Ta Asa loko a endla xinakulobye ni hosi ya Siriya.
1Hi lembe ra 36 ra ku fuma ka Asa, Baaxa, hosi ya Israele, a tlhandlukela etikweni ra Yuda, a aka Rhama leswaku a ta sivela vanhu va Asa, hosi ya Yuda, ku huma ni ku nghena. 2Kavaloko Asa a humesa silivhere ni nsuku exumeni xa yindlu ya Yehovha ni xa yindlu ya hosi, kutani a swi rhumela Bene-Hadada, hosi ya Siriya, la akeke eDamaska, a ku: 3“Ku ni xinakulobye exikarhi ka mina na wena, ni le xikarhi ka tatana ni tata wa wena. Waswivo, ndzi ku rhumela silivhere ni nsuku; famba u onha xinakulobye xa wena, na Baaxa, hosi ya Israele, leswaku a ndzi sukela.” 4Bene-Hadada a yingisa hosi Asa, kutani a rhuma tindhuna ta nyimpi ya yena ku ya lwa ni miti ya Israele va hlasela Iyoni, na Dani, na Avele-Mayimi, ni tindlu hinkwato ta matlhari ta miti ya Neftali. 5Baaxa, kuteloko a swi twile, a tshika ku aka Rhama, a tshika ni mitirho ya yena. 6Hosi Asa a vitana va Yuda hinkwavo, kutani va ya teka maribye ya Rhama ni timhandze leti Baaxa a akeke ha tona, va aka Geba na Mispa ha swona.
7Enkarhini wolowo, Hanani, muvoni, a ta eka Asa, hosi ya Yuda, a ku eka yena: “Leswi u tshembeke hosi ya Siriya, u nga tshembangiki Yehovha, Xikwembu xa wena, hikwalaho ka swona, nyimpi ya hosi ya Siriya yi chupukile emavokweni ya wena. 8Xana nyimpi ya Vaetiyopiya ni Valibiya a yi vanga leyikulu ngopfu, va ri ni vunyingi lebyikulu ngopfu bya tigolonyi ni vakhandziyi va tihanci xana? Kambe leswi u tshembeke Yehovha, u va nyiketile emavokweni ya wena. 9Hikuva mahlo ya Yehovha ma fambafamba emisaveni hinkwayo ku tiyisa lava nga va yena hi timbilu hinkwato ta vona. U endlile hi vuhunguki emhakeni leyi, hikuva ku sungula sweswi, u ta va ni tinyimpi.” 10Kavaloko Asa a karihela muvoni, a n'wi nghenisa ekhotsweni, hikuva a a n'wi karihele emhakeni leyi. Enkarhini wolowo Asa a xanisa van'wana va tiko.
11Timhaka ta Asa, leto sungula ni ta ku hetelela, ti tsariwile ebukwini ya tihosi ta Yuda ni ta Israele. 12Hi lembe ra 39 ra ku fuma ka yena, Asa a vabya hi milenge, hi vuvabyi lebyo leva ngopfu, kambe ni le vuvabyini bya yena, a nga lavanga Yehovha, kambe a lava tin'anga.
13Asa a etlela ni vatata wa yena, a fa hi lembe ra 41 ra ku fuma ka yena, 14va n'wi lahla esirheni leri a ticeleleke rona emutini wa Davhida. Va n'wi lata esangwini leri teleke hi mirhi ya risuna, ni tinxaka hinkwato ta mirhi leyi hlanganisiweke hi vutlhari; kutani va n'wi hisela mirhi ya risuna ya ku tala ngopfu.
