1 TIMOTIYA 5

₁U nga holoveri xidyuhati hi matimba, kambe u n'wi khongotela kukotisa loko a ri tata wa wena; lavantshwa, va khongotele kukotisa vamakwenu; ₂vavasati lava dyuhaleke, kukotisa vamana wa wena; lavantshwa, kukotisa vamakwenu va xisati, eku tengeni hinkwako.

₃U va ni xichavo eka tinoni leti nga tinoni ta xiviri. ₄Kambe loko yi ri noni leyi nga ni vana, kumbe vatukulu, a va dyondze eku sunguleni ku hlayisa va yindlu ya vona, ni ku endlela vatswari va vona hilaha va nga endleriwa hakona, hikuva i xilo lexi amukelekaka emahlweni ka Xikwembu. ₅Loko yi ri noni ya xiviri leyi siyiweke yi ri yoxe, a yi langutele Xikwembu, kutani yi tiyisela eswikhongelweni vusiku ni nhlekanhi. ₆Kambe la hanyaka hi ku titsakela hi swa misava, u file, hambi a ha hanya. ₇U va khongotela hakona leswaku va pfumala xisandzu. ₈Loko un'wana a nga hlayisi varikwavo, ngopfu va yindlu ya yena, u landzurile ku pfumela, u tlula hi ku biha la nga pfumeriki.

₉Wansati wa noni la tsariwaka ebukwini, u fanele ku va a hetile malembe ya ntlhanu wa makume na khume rin'we, a tekiwile hi nuna un'we ntsena, ₁₀a va ni vumbhoni bya leswaku u ni mitirho leyinene, a wundlile vana va yena, a amukerile vaendzi, ni ku hlantswa milenge ya vakwetsimi, ni ku pfuna lava nga enhlomulweni, ni ku tinyiketa mitirho hinkwayo leyinene. ₁₁Kambe u ala tinoni letintshwa; hikuva loko ku navela ku va tsuvisa Kriste, va rhandza ku tekiwa, ₁₂va nghena eku avanyisiweni hi ku endla ku pfumela ka vona loko rhanga swahava. ₁₃Na swona leswi va lolohaka, va tolovela ku hungasela etindlwini hinkwato; kambe a va lolohi ntsena, va ni ku vulavula ngopfu, va tinghenisa etimhakeni leti nga riki ta vona, va vulavula leswi nga faneriki. ₁₄Hikwalaho, ndzi rhandza leswaku lavantshwa va tekiwa, va veleka vana, va risa tindlu ta vona, va nga tshuki va nyika mukaneti nkarhi, ni lowutsongo, wa ku hleva. ₁₅Ni sweswi, van'wana va tlhelele endzhaku ku landza Satana.

₁₆Loko mupfumeri wa wanuna a ri kona, kumbe wa wansati, la nga ni tinoni, a a va hlayise, kereke yi nga tshuki yi tikeriwa hi vona, yi ta tiva ku pfuna lava nga tinoni hi xiviri.

₁₇Vakulukumba lava risaka swinene a va faneriwe hi ku dzunisiwa kambirhi; ngopfu lava tirhaka hi matimba eritweni ni le ku dyondziseni. ₁₈Hikuva na rona Tsalwa ri te: “U nga tshuki u siva nomu wa homu loko yi hula.” Kambe na swona ri te: “Mutirhi u faneriwa hi hakelo ya yena.” ₁₉U nga tshuki u amukela rito ra ku hehla nkulukumba, loko timbhoni timbirhi, kumbe tinharhu ti nga ri kona. ₂₀Lava dyohaka, u va holovela emahlweni ka hinkwavo, van'wana va ta tiva ku chava.

₂₁Ndzi ku lerisa emahlweni ka Xikwembu, ni ka Yesu Kriste, ni ka tintsumi leti hlawuriweke, leswaku timhaka leti u ti hlayisa, u nga avanyisi hi nhloko ya wena, u nga tshuki u endla nchumu hi ku ya hi nghohe.

₂₂U nga hatlisi ku tlhandleka mavoko ehenhla ka munhu; kambe u nga ngheni eku dyoheni ka van'wana; u tihlayisa u ri la tengeke.

₂₃U nga engeti u nwa mati ntsena, kambe u tipfuna hi vhinyonyana, hikwalaho ka le ndzeni ka wena, ni ku vabyanyana loku andzeke eka wena. ₂₄Vudyoho bya vanhu van'wana byi le rivaleni, byi va rhangela emahlweni eku avanyiseni; kambe bya van'wana byi va landza endzhaku. ₂₅Kambe na yona mitirho yo saseka ya van'wana, yi le rivaleni kambe na yona leyi nga riki tano, yi nga ka yi nga fihliwi.