Mi nga avanyisi hi ku tikurisa.
1Loko swi ri tano, munhu un'wana ni un'wana wa hi tiva leswaku hi malandza ya Kriste, ni vahlavuteri va swihundla swa Xikwembu. 2Ntsena leswi laviwaka eka vahlavuteri hileswaku un'wana ni un'wana a kumiwa a ri la tshembekeke. 3Kambe eka mina, a hi nchumu ku avanyisiwa hi n'wina, hambi ku avanyisiwa hi vanhu; na swona mina, a ndzi tiavanyisi. 4Hikuva a ndzi tivoni nandzu wa nchumu; hambiswiritano, a ndzi vekiwanga la lulameke hakona, kambe la ndzi avanyisaka i Hosi. 5Hikwalaho mi nga tshuki mi avanyisa nchumu, nkarhi wu nga si fika, Hosi yi ko yi vuya; hi yona leyi nga ta humesela eku vonakaleni leswi fihliweke hi swa munyama, ni ku kombisa makungu ya timbilu; kutani enkarhini wolowu, Xikwembu xi ta nyika munhu un'wana ni un'wana ku dzunisiwa loku n'wi ringanaka.
6Kambe, vamakwerhu, ndzi fanisa timhaka teto ha mina na Apolosi hikwalaho ka n'wina, hi kona mi nga ta dyondza ha hina leswaku mi nga tshuki mi ehleketa hi mukhuva lowu tlurisaka laha ku tsariweke, leswaku ku nga tshuki ku va na un'we exikarhi ka n'wina la tikurisaka eka un'wana, ku yimela un'wana. 7Hikuva i mani la ku hlawuleke eka un'wana? Xana u na yini lexi u nga xi nyikiwangiki xana? Kutani loko u xi nyikiwile, u tidzunisela yini kukota loko ngi u nga nyikiwanga xana?
8Na sweswi mi xurhile, na sweswi mi fuwile, ma fuma ehandle ka hina. Kunene a swi sasekile loko mi fuma, leswaku na hina hi ta fuma na n'wina. 9Hikuva ndzi ringanisa leswaku Xikwembu xi hi kombisile, hina vaapostola, lava nga ndzhaku ka hinkwavo, kukota vanhu lava vekeriweke rifu, hikuva hi kombisiwile erivaleni emahlweni ka misava, ni le mahlweni ka tintsumi, ni ka vanhu. 10Hina, hi swihunguki hikwalaho ka Kriste; kambe n'wina mi tlharihile eka Kriste, hina ha tsana, n'wina mi ni matimba; n'wina mi ni ku twala, kambe hina ha soriwa. 11Ni ku fika sweswi, hi ni ndlala ni torha, hi pfumala tinguvu, hi phakatiwa emahlweni, ha yingayinga, 12ha karhala hi ku tirha hi mavoko ya hina. Hambi hi hleviwa, ha katekisa, hambi hi xanisiwa, ha yingisela, 13hambi hi lumbetiwa, ha khongela. Hi endliwile thyaka ra misava ni xisandzu xa hinkwavo ku fikela sweswi.
Ku tshinya ka muapostola ku huma erirhandzwini.
14Ndzi tsala timhaka teto, ku nga ri ku mi khomisa tingana, kambe ndza mi tsundzuxa swanga hi vana va mina lava rhandziwaka. 15Hikuva, hambi mi nga va ni vadyondzisi va dzana ra madzana eka Kriste, vatata wa n'wina a va talanga; hikuva hi mina loyi ndzi mi tswaleke eka Yesu Kriste hi Evhangeli. 16Ndza mi khongotela hakona, ndzi ri: Mi va vaetisi va mina.
17Hikwalaho ndzi mi rhumeleke Timotiya, n'wananga la rhandziwaka, la tshembekaka eHosini leswaku a mi tsundzuxa tindlela ta mina eka Kriste, ni laha ndzi dyondzisaka hinkwako ekerekeni yin'wana ni yin'wana.
18Kutani van'wana eka n'wina va tikurisile kukota loko ndzi nga ha ti ta eka n'wina; kasi ndzi ta ta hi ku hatlisa, loko Hosi yi swi rhandza; 19kutani ndzi ta tiva, ku nga ri ku vulavula ka lava tikurisaka, kambe matimba ya vona. 20Hikuva ku fuma ka Xikwembu a ku tshami eku vulavuleni, kambe ku le matimbeni. 21Xana mi rhandza yini? Mi ri: Ndzi ta eka n'wina hi nkhavi, kumbe hi rirhandzu ni moya wa tintswalo xana?
