1 TIMOTIYA 4

₁Kambe Moya wu vurisile leswaku emikarhini ya le ndzhaku, van'wanyana va ta tlhela eku pfumeleni, va namarhela mimoya leyi kanganyisaka, ni tidyondzo ta mademona, ₂hi ku ya hi ku kanganyisa ka vafundhisi lavo hemba, lava mapfalo ya vona ma feke, lava nga ta sivela vanhu ku tekana; ₃va ku: A ku tshikiwe swakudya leswi Xikwembu xi swi vumbeleke lava pfumeleke ni lava tivaka ntiyiso, leswaku va xi amukela hi ku khensa; ₄hikuva hinkwaswo leswi vumbiweke hi Xikwembu swi sasekile, kambe a ku na nchumu lowu faneleke ku cukumetiwa loko wu amukeriwa hi ku khensa; ₅hikuva hinkwaswo swi kwetsimisiwile hi rito ra Xikwembu ni xikhongelo.

₆Loko u hlamusela timhaka leti, u ta va nandza lonene wa Yesu Kriste, ni la kurisiweke hi marito ya ku pfumela, ni dyondzo leyinene, leyi u yi landzeleleke swinene. ₇Kambe u ala timhaka ta swahava, ni mitsheketo ya swidyuhati, u titiyisa evukhongerini. ₈Hikuva ku titiyisa emirini swa pfunanyana; kambe vukhongeri byi pfuna hinkwako, byi ni ku tshembisa ka vutomi bya sweswi ni ka lebyi nga ta ta. ₉Mhaka leyi yi tiyile, yi fanele ku amukeriwa swinene. ₁₀Hikuva, hikwalaho ka yona, a hi chavi mikarhalo ni ku sandziwa, hikuva hi langutele Xikwembu lexi hanyaka, a nga Mulondzovoti wa vanhu hinkwavo, ngopfu wa lava pfumelaka. ₁₁Letela vanhu timhaka leti, u va dyondzisa tona.

₁₂Ku nga tshuki ku va ni la tsan'waka vuntshwa bya wena, kambe u va wena xikombiso xa vapfumeri, eku vulavuleni, ni le ku tihanyeleni, ni le rirhandzwini, ni le ku pfumeleni, ni le ku tengeni. ₁₃U tinyiketa ku hlaya, ni ku khongotela, ni ku dyondzisa, ndzi ko ndzi ta. ₁₄U nga rivali nyiko leyi u nga na yona, leyi u yi nyikiweke hi ku bvumbha, hi ku tlhandleka ka mavoko ya nhlengeletano ya vakulukumba. ₁₅Anakanya timhaka leti, u va eka tona, leswaku ku ya emahlweni ka wena ku voniwa hi vanhu hinkwavo. ₁₆U tilangutela, wena, ni ku dyondzisa ka wena, kutani u tiya kona, hikuva loko u endlisa sweswo, u ta tihanyisa; u ta hanyisa ni lava ku yingisaka.