1 YOHANE 1

₁Lexi ngi xi ri kona eku sunguleni lexi hi xi tweke, lexi hi xi voneke hi mahlo ya hina, lexi hi xi languteke, lexi mavoko ya hina ma xi khumbeke, ri nga Rito ra vutomi; ₂(hikuva vutomi byi kombisiwile, hi byi vonile, kambe hi timbhoni ta byona, kutani ha mi byela vutomi lebyi nga heriki, lebyi ngi byi ri eka Tatana, kambe byi kombisiwile hina) ₃lexi hi xi voneke, lexi hi xi tweke, hi lexi hi mi byelaka xona, leswaku, na n'wina, mi va ni ku hlangana na hina; kambe ku hlangana ka hina na Tatana ku kona, ni le ka N'wana wa yena, Yesu Kriste. ₄Kutani hi mi tsalela timhaka leti, leswaku ku tsaka ka n'wina ku hetiseka.

₅Mhaka leyi hi nga yi twa eka yena, leyi hi mi byelaka yona, hileswaku Xikwembu i ku vonakala, kutani a ku na munyama eka xona, nikutsongo. ₆Kungakuloko hi vula leswaku hi ni ku hlangana na xona kasi hi famba emunyameni, ha hemba, kutani a hi fambi entiyisweni. ₇Kambe kungakuloko hi famba eku vonakaleni, kukota xona xi nga eku ku vonakaleni, hi ni ku hlangana swin'we, kutani ngati ya Yesu Kriste, N'wana wa xona, ya hi hlantswa, yi susa swidyoho hinkwaswo swa hina.

₈Kungakuloko hi vula leswaku a hi na vudyoho, ha tixisa, kutani ntiyiso a wu kona eka hina. ₉Loko hi tivula swidyoho swa hina, Xikwembu xa tshembeka, xi lulamile ku hi rivalela swidyoho, ni ku hi hlantswa ku homboloka hinkwako. ₁₀Loko hi vula leswaku a hi dyohanga, hi xi endla muhembi, kutani rito ra xona a ri kona eka hina.