1 SAMIELE 19

₁Sawulo a vulavula na Yonatani, n'wana wa yena, ni malandza hinkwawo ya yena, a ku: “Ndzi lava ku dlaya Davhida”; kambe Yonatani, n'wana Sawulo, a a rhandza ngopfu Davhida; ₂kutani Yonatani a byela Davhida, a ku: “Tatana Sawulo a lava ku ku dlaya. Sweswi, wanga tivonela nimixo, u tshama exihundleni, u tifihla. ₃Loko ndzi ri mina, ndzi ta huma, ndzi ta yima ekusuhi na tatana, emasin'wini, laha u nga ta va kona; ndzi ta ku vulavulela eka tatana, kutani ndzi ta vona leswi nga swona, ndzi va ndzi ku tivisa.” ₄Yonatani a vulavulela Davhida eka Sawulo, tata wa yena, a ku eka yena: “Hosi yi nga tshuki yi dyohela nandza wa yena, Davhida, hikuva a nga ku dyohelanga, kambe leswi a swi endleke, swi ku pfunile ngopfu. ₅U vekile vutomi bya yena exandleni xa yena loko a dlaya Mufilista, kutani Yehovha u pfunile Vaisraele hinkwavo hi ku pona lokukulu. U swi vonile, kutani u tsakisiwe ha swona. U nga dyohela yini ngati leyi nga riki na nandzu, loko u dlaya Davhida ntsena xana?” ₆Sawulo a yingisa rito ra Yonatani, kutani Sawulo a hlambanya, a ku: “Yehovha wa hanya! A nga ka a nga dlayiwi.” ₇Kavaloko Yonatani a vitana Davhida, a n'wi byela marito hinkwawo lawa, kutani Yonatani a tlherisela Davhida eka Sawulo, kutani a yima emahlweni ka yena, kukotisa khale.

₈Ku lwa ku sunguriwa kambe, kutani Davhida a huma ku ya lwa ni Vafilista, a va hlula swinene, kutani va tsutsuma emahlweni ka yena. ₉Kambe moya lowo biha lowu humaka eka Yehovha wu nghena eka Sawulo loko a tshamisile endlwini ya yena, a ri ni tlhari ra yena evokweni; Davhida a ri karhi a yimba haripa. ₁₀Kutani Sawulo a lava ku tlhava Davhida hi tlhari, a n'wi pfanga ni khumbi; kambe Davhida a bvutama emahlweni ka Sawulo, kutani tlhari ri tlhava khumbi. Kavaloko Davhida a baleka, a tsutsuma hi vusiku byebyo.

₁₁Kutani Sawulo a rhuma vanhu endlwini ya Davhida ku n'wi langutela ni ku n'wi dlaya nimixo. Kambe Mikala, nsati wa Davhida, a n'wi tivisa, a ku: “Loko u nga baleki vusiku lebyi, u ta dlawa nimixo.” ₁₂Kavaloko Mikala a xikisa Davhida, hi fasitere, kutani a tsutsuma a baleka. ₁₃Kutani Mikala a teka terafi a yi veka esangwini, kutani a lunghisa dzovo ra mbuti enhlokweni, a swi funengeta hi nguvu.

₁₄Kutani Sawulo a rhuma vanhu ku ya khoma Davhida, kambe Mikala a ku: “Wa vabya.” ₁₅Sawulo a rhuma kambe vanhu ku ya vona Davhida, a ku: “N'wi tiseni eka mina esangwini, ndzi n'wi dlaya.” ₁₆Tintsumi ti nghena kutani waswivo, terafi a yi ri esangwini, enhlokweni. ₁₇Sawulo a ku eka Mikala: “U ndzi xisele yini hi ku balekisa nala wa mina xana?” Mikala a ku eka Sawulo: “Hi yena a nga te: ‘Ndzi tshike ndzi famba, ndzi ta ku dlayela yini-ke?’ ”

₁₈Davhida a tsutsuma a baleka, kutani a ya eka Samiele eRhama; a ya n'wi byela hinkwaswo leswi Sawulo a n'wi endleke. Kavaloko va suka yena na Samiele va ya aka eNayoto. ₁₉Kutani va tivisa Sawulo, va ku: “Davhida u le Nayoto wa Rhama.” ₂₀Kavaloko Sawulo a rhuma vanhu ku ya khoma Davhida; kutani va vona ntlawa wa vaprofeta lava bvumbhaka, Samiele a ri exikarhi ka vona a va dyondzisa, kutani Moya wa Xikwembu wu khoma varhumiwa va Sawulo, na vona va bvumbha. ₂₁Va ya vikela Sawulo, kutani a rhuma vanhu van'wana, kambe, na vona, va bvumbha. Sawulo a va rhuma kambe ra vunharhu, kutani, na vona, va bvumbha. ₂₂Kavaloko Sawulo, na yena, a ya eRhama; kuteloko a fikile exihlobyeni lexikulu lexi nga eSeku, a vutisa, a ku: “Samiele na Davhida va kwihi xana?” Va ku eka yena: “Va le Nayoto wa Rhama.” ₂₃Kutani a ya kona eNayoto wa Rhama. Kavaloko Moya wa Xikwembu wu n'wi khoma, na yena, kakuloko a famba endleleni ya yena, a bvumbha a ko a ya fika eNayoto wa Rhama. ₂₄Kutani a hluvula na yena tinguvu ta yena, a bvumbha na yena emahlweni ka Samiele, kutani a tshama siku hinkwaro leri ni vusiku hinkwabyo a etlele ehansi, a nga ambalangi nchumu. Hikwalaho va ku: “Xana Sawulo, na yena, u le xikarhi ka vaprofeta xana?”