Ku khongelela hinkwavo.
1Hikwalaho, ndza mi khongotela emahlweni ka hinkwaswo, leswaku ku khongela ni ku kombela, ni ku khongelela, ni ku khensa, swi endleriwa vanhu hinkwavo, 2ni tihosi, ni hinkwavo lava nga ni vukulukumba, leswaku hi tihanyela hi ku rhula ni ku tsaka, hi vukhongeri hinkwabyo, ni xichavo. 3Hikuva i xilo lexo saseka lexi amukelekaka emahlweni ya Xikwembu, Mulondzovoti wa hina, 4la rhandzaka leswaku vanhu hinkwavo va hlayiseka, va fika eku tiveni ka ntiyiso; 5hikuva Xikwembu i xin'we ntsena, ni Muhlanganisi i un'we ntsena exikarhi ka vanhu ni Xikwembu, a nga Yesu Kriste, munhu 6la tinyiketeke ku kutsula hinkwavo; hi byona vumbhoni lebyi vekiweke hi nkarhi lowu fanekeleke, 7lebyi ndzi vekiweke muvulavuri ni muapostola hikwalaho ka byona (ndzi vulavula hi ku tiyisa, a ndzi hembi), ndzi mufundhisi wa vamatiko eku pfumeleni ni le ntiyisweni.
8Hikwalaho ndzi rhandza leswaku vavanuna va khongela hinkwako va ri karhi va tlakusa mavoko layo basa, ku nga ri na ku kariha ni ku kanetana.
Vavasati eKerekeni.
9Hi sweswo na vona vavasati, a va ambale tinguvu leti fanekelaka, va tisasekisa hi xichavo, ni ku rhula; ku nga ri hi misisi leyi horhiweke ngopfu, ni nsuku, hambi byi ri vuhlalu, ni tinguvu ta vubombi, 10kambe ku va hi mitirho leyo saseka, hilaha swi lulamelaka hakona vavasati lava tivulaka leswaku va dzunisa Xikwembu.
11Wansati a a dyondze a timiyelela eku yingiseni hinkwako; 12hikuva a ndzi pfumeleri wansati ku dyondzisa, hambi ku ri ku lerisa nuna, kambe u fanele ku tshama a miyerile. 13Hikuva Adamu u rhange a vumbiwa, kutani ndzhaku ku vumbiwa Evha; 14na swona a hi Adamu la kanganyisiweke, kambe i wansati, kuteloko a kanganyisiwile, a wela eku dyoheni. 15Hambiswiritano, u ta ponisiwa hi ku veleka vana, loko a tshama eku pfumeleni, ni le rirhandzwini, ni le ku kwetsimeni, a ri ni ku chava.
