1 TIHOSI 17

₁Kutani Eliya, wa Tixibe, munhu wa tiko ra Giliyadi, a ku eka Akabu: “Yehovha, Xikwembu xa Israele, loyi ndzi yimaka emahlweni ka yena, wa hanya! Malembe lawa ku nga ka ku nga vi na mpfula ni mberha, loko ku nga ri hi rito ra mina.”

₂Kutani rito ra Yehovha ri ya eka Eliya, ri ku: ₃“Suka u famba etlhelo ra vuxa, u ya tumbela exinambyaneni xa Keriti lexi nga emahlweni ka Yordani. ₄U ta nwa mati ya xinambyana; ndzi lerisile mawukuwuku ku ku phamela kona.” ₅Kavaloko a famba, a endla hilaha Yehovha a n'wi byeleke hakona: a ya tshama exinambyaneni xa Keriti lexi nga emahlweni ka Yordani. ₆Kutani mawukuwuku ma n'wi tisela vuswa ni nyama nimixo, ni vuswa ni nyama nimadyambu, a ri karhi a nwa mati ya xinambyana.

₇Loko ku hundze masiku, xinambyana xi phya, hikuva mpfula a yi nga nanga emisaveni. ₈Kutani Yehovha a ku eka Eliya: ₉“Pfuka, u ya eSarepta wa Sidoni, u tshama kona: Waswivo, ndzi lerisile noni ku ku phamela kona.” ₁₀Eliya a suka a famba, a ya eSarepta.

Kuteloko a fikile enyangweni ya muti, waswivo, noni a a rhotela tihunyi kona; kutani a n'wi vita, a ku eka yena: “Wa nga ndzi kela matinyana enkambaneni, ndzi nwa.” ₁₁Kakuloko a ha ya n'wi kela, a n'wi vita, a ku: “Wa nga ndzi lavela ni xipandzwa xa vuswa.” ₁₂Yena a ku: “Yehovha, Xikwembu xa wena, xa hanya! A ndzi na vuswa, ni byitsanana; ndzi ni xandla xa mapa ntsena embiteni, ni mafurhanyana exikutswini, ndzi rhotela tihunyi timbirhi, ndzi muka, ndzi ya swekela n'wananga na mina vuswanyana, kutani kutakuloko hi dyile, hi ta fa.” ₁₃Eliya a ku eka yena: “U nga chavi! Muka u endla hilaha u nga vula hakona; ntsena rhanga u ndzi swekela ximbhundzwana, u ndzi tisela xona ehandle, kutani u ya tiswekela, u swekela ni n'wana wa wena. ₁₄Hikuva Yehovha, Xikwembu xa Israele, a ku: ‘Mapa ma nga ka ma nga heri embiteni, ni mafurha exikutswini, Yehovha a ko a nisa mpfula emisaveni.’ ” ₁₅Kutani wansati a famba a ya endla hilaha Eliya a n'wi byeleke hakona; hi masiku layo tala a dya, yena, ni yindlu ya yena, na Eliya. ₁₆Mapa a ma helanga embiteni, ni mafurha a ma pfumariwanga exikutswini hilaha Yehovha a nga vula hakona hi Eliya.

₁₇Endzhaku ka leswo, n'wana wa wansati la nga n'wini wa yindlu, a vabya; vuvabyi bya yena byi kula ngopfu, a ko a nga sari na hika. ₁₈Kavaloko wansati a ku eka Eliya: “Ndzi ni mhaka yihi na wena, wena, munhu wa Xikwembu-ke? Xana u tile eka mina ku ndzi tsundzuxa ku dyoha ka mina, ni ku dlaya n'wana wa mina-ke?” ₁₉A ku eka yena: “Ndzi nyike n'wana wa wena.” A n'wi teka exifuveni xa wansati, a n'wi tlakula a ya n'wi veka endlwini ya le henhla, laha a tshamaka kona, a n'wi lata exilawini xa yena. ₂₀Kutani a huwelela eka Yehovha, a ku: “Yehovha, Xikwembu xa nga, xana u ta tisa khombo lero tano eka wansati lowa noni, loyi a ndzi rhurheleke endlwini ya yena, leswaku n'wana wa yena a fa xana?” ₂₁Kavaloko a sivama kanharhu henhla ka n'wana, a huwelela eka Yehovha, a ku: “Yehovha, Xikwembu xanga, wanga tlherisa moya wa n'wana loyi emirini wa yena!” ₂₂Yehovha a yingisa rito ra Eliya, moya wa n'wana wu tlhelela emirini wa yena, a hanya. ₂₃Kavaloko Eliya a teka n'wana a n'wi xikisa hi le ndlwini ya le henhla, a n'wi nyika mana wa yena. ₂₄Kutani Eliya a ku: “Vona, n'wana wa wena wa hanya.” Wansati a ku eka Eliya: “Sweswi, ndzi tiva leswaku u munhu wa Xikwembu, ni leswaku rito ra Yehovha leri nga enon'wini wa wena ri tiyile.”