri te eka mina:
“Un'wana la lulameke u ta fuma vanhu,
Mufumi la chavaka Xikwembu,
4La fanaka ni vurhonga loko dyambu ri huma,
Ninhlekanhi, loko mapapa ma nga ri kona,
Ku vonakala ka yena ku mirisa byanyi bya misava endzhaku ka mpfula.”
5Xana a hi swona eka yindlu ya mina emahlweni ka Xikwembu,
Leswi a nga endla na mina ntwanano lowu nga heriki,
Lowu lunghisiweke swinene ni ku tiyisiwa?
Xana a nga mirisi ku hlayiseka ka mina hinkwako ni ku navela hinkwako ka mina?
6Kambe vana va Beliyali va fana ni mahlwehlwe lama cukumetiwaka,
Lama nga khomiwiki hi voko;
7La rhandzaka ku ma khoma a teka nsimbhi kumbe mbhingo wa tlhari,
Kutani ma hisiwa hi ndzilo kwalaho.
Tinhenha ta Davhida.
8Hi wona mavito ya tinhenha ta Davhida: Yoxebe-Baxebete wa Hakimoni, a a ri ndhuna ya tinhenha ta matimba. U tlhavile hi tlhari vanhu va 800, va fa hi siku rin'we.
9Endzhaku ka yena, Eliyazara, n'wana Dodo, n'wana wa munhu wa Ahohi. A yi ri yin'wana ya tinhenha leti ngi ti ri na Davhida loko va pfukela Vafilista lava hlengeletaneke eku lweni, kutani Vaisraele va tlhandluka. 10A pfuka a tlhava Vafilista, voko ra yena ri ko ri karhala, ri namarhela etlharini; sweswo Yehovha a tirha ku hlayiseka lokukulu siku lero. Kutani tiko ri vuya endzhaku ka Eliyazara, ri ta phanga xuma ntsena.
11Endzhaku ka yena, a ku ri na Xama, n'wana Agi, wa Harari. Vafilista a va hlengeletanile eLehi, laha nsimu ya tinyawa ingi yi ri kona; kutani vanhu a va balekile emahlweni ka Vafilista, 12kambe yena a yima exikarhi ka nsimu a yi ponisa, a ri karhi a lwa ni Vafilista. Kutani Yehovha a tirha ku hlayiseka lokukulu.
13Tindhuna tinharhu leti humaka eka leti ta makume manharhu, ti xikela eka Davhida hi nkarhi wa ku tshovela ebakweni ra Adulama, loko nyimpi ya Vafilista a yi gova enkoveni wa Varefayimi. 14Enkarhini lowu Davhida a a ri ekhokholweni, a ku ri ni xirindzo xa Vafilista eBetlehema. 15Davhida a sungula ku navela, a ku: “I mani la nga ta ndzi nwisa mati ya xihlovo lexi nga enyangweni ya Betlehema xana?” 16Kavaloko tinhenha tinharhu ti ya hundza exikarhi ka magovela ya Vafilista, ti ka mati exihlobyeni xa Betlehema, lexi nga enyangweni ya muti, ti ma tisa eka Davhida, 17kambe a ala ku ma nwa, kutani a ma halatela emahlweni ka Yehovha, a ku: “Oho Yehovha, a swi ve kule na mina ku endlisa sweswo! A hi ngati ya vanhu lava fambeke va nga hlayisanga vutomi bya vona xana?” Kutani a ala ku ma nwa. Tinhenha letinharhu ti endlise sweswo.
18Abixayi, makwa Yowabu, n'wana Seruya, a a ri ndhuna ya lavanharhu. A tlakusa tlhari ra yena ehenhla ka vanhu va madzana manharhu, a va dlaya, kutani a va ni vito exikarhi ka lavanharhu. 19A dzunisiwa exikarhi ka lavanharhu, a va hosi ya vona, kambe a nga kotisanga lavanharhu vo sungula.
20Benaya, n'wana Yehoyada, n'wana wa nhenha ya Kabisele, a nga nkulukumba hi mitirho ya yena; a dlaya tinghala letimbirhi ta Mowabu; Kutani a ngirimela exihlobyeni a dlaya nghala kona hi siku ra gamboko. 21A dlaya ni Muegipta wa xiyimo lexi chavisaka; Muegipta loyi, a a ri ni tlhari evokweni ra yena; kutani a ya eka yena hi nhonga, a hlomula tlhari evokweni ra Muegipta, a n'wi dlaya hi tlhari ra yena. 22Hi swona leswi endliweke hi Benaya, n'wana Yehoyada; a a ri ni vito exikarhi ka tinhenha letinharhu. 23A a tlula hi ku twala lava makume manharhu, kambe a nga ringananga ni lavanharhu vo sungula. Kutani Davhida a n'wi endla ndhuna ya huvo ya yena.
24Asahele, makwa Yowabu, a a ri un'wana wa lava makume manharhu; na Elihanani, n'wana Dodo, wa Betlehema. 25Xama wa Haroda; Elika, wa Haroda. 26Helese, wa Pelete, Ira n'wana Ikexe, wa Tekowa. 27Abiezere wa Anatoto; Mebunayi, wa Huxa. 28Salimoni, wa Ahohi; Maharayi wa Netofa. 29Helebe, n'wana Baana wa Netofa; Itayi, n'wana Ribayi, wa Gibeya wa vana va Benjamini. 30Benaya, wa Piratoni; Hidayi, wa Nakale-Gaaxi. 31Abi-Aliboni, wa Araba; Azimavhete, wa Bahurimi. 32Eliyahaba wa Xaaliboni, Bene-Yaxeni, Yonatani. 33Xama, wa Harari; Ayihama, n'wana, Xarare wa Harari; 34Elifelete, n'wana Ahasibayi, n'wana wa Mumaaka; Eliyama, n'wana Ahitofele, wa Gilo. 35Hesiro, wa Karmele; Paarayi, wa Araba. 36Yigala, n'wana Natani, wa Soba, Bani, wa Gadi. 37Seleke wa va Amoni, na Naharayi, wa Beroto, lava tameleke matlhari ya Yowabu, n'wana Seruya. 38Ira wa Yitira; Garebe, wa Yitira. 39Uriya wa ka Vahiti; a va ri 37 loko va hlayiwa hinkwavo.
