1 TIHOSI 9

₁Kuteloko Solomoni a hetile ku aka Yindlu ya Yehovha ni yindlu ya hosi, ni hinkwaswo leswi Solomoni a rhandzeke ku swi endla, ₂Yehovha a humelela eka Solomoni ra vumbirhi, kukotisa loko a n'wi humeleleleke eGibiyoni.

₃Yehovha a ku eka yena: “Ndzi yingisile xikhongelo xa wena ni ku kombela loku u ku humeseke emahlweni ka mina: Ndzi hlawurile Yindlu leyi u yi akeke, ku veka vito ra mina kona hilaha ku nga heriki; mahlo ya mina ni mbilu ya mina swi ta va kona hi masiku. ₄Kutani wena, kungakuloko u famba emahlweni ka mina kukotisa Davhida, tata wa wena, hi ku tenga ka mbilu ni ku lulama, ku endla hinkwaswo leswi ndzi ku leriseke swona, ni loko u hlayisa milawu ya mina ni ku lerisa ka mina, ₅ndzi ta tiyisa xiluvelo xa vuhosi bya wena ehenhla ka Israele hi masiku, hilaha ndzi byeleke Davhida, tata wa wena hakona, loko ndzi te: ‘U nga ka u nga pfumari, ni siku ni rin'we, munhu wa rixaka ra wena exiluvelweni xa Israele.’ ₆Kambe loko mi ndzi fularhela, n'wina ni vana va n'wina, loko mi nga hlayisi milawu ya mina, ku ri ku lerisa loku ndzi ku vekeke emahlweni ka n'wina, ni loko mi ya tirhela swikwembu swin'wana, mi khinsama emahlweni ka swona; ₇ndzi ta susa Israele ehenhla ka tiko leri ndzi n'wi nyikeke rona, ndzi ta cukumeta ekule na mina Yindlu leyi ndzi yi hlawuleleke vito ra mina; kutani Israele u ta va xivuriso ni xihlekiso exikarhi ka matiko hinkwawo. ₈Loko yi ri Yindlu leyi tlakukeke swonghasi, mani na mani la nga ta hundza ekusuhi na yona, u ta hlamala, a ba noti; ₉va ta ku: ‘Yehovha u endlele leswi, tiko leri ni Yindlu leyi, ha yini xana?’ Va ta ku: ‘Hi leswi va tshikeke Yehovha Xikwembu xa vona, lexi humeseke vatata wa vona etikweni ra Egipta, kutani va namarhele swikwembu swin'wana, va khinsama emahlweni ka swona, va swi tirhela: Hikwalaho ka swona, Yehovha u rhumile ehenhla ka vona, makhombo lawa hinkwawo.’ ”

₁₀Loko ku hundzile malembe ya makume mambirhi, Solomoni a a akile tindlu letimbirhi, yi ri Yindlu ya Yehovha ni yindlu ya hosi; hosi Solomoni a nyika Hiramu miti ya makume mambirhi etikweni ra Galeliya, ₁₁(hikuva Hiramu, hosi ya Tiri, a a nyikile Solomoni mirhi ya kedari, ni mirhi ya kipresi, ni nsuku, hilaha Solomoni a swi rhandzeke hakona). ₁₂Kutani Hiramu a huma eTiri ku ya vona miti leyi a yi nyikiweke hi Solomoni, kambe a yi tsakisanga mahlo ya yena; ₁₃kutani a ku: “U ndzi nyikile miti yihi, makwerhu xana?” Kutani a yi thya tiko ra Kabulu, (kukotisa nchumu); i vito ra yona ku fika namuntlha. ₁₄Hiramu a a rhumele hosi titalenta ta nsuku ta dzana ni makume mambirhi.

₁₅Hi tona timhaka ta vanhu lava tirhisiweke hi hosi Solomoni, lava a va rhambeke ku aka Yindlu ya Yehovha, ni yindlu ya yena, na Milo, ni rirhangu ra Yerusalema, na Hasoro na Megido, na Gezere:

₁₆Faro, hosi ya Egipta, a a tekile Gezere a wu hisa hi ndzilo, a dlaya Vakanana lava akeke emutini, kutani a wu nyika n'wana wa yena, nsati wa Solomoni ku va ku averiwa ka yena. ₁₇Solomoni a aka Gezere na Bet-Horoni wa le hansi, ₁₈na Baalata, na Tadimora emananga etikweni, ₁₉ni miti hinkwayo ya matlhari leyi nga ya Solomoni, ni miti ya makalichi, ni miti ya vakhandziyi va tihanci ni hinkwaswo leswi Solomoni a rhandzeke ku swi aka eYerusalema, ni le Lebanoni ni le tikweni hinkwaro leri a ri fumeke.

₂₀Vanhu hinkwavo lava saleke va Vaamori ni Vahiti, ni Vaperesi, ni Vahivhi, ni Vayebusi, a va nga hlayiwi exikarhi ka vana va Israele; ₂₁vana va vona lava seleke endzhaku ka vona etikweni (hikuva vana va Israele va tsandzekile ku va herisa), Solomoni a va lerisa ku va tirhisa mitirho ku fika namuntlha. ₂₂Solomoni a nga rhambanga vanhu va Israele ku va tirhisa mitirho, hikuva a va ri vanhu va nyimpi, ni malandza ya yena, ni tindhuna ta yena, ni tinhenha ta yena, ni tindhuna ta makalichi ya yena ni ta vakhandziyi va tihanci va yena. ₂₃Tindhuna ta mitirho leti vekiweke hi Solomoni, a ti ri 550 ti langutela vanhu lava khomeke mitirho.

₂₄N'wana Faro, kuteloko a sukile emutini wa Davhida, ku ya nghena endlwini ya yena leyi Solomoni a n'wi akeleke, Solomoni a aka Milo.

₂₅Solomoni a tshama a humesa kanharhu hi lembe tiholokosta ni magandzelo ya ku khensa ealitarini leyi a yi akeleke Yehovha, kambe a hisa mirhi ya risuna ehenhla ka leyi ngi yi ri emahlweni ka Yehovha. Kutani a hetisa Yindlu.

₂₆Hosi Solomoni a aka tingalava eEsiyoni-Gebere, ekusuhi na Eloto, eribuwini ra Lwandle ro Tshwuka, etikweni ra Edomu. ₂₇Kutani Hiramu a rhuma malandza ya yena, va ri vatluti, lava tivaka lwandle, etingalaveni, swin'we ni malandza ya Solomoni. ₂₈Kutani va ya eOfiri, va ya teka kona nsuku, ti ri titalenta ta 420, leti va ti yisaka eka hosi Solomoni.