1 SAMIELE 31

₁Vafilista va pfuka Israele, kutani vanhu va Israele va tsutsuma emahlweni ka Vafilista, va wa va tlhaviwile entshaveni ya Gilibowa. ₂Vafilista va chivirika ku landza Sawulo ni vana va yena; kutani va tlhava Yonatani, na Abinadaba, na Maliki-Xuwaka, vana va Sawulo. ₃Ku lwa a ku hisa laha ku nga na Sawulo, vacopi va vurha va fika eka yena, kutani a hlongorisiwa ngopfu hi vacopi va vurha. ₄Kutani Sawulo a ku eka mutameri wa matlhari ya yena: “Hlomula banga ra wena u ndzi tlhava ha rona, leswaku lava nga yimbangiki va nga tshuki va ta ndzi tlhava, va tlanga ha mina.” Kambe mutameri wa matlhari ya yena a nga pfumelanga, hikuva a a chavile ngopfu. Kavaloko Sawulo a teka banga ra yena, a titlhava ha rona. ₅Kakuloko mutameri wa matlhari a vona leswaku Sawulo a file, a titlhava na yena hi banga ra yena, kutani a fa na yena. ₆Hi siku rolero ku file Sawulo swin'we ni vana va yena va vavanuna vanharhu, ni mutameri wa matlhari ya yena, ni vanhu va yena hinkwavo. ₇Va Israele lava akeke etlhelo ra haleno ra rivala, ni tlhelo ra haleno ra Yordani, kakuloko va vona leswaku vavanuna va Israele va tsutsumile, ni leswaku Sawulo ni vana va yena lavanharhu va file, va tshika miti ya vona, va tsutsuma. Kutani Vafilista va ta aka eka yona.

₈Siku leri tlhandlamaka, Vafilista va ta ku hluvula lava dlayiweke, kutani va kuma Sawulo ni vana va yena lavanharhu va weke entshaveni ya Gilibowa. ₉Kutani va n'wi tsemela nhloko, va teka matlhari ya yena, kutani va rhuma etikweni hinkwaro ra Vafilista ku vika timhaka etindlwini ta swifaniso swa swikwembu swa vona, ni le xikarhi ka tiko. ₁₀Va veka matlhari ya yena endlwini ya Astarte, kutani va hayeka ntsumbu wa yena erirhangwini ra Beta-Xani.

₁₁Vaaki va Yabexe wa Giliyadi va twa leswi Vafilista va swi endleleke Sawulo, ₁₂kutani vavanuna hinkwavo lava tiyeke va pfuka, va famba vusiku hinkwabyo, va ya hlawula mitsumbu ya Sawulo ni ya vana va yena erihlampfini ra Beta-Xani; kutani va tlhelela eYabexe va yi hisa kona. ₁₃Kutani va teka marhambu ya vona, va ma yimbela ehansi ka nkanyi wa Yabexe; kutani va titsona swakudya masiku ya ntlhanu na mambirhi.