1 SAMIELE 25

₁Samiele a fa, kutani Vaisraele hinkwavo va hlengeletana, va n'wi rila, va n'wi lahla eRhama, ekaya ka yena. Kavaloko Davhida a suka, a ngirimela emananga ya Parani. ₂EMawoni, a ku ri ni munhu loyi ingi rifuwo ra yena ri le Karmele. Munhu loyi a a fuwile ngopfu; a a ri ni tinyimpfu ta 3 000, ni timbuti ta 1 000, kutani a a yile eKarmele ku tsemela voya bya tinyimpfu ta yena. ₃Vito ra munhu loyi a a ri Nabala, kambe vito ra nsati wa yena a a ri Abigayele. Nsati loyi, a a ri ni ku twisisa, a a sasekile, kambe nuna wa yena a a ri munhu wo nonon'hwa wa tihanyi. A a ri wa yindlu ya ka Kalebe.

₄Loko a ri emananga, Davhida a twa leswaku Nabala a a tsemela voya bya tinyimpfu ta yena. ₅Kutani Davhida a rhuma majaha ya khume, a ku eka majaha lawa: “Tlhandlukelani eKarmele, mi ya eka Nabala, mi n'wi rungula hi vito ra mina. ₆Mi ta ku eka yena: ‘Hanya swinene, ku rhula a ku ve na wena, ni yindlu ya wena, ni hinkwaswo leswi nga swa wena. ₇Sweswi, ndzi twile leswaku u ni vatsemeri. Sweswi, varisi va wena a va ri na hina, a hi va karhatanga, kutani a va pfumalangi nchumu enkarhini hinkwawo lowu ngi va ri eKarmele. ₈Vutisa malandza ya wena, ma ta ku byela. Majaha lawa, a makume tintswalo emahlweni ka wena, leswi hi fikeke hi siku ro tsaka. Wa nga nyika malandza va wena ni n'wana wa wena Davhida leswi u nga ta swi kuma evokweni ra wena.’ ”

₉Majaha ya Davhida ma fika, kutani ma byela Nabala hi vito ra Davhida marito lawa hinkwawo, kutani ma tshama ma miyela. ₁₀Nabala a hlamula, a ku eka malandza ya Davhida: “Davhida i mani xana, ni n'wana Yese i mani? Emasikwini lawa, malandza ma tele lama balekelaka tihosi ta wona. ₁₁Xana ndzi ta teka vuswa bya mina, ni mati ya mina, ni nyama ya mina, swi ri leswi ndzi swi lunghiseleke vatsemeri va mina, ndzi nyika vanhu lava ndzi nga va tiviki laha va humaka kona?”

₁₂Malandza ya Davhida ma tlhela ma ya byela Davhida timhaka hinkwato leti. ₁₃Kutani Davhida a ku eka vanhu va yena: “Un'wana ni un'wana a a tibohe banga ra yena!” Kutani hinkwavo va hloma, na yena Davhida a hloma. Kutani vanhu lava lavaka ku va 400 va tlhandluka na yena; kambe vanhu va 200 va salela tinhundzu.

₁₄Kambe un'wanyana wa malandza ya Nabala a ya byela Abigayele, nsati wa Nabala, a ku: “Waswivo, Davhida u rhumile tintsumi, ti suka emananga ku ta rungula hosi ya hina, kambe u va karihele. ₁₅Hambiswiritano vanhu lava, va hi endlele hi vunene, a va hi karhatanga, kambe a hi kiyelanga nchumu enkarhini hinkwawo lowu hi nga famba na vona, loko ha ha ri enhoveni. ₁₆A va ri rihlampfu ra hina vusiku ni nhlekanhi, enkarhini hinkwawo lowu ngi hi ri na vona loko hi risa swifuwo. ₁₇Sweswi, anakanya, u vona leswi u nga ta swi endla, hikuva khombo ri kaneriwile ehenhla ka hosi ya hina, ni yindlu ya yena hinkwayo; kambe leswi a nga munhu wa tihanyi ngopfu, hi tsandzeka ku vulavula na yena.”

₁₈Kavaloko Abigayele a hatlisa a teka madzana mambirhi ya swinkwa, ni tinghotsa timbirhi ta vhinyo, ni tinyimpfu ta ntlhanu leti swekiweke, ni swirhundzu swa ntlhanu swa mavele lama oxiweke, ni dzana ra mabuwu ya mihandzu ya vhinya leyi omeke, ni madzana mambirhi ya mabuwu ya makuwa, a swi bohela timbhongolweni. ₁₉Kutani a ku eka malandza ya yena: “Ndzi rhangeleni ndzi ta mi landza.” Kambe a nga n'wi byelanga nchumu Nabala, nuna wa yena. ₂₀Kutani, kuteloko a ngirimela entshaveni, a khandziyile mbhongolo, a famba laha ku tlhumeke, waswivo, Davhida ni vanhu va yena a va ngirimela emahlweni ka yena, kutani a hlangana na vona.

₂₁Kambe Davhida a ku: “Kunene ndzi hlayisile ntsena hinkwaswo leswi munhu loyi a swi fuweke emananga, ku nga kayivelanga nchumu eka leswi a swi fuweke; kutani a ndzi tlherisela ku saseka hi ku biha! ₂₂Xikwembu a xi endle hi matimba ni ku engetelela, eka valala va Davhida, loko eka hinkwaswo swa yena ndzi siya munhu un'we a ha hanya loko dyambu ri huma!”

₂₃Kuteloko Abigayele a vona Davhida, a hatlisa a xika mbhongolweni, a wela ehansi emombyeni, emahlweni ka Davhida, a khinsama. ₂₄Kutani a tiwisa emilengeni ya yena, a ku: “Nandzu wu na mina, hosi yanga. Wa nga pfumelela nandza wa wena ku vulavula na wena; u yingisa marito ya nandza wa wena. ₂₅Hosi yanga yi nga tshuki yi anakanya munhu loyi wa tihanyi, a nga Nabala, hikuva hi rona vito ra yena, kunene Nabala i vito ra yena, ku ni vuhunguki eka yena. Loko ndzi ri mina, nandza wa wena, a ndzi vonanga majaha lawa u ma rhumeke. ₂₆Kutani sweswi, hosi yanga, Yehovha wa hanya, ni moya wa wena wa hanya, Yehovha u ku sivele ku halata ngati ni ku tirihisela hi voko ra wena. Sweswi, valala va wena, ni lava lavelaka hosi yanga swo biha, a va kotise Nabala! ₂₇Sweswi, nhlengo lowu nandza wa wena a wu tiselaka hosi yanga, u nga wu nyika majaha lama landzaka hosi yanga. ₂₈Wa nga rivalela nandza wa wena nandzu, hikuva Yehovha u ta tiyisa kunene yindlu ya hosi yanga, hikuva hosi yanga yi lwa tinyimpi ta Yehovha, kutani ku biha ku nga ka ku nga kumiwi eka wena hi masiku hinkwawo ya wena. ₂₉Loko munhu a pfuka ku ku landzela ni ku lava vutomi bya wena, vutomi bya hosi yanga byi ta hlayiseka eka Yehovha, Xikwembu xa wena, enyandzeni ya vahanyi; loko byi ri vutomi bya valala va wena, u ta byi cukumeta ekule hi xipelupelu. ₃₀Kutakuloko Yehovha a endlele hosi yanga hinkwaswo leswinene leswi a ku hlayeleke swona, ni loko a ku vekile hosi ya Israele, ₃₁a yi nga vi mhaka ya ku khomisa tingana kumbe ya ku khunguvanyisa hosi yanga loko ngi yi halatile ngati ntsena, ni loko hosi yanga yi tirihisele yi ri yona. Kambe kutakuloko Yehovha a katekisile hosi yanga, u ta tsundzuka nandza wa wena.”

₃₂Davhida a ku eka Abigayele: “A ku katekisiwe Yehovha, Xikwembu xa Israele, loyi a ku rhumeke namuntlha ku ta hlangana na mina. ₃₃Kambe a ku katekisiwe ku twisisa ka wena, a ku katekisiwe na wena loyi u ndzi siveleke namuntlha ku halata ngati ni ku tirihisela hi voko ra mina! ₃₄Loko a swi nga ri sweswo, Yehovha, Xikwembu xa Israele, la ndzi siveleke ku ku endla leswo biha, wa hanya, loko u nga hatlisangi ku ta hlangana na mina, a ku nga ti sala nchumu eka Nabala, hambi a ri munhu un'we, dyambu ri nga si huma.”

₃₅Kutani Davhida a amukela evokweni ra yena leswi a n'wi tiseleke. Kutani a ku eka yena: “Tlhela hi ku tsaka endlwini ya wena; languta, ndzi yingisile rito ra wena, ndzi ku tsetselerile.”

₃₆Abigayele a fika eka Nabala, kutani waswivo, a a endla endlwini ya yena xifihlulo kukota xifihlulo xa hosi; kutani mbilu ya Nabala yi tsakile; a pyopyiwile ngopfu; kambe a nga n'wi byelanga nchumu, hambi lexitsongo, hambi lexikulu ri ko ri xa. ₃₇Ni mixo, loko Nabala a xalamukile, nsati wa yena a n'wi vikela timhaka teto, kutani mbilu ya yena yi fa endzeni ka yena, yi fana ni ribye. ₃₈Kuteloko ku hundzile masiku lama lavaka ku va khume. Yehovha a ba Nabala, kutani a fa.

₃₉Davhida a twa leswaku Nabala u file, kutani a ku: “A ku katekisiwe Yehovha la kaneleke mhaka ya mina exisandzwini lexi Nabala a ndzi sandzeke ha xona, kutani a sivele nandza wa yena ku dyoha, Yehovha u tlherisile ku biha ka Nabala enhlokweni ya yena.” Kavaloko Davhida a rhuma vanhu eka Abigayele ku n'wi vutela yena.

₄₀Malandza ya Davhida, kuteloko ma fikile eka Abigayele eKarmele, ma n'wi byela, ma ku: “Davhida u hi rhumele eka wena ku ku teka leswaku u va nsati wa yena.” ₄₁Kutani a pfuka, a khinsama, a ku: “Waswivo, nandza wa wena u ta va khumbi leri nga ta hlantswa milenge ya malandza ya hosi yanga.” ₄₂Kutani Abigayele a hatlisa a pfuka, a khandziya mbhongolo, a landziwa hi vanhwanyana va ntlhanu. A landza tintsumi ta Davhida, kutani a va nsati wa yena.

₄₃Davhida a a tekile na Ahinowama wa Yizriele, kutani havambirhi va ri vasati va yena. ₄₄Kambe Sawulo a a nyikile Palati, n'wana Layixi, wa Galimi, n'wana wa yena, Mikala, nsati wa Davhida.