2 TIKRONIKA 9

₁Hosi ya wansati ya Xeba, kuteloko yi yingisile ku twala ka Solomoni, yi ta eYerusalema, ku ringa Solomoni hi mawetana; yi ta yi ri ni vanhu lavo tala ngopfu, ni tikamela leti rhwalaka mirhi ya risuna, ni nsuku wa ku tala, ni maribye ya risima. A ta eka Solomoni, kutani a n'wi byela hinkwaswo leswi ngi swi ri embilwini ya yena. ₂Solomoni a n'wi hlamusela swivutiso swa yena hinkwaswo; a ku vanga ni xilo xin'we lexi fihleriweke Solomoni, lexi a nga n'wi hlamuselangiki.

₃Hosi ya wansati ya Xeba yi vona vutlhari bya Solomoni, ni yindlu leyi a yi akeke, ₄ni swakudya swa tafula ra yena, ni tindlu ta malandza ya yena ni yindlu ya tindhuna ta yena, ni tinguvu ta tona, ni vatameri va mindzheko ya yena, ni tinguvu ta vona, ni ndlela yo tlhandluka leyi va tlhandlukaka ha yona endlwini ya Yehovha, kutani a va ni mahika, a ku eka hosi: ₅“Hi tona kunene leti ndzi ti tweke etikweni ranga, ta ku vulavula ka wena, ni ta vutlhari bya wena! ₆Kambe a ndzi pfumelanga leswi va swi vulaka, ndzi ko ndzi ta, ndzi swi vona hi mahlo ya mina. Kutani waswivo, a va ndzi byelanga hafu ya vukulu bya vutlhari bya wena; u tlula hinkwaswo leswi ndzi swi tweke. ₇Ku katekile vanhu va wena! Ku katekile malandza ya wena lawa, lama yimaka hi masiku emahlweni ka wena, lama yingisaka vutlhari bya wena! ₈A ku khensiwe Yehovha, Xikwembu xa wena, la titsakeleke ha wena ku ku veka exiluvelweni xa wena ku va hosi hi vito ra Yehovha, Xikwembu xa wena! Hikuva Xikwembu xi rhandzile Israele ku n'wi hanyisa hi masiku, kutani xi ku vekile hosi ehenhla ka vona ku lulamisa timhaka ni ku avanyisa.”

₉Kutani a nyika hosi titalenta ta nsuku ta 120, ni mirhi ya risuna leyi teleke ngopfu, ni maribye ya risima. A ka ha vanga na mirhi ya risuna kukotisa leyi hosi ya Xeba yi yi nyikeke hosi Solomoni.

₁₀Malandza ya Hiramu ni malandza ya Solomoni, lama nga tisa nsuku wa Ofiri ma tisile ni mirhi ya sandal, ni maribye ya risima. ₁₁Hosi yi endlela yindlu ya Yehovha ni yindlu ya hosi swibiyelo hi murhi wa sandal, ni tiharipa, ni magubu ya swiyimbeleri. A va vonanga, ni siku ni rin'we, murhi lowotano etikweni ra Yuda.

₁₂Hosi Solomoni a nyika hosi ya wansati ya Xeba hinkwaswo leswi yi swi naveleke, ni hinkwaswo leswi yi swi kombeleke, ehandle ka leswi a yi nyikeke ematshan'weni ya leswi yi swi tiseleke hosi. Kutani yi tlhela yi muka etikweni ra yona ni malandza ya yona.

₁₃Ku tika ka nsuku lowu tshamaka wu fikela hosi Solomoni hi lembe rin'wana ni rin'wana, a ku ri ka titalenta ta 666 ta nsuku, ₁₄ehandle ka leswi a swi kumeke hi vapindzuri, ni vaxavisi, ni tihosi hinkwato ta Arabiya, ni tindhuna ta tiko leti tiselaka Solomoni nsuku ni silivhere.

₁₅Hosi Solomoni a endla switlhangu leswikulu swa 200 swa nsuku lowu furiweke, xitlhangu xin'wana ni xin'wana xi furiwa hi tixikele ta 600 ta nsuku, ₁₆a endla ni switlhangu leswitsongo swa 300 swa nsuku lowu furiweke, xitlhangu xin'wana ni xin'wana xi endliwa hi tixikele ta 300 ta nsuku; kutani hosi yi swi veka endlwini ya xihlahla xa Lebanoni.

₁₇Hosi yi endla ni xiluvelo lexikulu xa timhondzo ta tindlopfu, a xi nameka hi nsuku lowunene. ₁₈Xiluvelo lexi a xi ri ni swikhandziyo swa ntlhanu na xin'we, ni vunavelo bya nsuku; a swi hlanganisiwa ni xiluvelo; a ku ri ni mavoko ematlhelweni mambirhi ya xitshamo; tinghala timbirhi a ti yimile ekusuhi ni mavoko, ₁₉tinghala tin'wana ta khume na timbirhi a ti ri kona eswikhandziyeni swa ntlhanu na xin'we, ematlhelweni mambirhi. Xilo lexotano a xi endleriwanga vuhosi byin'wana ni siku ni rin'we.

₂₀Swinwelo hinkwaswo swa hosi Solomoni a swi ri swa nsuku, ni swibya hinkwaswo swa yindlu ya xihlahla xa Lebanoni a swi ri swa nsuku lowunene. A ku vanga na xibya xin'we xa silivhere; emasikwini ya Solomoni a ku vuriwanga nchumu hi silivhere. ₂₁Hikuva hosi a yi ri ni tingalava leti yaka eTarxixi ni malandza ya Hiramu; kan'we hi malembe manharhu, tingalava ta Tarxixi a ti fika, ti tisa nsuku, ni silivhere, ni timhondzo ta tindlopfu, ni tifenhe, ni tiphikoko (mapavawu).

₂₂Hosi Solomoni a a tlula hi rifuwo ni vutlhari, tihosi hinkwato ta misava. ₂₃Kutani tihosi hinkwato ta misava a ti lava ku vona Solomoni ku yingisa vutlhari bya yena, lebyi Xikwembu xi byi vekeke embilwini ya yena. ₂₄Yin'wana ni yin'wana yi tisa nhlengo wa yona yi ri mitirho ya silivhere ni ya nsuku ni tinguvu, ni matlhari, ni mirhi ya risuna, ni tihanci, ni timula; a swi ri sweswo lembe rin'wana ni rin'wana.

₂₅Solomoni a a ri ni swidyelo swa tihanci swa 4 000, ni tigolonyi ni vakhandziyi va tihanci va 12 000; a va veka emitini ya tigolonyi, ni kusuhi ni hosi eYerusalema. ₂₆A a fuma ehenhla ka tihosi hinkwato, ku suka enambyeni, ku fika etikweni ra Vafilista, ni le ndzilakaneni wa Egipta.

₂₇Hosi yi endla leswaku silivhere yi fana ni maribye eYerusalema, ni mirhi ya kedari yi tala kukotisa mikuwa leyi milaka erivaleni. ₂₈Solomoni a a laveriwa tihanci eEgipta, ni le matikweni hinkwawo.

₂₉Leswi seleke swa timhaka ta Solomoni, leto sungula ni leta ku hetelela, xana a ti tsariwanga ebukwini ya Natani, muprofeta, ni le bukwini ya vuprofeta bya Ahiya wa Xilo, ni le ku hlavuteleni ka Ido, muprofeta, la bvumbheke timhaka ta Yerobuwamu, n'wana Nebati xana?

₃₀Solomoni a fuma eYerusalema, ehenhla ka Vaisraele hinkwavo, hi malembe ya mune wa makume. ₃₁Kutani Solomoni a etlela ni vatata wa yena, va n'wi lahla emutini wa Davhida, tata wa yena; kutani Rhobuwamu, n'wanakwe, a fuma ematshan'weni ya yena.