Ta Ahaziya loko a vabya, a vutisa Baala-Zebubu. A vitana Eliya.
1Kuteloko Akabu a file, Mowabu a pfukela Israele.
2Ahaziya a wa hi fasitere ra yindlu ya yena leyi tlakukeke, leyi ngi yi ri Samariya, kutani a vabya. A rhuma tintsumi, a ku eka tona: “Fambani, mi ya vutisa Baala-Zebubu, xikwembu xa Ekroni, ndzi ta tiva xana ndzi ta hanya evuvabyini lebyi.” 3Ntsumi ya Yehovha yi ku eka Eliya wa Tixibe: “Pfuka u ya hlangana ni tintsumi ta hosi ya Samariya, u ku eka tona: ‘Xana a ku na Xikwembu etikweni ra Israele, leswi mi fambaka mi ya vutisa Baala-Zebubu, xikwembu xa Ekroni?’ 4Hikwalaho, Yehovha u vurisa sweswo, a ku: ‘U nga ka u nga pfuki esangwini leri u etlelaka eka rona, hikuva u ta fa kunene.’ ” Kavaloko Eliya a suka.
5Tintsumi ti tlhelela eka Ahaziya, kutani a ku eka tona: “Mi tlhelela yini-ke?” 6Va ku eka yena: “Munhu u tlhandlukile ku ta hlangana na hina, a ku eka hina: ‘Tlhelelani eka hosi leyi mi rhumeke, mi ku eka yona: Yehovha u vurisa sweswo, a ku: “Xana a ku na Xikwembu etikweni ra Israele, leswi u hi rhumaka ku ya vutisa Baala-Zebubu, xikwembu xa Ekroni xana? Hikwalaho u nga ka u nga ha pfuki esangwini leri u etlelaka eka rona hikuva u ta fa kunene.” ’ ” 7Ahaziya a ku eka vona: “Munhu la nga hlangana na n'wina, a mi byela marito lawa, hi lowo yini-ke?” 8Va ku eka yena: “I munhu la ambaleke mavoya, a tibohe xisuti hi vamba ra dzovo.” Kutani a ku: “I Eliya wa Tixibe.”
9Kavaloko a rhuma eka Eliya, ndhuna ya ntlhanu wa makume, yi ri ni vanhu va yona va ntlhanu wa makume; yi tlhandluka eka yena, yi n'wi kuma a tshamisile enhlohlorhini ya ntshava, kutani yi ku eka yena: “Munhu wa Xikwembu! Hosi yi ku: ‘Xika!’ ” 10Eliya a hlamula a ku eka ndhuna ya ntlhanu wa mahume: “Loko ndzi ri munhu wa Xikwembu, a ku xike ndzilo wu huma etilweni, wu ku hisa, wena ni vanhu va wena va ntlhanu wa makume.” Kavaloko ndzilo wu huma etilweni, wu n'wi hisa ni vanhu va yena va ntlhanu wa makume.
11Ahaziya a engeta a rhuma eka yena ndhuna yin'wana ya ntlhanu wa makume, yi ri ni vanhu va yona va ntlhanu wa makume; yi vulavula, yi ku eka Eliya: “Munhu wa Xikwembu, hosi yi ri: ‘Hatlisa u xika!’ ” 12Eliya a hlamula a ku eka vona: “Loko ndzi ri munhu wa Xikwembu, a ku xike ndzilo, wu huma etilweni, wu ku hisa, wena ni vanhu va wena va ntlhanu wa makume.” Kavaloko ndzilo wa Xikwembu wu huma etilweni, wu n'wi hisa, yena, ni vanhu va yena va ntlhanu wa makume.
13Ahaziya a engeta a rhuma ndhuna ya vunharhu ya ntlhanu wa makume, yi ri ni vanhu va yona va ntlhanu wa makume. Ndhuna leya vunharhu, yi tlhandluka; kuteloko yi fikile yi khinsama hi matsolo ya yona emahlweni ka Eliya, yi n'wi khongela, yi ku eka yena: “Munhu wa Xikwembu! Wa nga tsetselela moya wa mina ni mimoya ya vanhu lava va ntlhanu wa makume, malandza ya wena! 14Waswivo, ndzilo lowu humaka etilweni, wu hisile tindhuna leto rhanga letimbirhi, ni vanhu va tona va ntlhanu wa makume; kambe sweswi, wanga tsetselela moya wanga.” 15Kutani ntsumi ya Yehovha yi ku eka Eliya: “Xika na yena, u nga n'wi chavi.” Eliya a pfuka, a ngirimela na yona ehosini. 16Kavaloko a ku eka yona: “Yehovha u vurisa, a ku: ‘Hikuva u rhumile tintsumi ku ya vutisa Baala-Zebubu, xikwembu xa Ekroni, (kasi a ku na Xikwembu etikweni ra Israele, ku hetisa rito ra xona xana?), u nga ka u nga pfuki esangwini leri u etleleke eka rona hikuva u ta fa.’ ”
Ku fa ka Ahaziya.
17Ahaziya a fa hilaha Yehovha a nga vula hakona hi Eliya, kutani Yoramu a fuma ematshan'weni ya yena hi lembe ra vumbirhi ra Yehoramu, n'wana Yoxafati, hosi ya Yuda; hikuva a a nga ri na n'wana wa wanuna. 18Leswi seleke swa timhaka ta Ahaziya ni leswi a swi endleke, xana a swi tsariwanga ebukwini ya Tikronika ta tihosi ta Israele xana?
