2 TIKRONIKA 27

₁Yotamu a a ri wa malembe ya 25 loko a sungula ku fuma, a fuma malembe ya 16 eYerusalema; vito ra mana wa yena a a ri Yeruxa, n'wana Sadoki. ₂A endla leswi lulameke emahlweni ka Yehovha, hinkwaswo hilaha Uziya, tata wa yena a endleke hakona; ntsena a nga nghenanga etempeleni ya Yehovha. Kambe tiko ri ya emahlweni hi ku dyoha. ₃Hi yena la nga aka nyangwa leyi tlakukeke ya yindlu ya Yehovha, a endla ni mitirho leyikulu erirhangwini ra Ofele. ₄A aka miti entshaveni ya Yuda; a aka ni tindlu ta vuhosi, ni makhokholo eswihlahleni. ₅A lwa ni hosi ya vana va Amoni, kutani a va hlula. Vana va Amoni va n'wi nyika lembe lero titalenta ta dzana ta silivhere, ni tikore ta 10 000 ta koro, ni ta 10 000 ta barley; vana va Amoni va humesa ndzuvo wolowo hi lembe ra vumbirhi ni ra vunharhu. ₆Yotamu a kuma matimba hikuva a tshama a famba emahlweni ka Yehovha, Xikwembu xa yena.

₇Leswi seleke swa timhaka ta Yotamu, ni tinyimpi hinkwato ta yena, ni mitirho hinkwayo ya yena, maswivo, swi tsariwile ebukwini ya tihosi ta Israele ni ta Yuda. ₈A a ri wa malembe ya 25 loko a sungula ku fuma, kutani a fuma malembe ya 16 eYerusalema. ₉Yotamu a etlela ni vatata wa yena, va n'wi lahla emutini wa Davhida; kutani Akazi, n'wana wa yena a fuma ematshan'weni ya yena.