2 TIKRONIKA 8

₁Loko ku hundzile malembe ya makume mambirhi, lawa Solomoni a akeke yindlu ya Yehovha ni yindlu ya yena ha wona, ₂Solomoni a aka miti leyi Hiramu a yi nyikeke Solomoni, a akisa kona vana va Israele.

₃Solomoni a ya hlasela Hamata na Soba, a wu hlula. ₄Kutani a aka Tadimora, emananga, ni miti hinkwayo ya vuhlayiselo leyi a yi akeke etikweni ra Hamata. ₅A aka na Bet-Horoni wa le henhla, na Bet-Horoni wa le hansi, ma ri makhokholo lawa ngi ma ri ni rirhangu, ni timbanti ni tinghole, ₆na Baalata ni miti hinkwayo ya vuhlayiselo leyi ngi yi ri ya yena, ni miti hinkwayo ya tigolonyi, ni miti ya vakhandziyi va tihanci, ni hinkwaswo leswi Solomoni a rhandzeke ku swi aka eYerusalema ni le Lebanoni ni le tikweni hinkwaro ra ku fuma ka yena.

₇Vanhu hinkwavo lava seleke va Vahiti, ni Vaamori, ni Vaperesi ni Vahivhi, ni Vayebusi lava nga riki Vaisraele, ₈vatukulu va vona lava seleke endzhaku ka vona etikweni (hikuva vana va Israele a va va hetanga), Solomoni a va rhamba, va va vanhu va xibalo ku fika ni namuntlha. ₉Kambe Solomoni a nga endlanga vana va Israele makhumbi ku tirha mitirho ya yena, hikuva a va ri vanhu va nyimpi, ni tindhuna ta yena, ni tindhuna ta lava lwaka hi tigolonyi, ni ta lava khandziyaka tihanci.

₁₀Hi wona ntsengo wa tindhuna ta valanguteri lava vekiweke hi hosi Solomoni; a va ri va 250 lava ngi va ri ni ntirho wa ku langutela tiko. ₁₁Solomoni a fambisa n'wana Faro endlwini leyi a n'wi akeleke, a huma emutini wa Davhida, hikuva a a ku: “Nsati wa mina a nga ka a nga aki endlwini ya Davhida, hosi ya Israele, hikuva tindhawu leti areka ya Yehovha yi ngheneke eka tona ti kwetsimile.”

₁₂Kavaloko Solomoni a humesela Yehovha tiholokosta ealitarini ya Yehovha leyi a yi akeke emahlweni ka nyangwa; ₁₃a humesa magandzelo ya siku rin'wana ni rin'wana, hilaha Muxe a leriseke hakona, ma ri ya Tisavata, ni ya tin'weti letintshwa, ni ya mikhuvo, kanharhu hi lembe, enkhubyeni wa swinkwa leswo kala comela, ni le nkhubyeni wa mavhiki, ni le nkhubyeni wa mitsonga. ₁₄Kutani a veka, hi ku lerisa ka Davhida, tata wa yena, mitlawa ya vaprista emitirhweni ya yona, ni Valevhi emitirhweni ya vona, ku dzunisa Yehovha ni ku tirha mitirho ya vona emahlweni ka vaprista siku rin'wana ni rin'wana; a veka ni valanguteri va tinyangwa, hi mitlawa ya vona enyangweni yin'wana ni yin'wana hikuva a ku ri ku lerisa ka Davhida, munhu wa Xikwembu. ₁₅A va hambukanga eku leriseni ka hosi etimhakeni ta vaprista, ni ta Valevhi, ni ta xuma.

₁₆Ntirho hinkwawo wa Solomoni wu lunghisisiwa xisweswo ku fika siku masungulo ya yindlu ya Yehovha ma sunguriweke ku akiwa ha rona, ni ku fika siku leri yi hetisiweke ha rona; yindlu ya Yehovha yi hetisisiwa xisweswo.

₁₇Kavaloko Solomoni a ya Esiyoni-Gebere na Eloto, eribuwini ra lwandle, etikweni ra Edomu. ₁₈Kutani Hiramu a n'wi rhumela hi malandza ya yena tingalava, ni malandza lama tivaka lwandle va ya eOfiri, ni malandza ya Solomoni, va teka kona titalenta ta nsuku ta 450, leti va ti tiselaka hosi Solomoni.