1 TIKRONIKA 5

₁Vana va xinuna va Rhuveni, mativula ya Israele. Hikuva a a ri mativula, ntsena hi leswi a nga nyamisa xilawu xa tata wa yena, vuhosi bya yena byi nyikiwile vana va Yosefa, n'wana Israele; swi nga ri leswaku Yosefa a tsariwa mativula; ₂hikuva Yuda a a ri nkulukumba exikarhi ka vamakwavo, kutani hosi yi humile eka yena; kambe vuhosi a byi ri bya Yosefa.

₃Vana va xinuna va Rhuveni, mativula ya Israele: Hanoko, Palu, Hesironi, Karimi. ₄N'wana wa wanuna wa Yuwele: Xemaya, n'wanakwe; Gogo, n'wanakwe; Ximeyi, n'wanakwe; ₅Mika n'wanakwe, Reyaya, n'wanakwe; Baali, n'wanakwe; ₆Bera, n'wanakwe; la yisiweke evukhumbini i Tiglata-Pilezere, hosi ya Asiriya: a a ri hosana ya va Rhuveni. ₇Ni vamakwavo hi tindlu ta vona, hilaha va tsariweke hakona hi tinxaka ta vona: hosana Yeyiele, na Zakariya; ₈na Bela, n'wana Azaza, n'wana Xema, n'wana Yuwele. A a akile eArowere ni ku fika eNebo ni le Baala-Meoni. ₉Evuxeni a a akile ku fika emananga la fikaka enambyeni wa Yufrata, hikuva mitlhambi ya vona a yi ri leyikulu etikweni ra Giliyadi. ₁₀Enkarhini wa Sawulo, va lwa ni va Hagara, va va hlula, kutani va aka emitsongeni ya vona, tlhelo hinkwaro ra vuxa ra tiko ra Giliyadi.

₁₁Vana va xinuna va Gadi a va akile etikweni ra Baxani ku fika eSaleka, va langutene na vona. ₁₂Yuwele, hosana, na Xafami wa vumbirhi, na Yanayi na Xafati, etikweni ra Baxani. ₁₃Vamakwavo, hi tindlu ta vatata wa vona, a a ri Mikaele, Mexulama, Xeba, Yorayi, Yakani, Ziya, Ebere, ntlhanu na vambirhi. ₁₄Hi vona vana va xinuna va Abihayili, n'wana Huri, n'wana Yarowa, n'wana Giliyadi, n'wana Mikaele, n'wana Yexixayi n'wana Yahado, n'wana Buzi; ₁₅Ahi n'wana Abidiele, n'wana Guni a a ri hosana ya yindlu ya vatata wa vona. ₁₆Va akile eGiliyadi wa Baxani, ni le mitini ya kona ni le vudyelweni hinkwabyo bya Xaroni, ku fika emindzilekaneni ya kona. ₁₇Va tsariwile hinkwavo emasikwini ya Yotamu, hosi ya Yuda, ni le masikwini ya Yerobuwamu, hosi ya Israele.

₁₈Vana va Rhuveni, ni va Gadi ni hafu ya nyimba ya Manase, leti nga tinhenha, lava tamelaka switlhangu ni matlhari, lava copaka hi vurha lava tlharihiseriweke nyimpi va ri vavanuna va 44 760, lava hlomaka; ₁₉va huma nyimpi, va ya hlasela va Hagara, na Yeturu, na Nafixi, na Nodaba. ₂₀Va pfuniwile loko va lwa na vona, kutani va Hagara ni hinkwavo lava ngi va ri na vona, va nyiketiwa emavokweni ya vona. Hikuva, loko va ha lwa va huwelela eka Xikwembu, kutani Xikwembu xi va yingisa, hikuva a va xi tshembile. ₂₁Va teka mitlhambi ya vona, ti ri tikamela ta 50 000 ni tinyimpfu ta 250 000, ni timbhongolo ta 2 000, ni vanhu va 100 0000. ₂₂Hikuva lavo tala va dlayiwile, hikuva nyimpi a yi huma eka Xikwembu; kutani va aka ematshan'weni ya vona, ku fika nkarhi lowu va yisiwaka evukhumbini ha wona.

₂₃Vana va hafu ya nyimba ya Manase va aka na vona etikweni leri, ku suka eBaxani ku fika eBaala-Hermoni, na Seniri ni le ntshaveni ya Hermoni, a va ri lavo tala. ₂₄Hi tona tihosana ta tindlu ta vatata wa vona: Efere, Yixi, Eliele, Azariele, Yeremiya, Hodavhiya, Yahadiele, ti ri tinhenha ni vanhu lava twaleke, ni tihosana ta tindlu ta vatata wa vona. ₂₅Kambe va dyohele Xikwembu xa vatata wa vona, va tinyiketa vuoswi hi ku landza swikwembu swa matiko lawa Xikwembu xi ma heriseke emahlweni ka vona. ₂₆Xikwembu xa Israele xi kucetela moya wa Pulu, hosi ya Asiriya, ni moya wa Tiglata-Pilezere hosi ya Asiriya, kutani a yisa evukhumbini va Rhuveni, ni va Gadi ni va hafu ya nyimba ya Manase, a va yisa eHala na le Habori na le Hara, ni le nambyeni wa Gozana, laha va akeke kona ku fika namuntlha.