Vuako bya le tilweni.
1Kambe ha swi tiva leswaku siku yindlu leyi ya hina ya misava, lexi nga xintsonganyana, yi onhakaka, hi ni vuako ematilweni eka Xikwembu, yi nga yindlu leyi nga endliwangiki hi mavoko, kambe yi ri leyi nga heriki. 2Loko ha ha ri karhi hi ri entsongeni lowo, hi navela ngopfungopfu ku funengela yindlu ya hina ya le tilweni, 3loko kunene hi kumiwa hi ambele, ku nga ri leswaku hi funungurile. 4Hikuva hina va ntsonganyana lowo, hi rila hi ku tikeriwa, hikuva a hi rhandzi ku funungula, kambe ku ri ku ambala, leswaku leswi nga ta hela, swi va swi munyiwa hi vutomi. 5Kutani la hi vumbeleke swona, i Xikwembu xi nga xona lexi hi nyikeke xirhangana xa Moya.
6Ku tshemba ka hina loku tiyeke hi masiku ku kona, kutani ha swi tiva leswaku loko ha ha akile emirini, a hi le kaya, hi le kule ni Hosi, 7(hikuva hi famba hi ku pfumela, ku nga ri hi ku swi vona), 8ndzi ri hi ni ku tshemba loku tiyeke; kutani leswi hi swi rhandzaka, i ku rhurha emirini, hi va ekaya eHosini. 9Hikwalaho hi endlaka hi matimba ku yi tsakisa, hambi ha ha ri endlwini leyi, hambi hi suka ka yona. 10Hikuva hi ta fanela ku humelela hinkwerhu emahlweni ka xitshamo xa ku avanyisa xa Kriste, leswaku un'wana ni un'wana a ta amukela leswi ringanaka leswi a swi endleke loko a ha ri emirini, hambi swi ri leswo saseka, hambi swi ri leswo biha.
Ntirho wa ku hlanganisa vanhu ni Xikwembu.
11Sweswi, hikwalaho ka ku tiva ku chavisa ka Hosi, hi khongotela vanhu ku pfumela; kutani hi tiviwa hi Xikwembu, kambe ndza tshemba leswaku ha tiviwa ni le timpfalweni ta n'wina. 12A hileswaku hi tlhela hi titikisela eka n'wina, kambe ho mi nyika nkarhi wa ku tidzunisa ha hina, mi ta tiva ku hlamula eka lava tidzunisaka hi nghohe, ku nga ri hi mbilu. 13Hikuva loko hi ri handle ka hina, hi le ka Xikwembu; kutani loko hi tlhariha, hi tlhariha hikwalaho ka n'wina. 14Hikuva rirhandzu ra Kriste ri hi bohile, hi ringanisa leswaku, leswi un'we a feleke hinkwavo, hinkwavo va file, 15kutani u ferile hinkwavo, leswaku lava hanyaka, va nga ka va nga tshami va tihanyela, kambe va hanyela la feke, a tlhela a va pfukela. 16Hikwalaho, sweswi a hi nga ha tivi munhu hi ku tiva ka nyama, swi tsandza na yena Kriste, loko ngi hi n'wi tivile hi nyama, sweswi a ha ha n'wi tivi hi mukhuva wolowo. 17Hikwalaho, loko munhu a ri eka Kriste, i xivumbiwa lexintshwa; swa khale swi herile; hinkwaswo swi sasekisiwile.
18Kutani hinkwaswo swi huma eka Xikwembu lexi hi hlanganiseke na xona ha Yesu Kriste, xi nga xona lexi hi nyikeke ntirho wa ku hlanganisa. 19Hikuva Xikwembu a xi ri eka Kriste, loko xi hlanganisa misava na xona, hi leswi vanhu va nga ha hlayeriwiki swidyoho swa vona kutani xi nghenise eka hina marito ya ku hlangana. 20Hi tintsumi ta Kriste, kutani va nga ku, i Xikwembu lexi mi khongotelaka ha hina; ha mi khongotela hikwalaho ka Kriste, hi ri: 21Hlanganani na Xikwembu! Hikuva la nga tivangiki xidyoho, Xikwembu xi n'wi endle xidyoho hikwalaho ka hina, hi ta hlayiwa ha yena lava lulameke emahlweni ka Xikwembu.
