1 VAKORINTO 10

₁A ndzi swi rhandzi, vamakwerhu, loko mi nga swi tivi leswaku vatatana hinkwavo va tshamile ehansi ka papa, hinkwavo va perile lwandle; ₂hinkwavo va khuvuriwile eka Muxe epapeni ni le lwandle; ₃hinkwavo va dya swakudya swin'we swa Moya; ₄hinkwavo va nwile swakunwa swin'we swa Moya, hikuva va nwile eribyeni ra Moya leri va landzeke: Ribye rero, a a ri Kriste. ₅Kambe a hi lavo tala eka vona lava nga khensiwa hi Xikwembu, hikuva va file emananga.

₆Kambe timhaka teto ti ve swifaniso eka hina, leswaku hi nga tshuki hi navela leswo biha, kukota leswi va swi naveleke. ₇Kambe mi nga tshuki mi hundzuka lava khongelaka swifaniso, kukota van'wana exikarhi ka vona, hilaha ku tsariweke leswaku: “Tiko ri tshamele ku dya ni ku nwa, kutani ri yima ri cina.” ₈Kambe hi nga tshuki hi oswana, kukota van'wana exikarhi ka vona va nga tinyiketa byona vuoswi; kutani hi siku rin'we, ku wa vanhu va 23 000. ₉Na kona, hi nga tshuki hi ringa Kriste, kukota van'wana exikarhi ka vona va nga n'wi ringa, kutani va dlayiwile hi tinyoka. ₁₀Kambe mi nga tshuki mi dzumadzuma, kukota leswi van'wana va dzumadzumeke; kutani va file hi mudlayi.

₁₁Timhaka teto hinkwato ti va humelele leswaku xi va xitsundzuxo; kambe ti tsariwile leswaku hi dyondza ha tona, hina lava humeleleke emikarhini ya makumu. ₁₂Hikwalaho, la ringanisaka leswaku wa ha yimile, a a tivonele leswaku a nga ti wa.

₁₃A mi si humelela hi ndzingo lowu nga ringaniki munhu. Kambe Xikwembu xa tshembeka, xi nga ka xi nga pfumeri leswaku mi humeleriwa hi ndzingo lowu mi hlulaka; kambe ndzingo, loko wu ri kona, xi ta mi nyika ni ndlela ya ku huma eka wona, mi ta kota ku wu rhwala. ₁₄Hikwalaho, varhandziwa va mina, chavani ku gandzela swifaniso.

₁₅Ndzi vulavula na n'wina kukotisa vanhu lava nga ni ku anakanya; avanyisani, n'wina vini, leswi ndzi swi vulaka. ₁₆Xinwelo xa ku kateka lexi hi xi khensaka, xana a hi ku hlangana ni ngati ya Kriste xana? Ni xinkwa lexi hi xi phemaka, xana a hi ku hlangana ni miri wa Kriste xana? ₁₇Hina hi nga lavo tala, hi miri wun'we, hikuva, na xona xinkwa, i xin'we ntsena; hikuva hinkwerhu hi dya xinkwa lexi xi ri xin'we. ₁₈Vonani Vaisraele va nyama: Xana lava dyaka magandzelo a va hlangani na alitari xana? ₁₉Loko swi ri tano, ndzi ri yini? Xana ndzi ri xifaniso i xilo xana? Kumbe lexi tlhaveriweke xifaniso i xilo xana? ₂₀A ndzi vurisi sweswo, kambe ndzi ri: Swilo leswi vamatiko va swi tlhavelaka egandzelweni, va swi tlhavela mademona, a va tlhaveri Xikwembu. Kutani ndza ala leswaku mi hlangana ni mademona. ₂₁Mi nga ka mi nga nweri xinwelo xa Hosi ni xinwelo xa mademona. Mi nga ka mi nga dyeri etafuleni ra Hosi ni le tafuleni ra mademona. ₂₂Xana hi rhandza ku tshohokisa Hosi xana? Xana ha yi tlula hi matimba xana?

₂₃“Hinkwaswo swa pfumeleriwa,” kambe a hi hinkwaswo leswi nga ni vunene; “hinkwaswo swa pfumeleriwa,” kambe hinkwaswo a swi akisi. ₂₄Ku nga tshuki ku va ni munhu la lavaka leswi n'wi fanelaka a ri swakwe, kambe a nga lava leswi fanelaka van'wana.

₂₅Dyanani swilo hinkwaswo leswi xaviwaka eku xaviseni, mi nga vutisi nchumu hikwalaho ka ripfalo, ₂₆hikuva “misava i ya Hosi, ni ku tala ka yona?” ₂₇Loko un'wana wa lava nga pfumeriki a mi rhamba eswakudyeni, kutani mi rhandza ku ya, dyanani hinkwaswo leswi vekiwaka emahlweni ka n'wina, mi nga vutisi nchumu hikwalaho ka ripfalo. ₂₈Kambe loko munhu a mi byela, a ku: “leswi, swi tlhaveriwe swifaniso,” mi nga tshuki mi dya hikwalaho ka loyi a mi tsundzuxeke, ni hikwalaho ka ripfalo; hikuva misava i ya Hosi, ni ku tala ka yona. ₂₉Kambe loko ndzi vula ripfalo, a hi ra wena, kambe i ra un'wana; hikuva ku tshunxeka ka mina ku nga avanyisiwa hi ku yini hi ripfalo ra un'wana xana? ₃₀Kutani loko ndzi dya hi ku khensa, ndzi nga soriwa hi ku yini ehenhla ka leswi ndzi khenseke hikwalaho ka swona xana?

₃₁Kambe hambi mi dya, hambi mi nwa, hambi mi endla yini na yini, endlani hinkwaswo ku dzunisa Xikwembu. ₃₂Mi nga tshuki mi khunguvanyisa Vagriki, hambi va ri Vayuda, hambi yi ri Kereke ya Xikwembu: ₃₃kukota loko na mina ndzi tsakisa hinkwavo eka hinkwaswo, ndzi nga tilaveri leswi ndzi fanelaka ntsena, kambe ndzi lava leswi fanelaka lavo tala, leswaku va ta ponisiwa.