Ta voko ra Yerobuwamu loko ri omile.
1Kakuloko Yerobuwamu a yimile ealitarini ku hisa mirhi ya risuna, maswivo, munhu wa Xikwembu, la humeke etikweni ra Yuda, a fika eBetele, hi ku lerisa ka Yehovha. 2A huwelela emahlweni ka alitari hi rito ra Yehovha, a ku: “Alitari, alitari! Yehovha u vurisa sweswo, a ku: ‘Waswivo, ku ta velekeriwa yindlu ya Davhida n'wana wa wanuna, vito ra yena u ta va Yosiya; u ta tlhava ehenhla ka wena vaprista va swivandla leswi tlakukeke, lava hisaka mirhi ya risuna ehenhla ka wena, va ta hisa ni marhambu ya vanhu ehenhla ka wena!’ ” 3Kutani hi siku rolero a endla masingita, a ku: “Hi xona xikombiso leswaku Yehovha u vulavurile: ‘Waswivo, alitari yi ta handzuka ni nkuma lowu nga ehenhla ka yona wu ta hangalasiwa.’ ”
4Kuteloko hosi Yerobuwamu a twile rito leri munhu wa Xikwembu a ri huwelelaka emahlweni ka alitari ya Betele, a tshambuluta voko a ri ealitarini, a ku: “N'wi khomeni!” Kasi voko leri a ri tshambuluteleke yena, ri oma, a tsandzeka ku ri tlherisa eka yena. 5Kavaloko alitari yi handzuka, nkuma lowu nga ehenhla ka yona wu hangalaka; hilaha munhu wa Xikwembu a va nyikeke xikombiso hakona hi rito ra Xikwembu.
6Kutani hosi yi vulavula yi ku eka munhu wa Xikwembu: “Wa nga khongela Yehovha, Xikwembu xa wena, u ndzi khongelela leswaku voko ra mina ri tlhela eka mina!” Munhu wa Xikwembu a khongela Yehovha, kutani voko ra hosi ri tlhela eka yena, ri va kukotisa khale. 7Hosi yi ku eka munhu wa Xikwembu: “Nghena na mina endlwini, u dya Swakudya, ndzi ta ku ha nyiko.” 8Munhu wa Xikwembu a hlamula a ku eka hosi: “Kungakuloko u ndzi nyika hafu ya yindlu ya wena, ndzi nga ka ndzi nga ngheni na wena; ndzi nga ka ndzi nga dyi swakudya, ni ku nwa mati exivandleni lexi. 9Hikuva ndzi lerisiwile sweswo hi rito ra Yehovha, ri ku: ‘U nga ka u nga dyi swakudya ni ku nwa mati, u nga ka u nga tlheri hi ndlela leyi u fambeke ha yena.’ ” 10Kutani a timukela hi ndlela yin'wana; a nga mukanga hi ndlela leyi a teke ha yona eBetele.
Muprofeta a dlayiwa hi nghala.
11A ku ri ni muprofeta la dyuhaleke la akeke eBetele; kutani vana va yena va ya n'wi rungulela timhaka hinkwato leti munhu wa Xikwembu a ti endleke eBetele hi siku rolero, ni marito lawa a ma byeleke hosi; kuteloko va rungulele tata wa vona, a ku eka vona: 12“U tlherile hi ndlela yihi xana?” Kambe vana va yena a va vonile ndlela leyi munhu wa Xikwembu la humaka etikweni ra Yuda a fambeke ha yona, 13kutani a ku eka vana va yena: “Ndzi paneleni mbhongolo.” Va pana mbhongolo, kutani a yi khandziya. 14Kavaloko a suka a landza munhu wa Xikwembu, kutani a n'wi kuma a tshamisile ehansi ka nkuhlu; a ku eka yena: “Xana u munhu wa Xikwembu la humeke etikweni ra Yuda xana?” Yena a ku: “Hi mina.” 15Kutani a ku eka yena: “Tana na mina endlwini, u dya swakudya.” 16Yena a ku: “Ndzi nga ka ndzi nga tlheri na wena, hambi ku ri ku nghena na wena; ndzi nga ka ndzi nga dyi swakudya ni ku nwa mati na wena exivandleni lexi, 17hikuva ndzi byeriwile hi rito ra Yehovha, ri te: ‘U nga ka u nga dyi swakudya kona, hambi ku ri ku nwa mati kona; loko u vuya, u nga ka nga fambi hi ndlela leyi u fambeke ha yona loko u ya kona.’ ” 18Kutani a ku eka yena: “Na mina ndzi muprofeta kukota wena, kambe ntsumi ya Xikwembu yi ndzi byerile hi rito ra Yehovha, ri te: ‘N'wi tlherise endlwini ya wena, a ta dya swakudya, a nwa mati.’ ” Kambe a a hemba mavunwa.
19Kavaloko munhu wa Xikwembu a tlhela na yena; a dya swakudya, a nwa mati endlwini ya yena. 20Kuteloko va ha tshamisile etafuleni, rito ra Yehovha ri ta eka muprofeta la n'wi tlheriseke. 21Kutani a huwelela eka munhu wa Xikwembu la nga ta a sukile etikweni ra Yuda, a ku: “Yehovha u vula sweswo, a ku: ‘Leswi u nga ka u nga yingisanga rito ra Yehovha, u nga ka u nga hlayisanga ku lerisa loku Yehovha, Xikwembu xa wena, a ku leriseke kona; 22kambe u tlherile, u dya swakudya, u nwa mati exivandleni lexi a nga ku byela, a ku: “U nga tshuki u dya swakudya kona, hambi ku ri ku nwa mati,” ntsumbu wa wena wu nga ka wu nga ngheni esirheni ra vatata wa wena!’ ” 23Muprofeta loyi a n'wi tlheriseke, kuteloko a dyile swakudya, a nwile mati, a n'wi panela mbhongolo.
24Kavaloko munhu wa Xikwembu a suka a famba; kutani nghala yi hlangana na yena endleleni, yi n'wi dlaya. Ntsumbu wa yena wu etlela endleleni, mbhongolo yi ri kusuhi na wona, na yona nghala yi yimile ekusuhi ni ntsumbu. 25Kutani waswivo, vanhu lava fambaka va vona ntsumbu wu etlele endleleni, ni nghala leyi yimaka ekusuhi ni ntsumbu; va ya fika emutini laha muprofeta la dyuhaleke a akeke kona kutani va vula mhaka leyi. 26Muprofeta la n'wi tlheriseke endleleni a swi twa a ku: “I munhu wa Xikwembu la nga yingisangiki ku lerisa ka Yehovha; kutani Yehovha u n'wi nyiketile nghala leyi n'wi handzuleke yi n'wi dlaya hilaha Yehovha a nga n'wi byela hakona.”
27Kutani a byela vana va yena, a ku: “Ndzi paneleni mbhongolo.” Va yi pana, 28kutani a suka a famba, a ya kuma ntsumbu wu etlele endleleni, ni mbhongolo yi ri ni nghala swi yimile ekusuhi ni ntsumbu: Nghala yi nga dyanga ntsumbu, yi nga handzulanga mbhongolo. 29Kavaloko muprofeta a tlakula ntsumbu wa munhu wa Xikwembu, a wu veka embhongolweni, a wu tisa ekaya. Muprofeta la dyuheleke a tlhela emutini ku n'wi rila ni ku n'wi lahla. 30A lata mufi esirheni ra yena, kutani va n'wi rila, va ku: “Yo, makwerhu!” 31Kuteloko a n'wi lahlile, a byela vana va yena, a ku: “Kutakuloko ndzi fa, mi ta ndzi lahla esirheni leri munhu wa Xikwembu a lahliweke eka rona: mi ta veka marhambu ya mina ekusuhi ni marhambu ya yena. 32Hikuva ri ta hetiseka rito leri a nga ri huwelela hi ku lerisa ka Yehovha, emahlweni ka alitari ya Betele ni le mahlweni ka tindlu hinkwato ta swivandla leswi tlakukeke, leswi nga emitini ya Samariya.”
33Endzhaku ka timhaka teto, Yerobuwamu a nga hundzukanga endleleni leyo biha ya yena. A engeta a veka vaprista va switsunga lava humaka exikarhi ka tiko hinkwaro; a hlawula loyi a swi rhandzaka, kutani a va muprista wa xitsunga. 34Mhaka leyi, xi va xidyoho lexikulu xa yindlu ya Yerobuwamu; hikwalaho ka xona, yi herisiwile ehenhla ka misava.
