2 TIKRONIKA 12

₁Vuhosi bya Rhobuwamu, kuteloko byi tiyisiwile, ni loko a tiyile matimba, a tshika nawu wa Yehovha swin'we ni Vaisraele hinkwavo.

₂Hi lembe ra vuntlhanu ra hosi Rhobuwamu, Xixaka, hosi ya Egipta, a tlhandluka ku ta hlasela Yerusalema, hikuva a va dyohele Yehovha. ₃A a ri ni tigolonyi ta 1 200, ni vakhandziyi va tihanci va 60 000, ni nyimpi leyi nga ta na yena ku suka eEgipta a yi ri leyikulu ngopfu, va ri Valibiya, ni va Suka, na Vaetiyopiya. ₄A teka miti ya makhokholo leyi ngi yi ri ya Yuda, kutani a fika eYerusalema.

₅Kavaloko Xemaya, muprofeta, a ya eka Rhobuwamu ni ka tindhuna ta va Yuda leti hlengeletaneke eYerusalema, hi ku chava Xixaka, a ku eka vona: “Yehovha u vurisa sweswo, a ku: ‘Mi ndzi tshikile; na mina ndzi mi tshikile emavokweni ya Xixaka.’ ” ₆Kutani tindhuna ta Israele ni hosi, va titsongahata, va ku: “Yehovha u lulamile!” ₇Kuteloko Yehovha a vonile leswaku va titsongahata, rito ra Yehovha ri ta eka Xemaya, ri ku: “Va titsongahatile; ndzi nga ka ndzi nga va heti, kambe sweswi, ndzi ta va ponisa, kutani vukari bya mina byi nga ka byi nga teli Yerusalema ha Xixaka; ₈kambe va ta n'wi tirhela, va ta tiva leswaku i yini ku ndzi tirhela, kumbe ku tirhela vuhosi bya matiko man'wana.”

₉Xixaka, hosi ya Egipta, a tlhandlukela eYerusalema, kutani a teka xuma xa yindlu ya Yehovha, ni xuma xa yindlu ya hosi; a teka hinkwaswo. A teka ni switlhangu swa nsuku leswi endliweke hi Solomoni. ₁₀Hosi Rhobuwamu a endla ematshan'weni ya swona switlhangu swa koporo, kutani a swi veka emavokweni ya tindhuna ta vatsutsumi lava hlayisaka nyangwa ya yindlu ya hosi. ₁₁Emikarhini hinkwayo leyi hosi yi nghenaka endlwini ya Yehovha, vatsutsumi va ta, va swi tamela, kutani va tlhela va ya swi veka endlwini ya vatsutsumi.

₁₂Kambe leswi Rhobuwamu a titsongahateke, Yehovha a tlherisa vukari bya yena, a nga n'wi hetelanga makumu; kambe a ku ri ni swilo leswinene etikweni ra Yuda.

₁₃Hosi Rhobuwamu a titiyisa Yerusalema, a fuma kona. Rhobuwamu a a ri ni malembe ya 41 loko a sungula ku fuma, kutani a fuma malembe ya 17 eYerusalema, muti lowu Yehovha a wu hlawuleke etinxakeni hinkwato ta Israele ku veka vito ra yena kona. Vito ra mana wa yena a a ri Naama wa ka Amoni. ₁₄A endla leswo biha, hikuva a nga lavanga Yehovha hi mbilu hinkwayo ya yena.

₁₅Timhaka ta Rhobuwamu, leto sungula ni ta ku hetelela, xana a ti tsariwanga etimhakeni ta Xemaya, muprofeta, ni ta Ido, muvoni, tibukwini ta mavito ya tinyimba ta tiko xana?

Emikarhini hinkwayo ku lwa a ku ri kona exikarhi ka Rhobuwamu na Yerobuwamu.

₁₆Rhobuwamu a etlela ni vatata wa yena, a lahliwa emutini wa Davhida. Kutani Abiya, n'wanakwe, a fuma ematshan'weni ya yena.