Ta Davhida loko a lwa ni Vaamoni.
1Endzhaku ka sweswo, hosi ya vana va Amoni yi fa, kutani Hanunu, n'wana wa yena, a fuma ematshan'weni ya vona. 2Kutani Davhida a ku: “Ndzi ta kombisa tintswalo eka Hanunu, n'wana Nahaxi, kukotisa leswi tata wa yena a ndzi kombiseke tintswalo.” Kavaloko Davhida a rhuma malandza ya yena ma ya n'wi chavelela hikwalaho ka tata wa yena; kutani malandza ya Davhida ma fika etikweni ra vana va Amoni. 3Tindhuna ta vana va Amoni ti ku eka Hanunu, hosi ya tona: “Xana kunene Davhida u rhumile emahlweni ka wena vachaveleri ku dzunisa tata wa wena-ke? Xana a hi ku kamba muti, ni ku wu hlola, ni ku wu mbundzuxa, leswi Davhida a ku rhumeleke malandza ya yena xana?” 4Kutani Hanunu a teka malandza ya Davhida, a ma byewula malebvu hitlhelo, a xeka ni tinguvu ta vona hitlhelo ku fika ehansi ka swifungha, kutani a va tlherisa. 5Sweswo va yisa mahungu eka Davhida, kutani a rhuma vanhu va ya hlangana na vona, hikuva vanhu lava a va sandziwile ngopfu; kutani hosi yi ku eka vona: “Tshamani eYeriko, malebvu ya n'wina ma ko ma mila, hi kona mi nga ta vuya.”
6Kambe vana va Amoni va vona leswaku va tiendlile lava vengiwaka eka Davhida, kutani vana va Amoni va rhuma, va ya rhamba vanhu va 20 000 Vasiriya va Beta-Rehobo, ni Vasiriya va Soba; ni hosi ya Maaka leyi ngi yi ri ni vanhu va 1 000; ni va ka Toba, va ri va 12 000. 7Kuteloko Davhida a swi twa, a rhuma Yowabu ni nyimpi hinkwayo, ti ri tinhenha. 8Kutani vana va Amoni va huma va tilunghisile ku lwa enyangweni; kambe Vasiriya va Soba ni va Rehobo, ni va Toba, ni va Maaka a va yima etlhelweni, emasin'wini. 9Kuteloko Yowabu a vonile leswaku tinyimpi a ti ri kona emahlweni ka yena ni ndzhaku ka yena, a hlawula vavanuna lavo tiya exikarhi ka tinhenha hinkwato ta Israele, kutani a va rhuma ku ya hlangana ni Vasiriya; 10lava seleke va tiko, a va vekela emavokweni ya Abixayi makwavo, ku ta lwa ni vana va Amoni. 11Kutani a ku eka yena: “Loko Vasiriya va ndzi hlula, u ta ndzi ponisa, kambe loko vana va Amoni va ku hlula, ndzi ta ku ponisa. 12U va ni matimba, kambe a hi tiyeleni eka tiko ra hina ni le ka miti ya Xikwembu xa hina; kambe Yehovha a a endle leswi lulameke emahlweni ka yena!” 13Kutani Yowabu ni tiko leri ngi a ri na rona, a tshinela emahlweni ku ya lwa ni Vasiriya, kambe vona va baleka emahlweni ka yena. 14Vana va Amoni, kuteloko va vonile Vasiriya va baleka, na vona va baleka emahlweni ka Abixayi, va tlhelela emutini. Kavaloko Yowabu a tlhela eku lweni ni vana va Amoni, a muka eYerusalema.
15Vasiriya, kuteloko va vonile ku hluriwa ka vona emahlweni ka Israele va hlengeletana hinkwavo; 16kutani Hadadi-Esere a rhuma vanhu va ya vitana Vasiriya lava nga ehase ka nambu, kutani va ta eHelama, va ri ni hosi ya vona, Xobaki, ndhuna ya nyimpi ya Hadadi-Esere. 17Timhaka leti ti yisiwa eka Davhida, kutani a hlengeleta Vaisraele hinkwavo, a pela Yordani, a ya fika eHelama; kavaloko Vasiriya va tilunghisa ku ya hlangana na Davhida, kutani va lwa na yena. 18Vasiriya va tsutsuma emahlweni ka Israele, kutani Davhida a dlaya swipani swa tigolonyi swa madzana ya ntlhanu na mambirhi swa Vasiriya, ni vakhandziyi va tihanci va 40 000; a tlhava na Xobaki ndhuna ya nyimpi a fa kona. 19Tihosi hinkwato le ti fumiwaka hi Hadadi-Esere ti vona leswaku ti hluriwile emahlweni ka Israele, kutani ti kombela ku rhula eka Vaisraele, kambe ti fumiwa hi vona; kutani Vasiriya va chava ku pfuna kambe vana va Amoni.
