1 SAMIELE 5

₁Vafilista va teka areka ya Xikwembu, va yi susa Ebenezere, va yi yisa eAxidodo. ₂Kuteloko Vafilista va tekile areka ya Xikwembu, va yi nghenisa endlwini ya Dagona, va yi veka ekusuhi na Dagona. ₃Siku leri tlhandlamaka, va Axidodo va pfuka nimixo, kutani maswivo Dagona a wile hansi emombyeni, emahlweni ka areka ya Yehovha; kutani va teka Dagona, va n'wi veka evutshan'weni bya yena. ₄Siku leri tlhandlamaka va Axidodo va pfuka kambe nimixo, kutani maswivo Dagona a wile hansi emombyeni emahlweni ka areka ya Yehovha; nhloko ya Dagona ni mavoko mambirhi ya yena swi tsemekile, swi ri exitulwini xa nyangwa; ku sele miri ntsena. ₅Hikwalaho vaprista va Dagona, hambi va ri hinkwavo lava nghenaka endlwini ya Dagona, eAxidodo, a va kandziyi xitsulu xa yindlu ya Dagona, ku fika namuntlha.

₆Kutani voko ra Yehovha ri tikela va Axidodo, a va nghenisa ekhombyeni a ba va Axidodo ni va matlhelo ya kona hi matshumba. ₇Va Axidodo kuteloko va vonile swoleswo, va ku: “Areka ya Xikwembu xa Israele yi nga ka yi nga tshami ka rikwerhu, hikuva voko ra xona ri hi tikela ngopfu, hina na Dagona, Xikwembu xa hina.” ₈Kavaloko va rhuma vanhu, va ya vitana tindhuna hinkwato ta Vafilista, va ku: “Hi ta endla yini hi areka ya Xikwembu xa Israele xana?” Kutani va ku: “Areka ya Xikwembu xa Israele a yi heleketiwe Gati,” kutani va heleketa areka ya Xikwembu xa Israele kona. ₉Kuteloko va yi heleketile kona, voko ra Yehovha ri va henhla ka muti: khombo lerikulu ri va kona, ri ba vanhu va muti, ku suka eka lavatsongo, ku yisa eka lavakulu; kutani matshumba ma humelela emirini wa vona. ₁₀Kutani va rhuma areka ya Xikwembu eEkroni. Kakuloko areka ya Xikwembu yi nghena eEkroni, va huwelela, va ku: “Va fikisile areka ya Xikwembu xa Israele eka hina, ku hi dlaya hina ni tiko ra hina.” ₁₁Kutani va rhuma vanhu ku ya hlengeleta tindhuna hinkwato ta Vafilista, va ku: “Tlherisani areka ya Xikwembu xa Israele, yi muka ekaya ka yona, yi nga tshuki yi hi dlaya, hina ni tiko ra hina.” Hikuva ku chava ka rifu a ku wele emutini hinkwawo; voko ra Xikwembu a ri wu tikela ngopfu. ₁₂Vanhu lava nga siki faka, a va vavisiwa hi matshumba, kutani huwa ya muti a yi tlhandluka ku fika etilweni.