2 VAKORINTO 13

₁Leri i ra vunharhu ndzi taka eka n'wina. Timhaka hinkwato ti ta tiya hi milomu ya timbhoni timbirhi, hambi ti ri tinharhu. ₂A ndzi tshama ndzi mi byela eku sunguleni, ni sweswi ndza ha mi byela ra vumbirhi, ndzi ku: Kukota leswi ndzi tshamaka ndzi endla eka n'wina loko ndzi ri kona, kambe sweswi a ndzi nga ri kona, ndzi tsalela lava dyoheke eku sunguleni, ni van'wana hinkwavo, leswaku, loko ndzi tlhela ndzi ta, ndzi nga ka ndzi nga ha tsetseleri munhu, ₃hi leswi mi lavaka ku tiva loku tiyisiwaka, leswaku Kriste u vulavula ha mina, kasi yena a nga tsananga exikarhi ka n'wina, kambe u ni matimba etimbilwini ta n'wina. ₄Hikuva hambi a tshama a vambiwa eku tsaneni, sweswi wa hanya hi matimba ya Xikwembu; kutani na hina hi karhi ha tsana na yena, kambe hi ta hanya na yena hi matimba ya Xikwembu exikarhi ka n'wina.

₅Tianakanyeni mi ri n'wina, mi ta vona loko mi ri eku pfumeleni; tikambeleni mi ri n'wina, a mi swi anakanyi leswaku Yesu Kriste u le ka n'wina xana? Loko swi nga ri leswaku kumbexana mi ri lava nga tiki amukeriwaka. ₆Kambe ndza tshemba leswaku, loko hi ri hina, mi ta tiva leswaku hi ta amukeriwa. ₇Kambe ndzi khongela Xikwembu leswaku mi nga tshuki mi endla swo biha ni switsongo, swi nga ri leswaku ngi hina hi khensiwa, kambe hi leswaku n'wina mi endla swinene, hambi hina hi nga va leswo ngi, hi aleriwa. ₈Hikuva a hi na matimba ya ku alela ntiyiso, kambe hi na wona ntsena ku yimela ntiyiso. ₉Hi tsakile loko hi ri karhi hi tsana; kutani leswi hi swi kombelaka, i ku hetiseka ka n'wina. ₁₀Hikwalaho-ke ndzi tsalaka timhaka leti, ndzi nga si ta eka n'wina leswaku siku ndzi fikaka, ndzi nga ti endla hi ku nonon'hwa hi matimba lawa Hosi yi ndzi nyikeke wona ku akisa, ku nga ri ku hangalasa.

₁₁Eku heteleleni, vamakwerhu, ndzi ri: Titsakeleni, tilaveleni ku hetiseka, mi chavelelana; mi va ni ku anakanya kun'we; mi tshama hi ku rhula; kutani Xikwembu xa rirhandzu ni xa ku rhula xi ta va na n'wina.

₁₂Xewetanani hi ku ntswontswana loku tengeke. Vahlawuriwa hinkwavo va mi rungula.

₁₃Tintswalo ta Hosi ya hina, Yesu Kriste, ni rirhandzu ra Xikwembu, ni ku hlangana ka Moya lowo Kwetsima, a xi ve na n'wina hinkwenu. Amen!