Zakhariya 9

Livi laSimakadze limelene nelive lakaHadraki;

nayo iDamaseko iyawuba yindzawo yekuhlala kwalelivi,

ngobe emehlo aSimakadze asetikwabo bonkhe bantfu

nakuto tonkhe tive tema-Israyeli,

₂nasetikweHamathi futsi lengumnyele wabo,

nasetikweThire kanye neSidoni,

nome bona bahlakaniphe kakhulu.

₃IThire yona seyitakhele inqaba;

seyicokelele isiliva kwaba shangatsi lutfuli,

negolide njengeludzaka lwasesitaladini.

₄Kodvwa Simakadze uyawutsatsa lowo mcebo wayo,

abhubhise emandla ayo elwandle,

futsi iyawudliwa ngumlilo.

₅I-Ashkeloni iyawukubona loko, yesabe;

iGaza iyawujilajileka ngenca yeminjunju,

kanye ne-Ekroni futsi,

ngobe litsemba layo liyawubuna liphele.

IGaza iyawulahlekelwa yinkhosi yayo,

ne-Ashkeloni iyawushiywa itindzala.

₆Bachamuki bayawuhlala e-Ashdodi,

mine ngiyawucedza kutigabatisa kwemaFilisti.

₇Ngiyawukhipha inyama leyingati emilonyeni yabo,

ngivungule kudla lekutinengiso

lebekunikelwe etithicweni

lokusasele emkhatsini wematinyo abo.

Labo labayawube basele

sebayawuba baNkulunkulu wetfu babe baholi kaJuda,

i-Ekroni iyawuba njengemaJebhusi.

₈Kodvwa ngiyakuyivikela indlu yami,

ngimelane nanome nguyiphi imphi

lengahle yendlule kuyo.

Bacindzeteli abasayiwuphindze basibuse sive sami,

ngobe nyalo sengiyaselusa ngemehlo ami.

₉Jabula kakhulu,

Ndvodzakati yaseSiyoni!

Memeta ngekujabula,

Ndvodzakati yaseJerusalema!

Ase ubuke, inkhosi yakho ita kuwe,

ilungile, futsi iphetse insindziso,

ita itfobekile, igibele embongolweni,

etikwelitfole lembongolo,

inkhonyane yembongolo.

₁₀Ngiyawutisusa tincola temphi ka-Efrayimu,

nemahhashi emphi ngiwesuse eJerusalema,

nebutjoki bemphi buyakwephulwa.

Inkhosi iyawumemetela kuthula etiveni.

Kubusa kwayo kuyakwandza,

kusuke elwandle kuyewugcina ngelwandle,

kusuke eMfuleni kuyewugcina emikhawulweni yemhlaba.

₁₁Kodvwa nine, ngenca yengati yesivumelwane sami nani,

ngiyawutikhulula tiboshwa takini

emgodzini lote emanti.

₁₂Buyelani enqabeni yenu,

nine tiboshwa lese ninelitsemba,

ngisho nanyalo solo ngiyamemetela,

ngitsi ngitanibuyisela ngalokuphindziwe.

₁₃Juda ngiyawumgoba njengobe ngigoba butjoki bami,

ngibugcwalise nga-Efrayimu,

kutsi abe ngumcibisholo wami.

Awu Siyoni, ngiyawukuvusela emadvodzana akho

emelane nemadvodzana akho, Grisi,

sive sami ngisente inkemba yelichawe.

₁₄Simakadze uyawube sewuyabonakala kubo,

umcibisholo wakhe uyawugijima njengembane.

INkhosi Simakadze

iyawushaya impalampala,

iyawushuca ngetivunguvungu taseningizimu,

₁₅Simakadze longuSomandla uyakubavikela bantfu bakhe.

Bayawubhubhisa bancobe ngematje etilingi.

Bayawunatsa ingati babhodle

kube shangatsi ngungeliwayini;

bayawucitsa ingati yetitsa tabo iphuphume

njengesitja lesisetjentiswa

ekunyenyeteni emakona aselatini.

₁₆Simakadze Nkulunkulu wabo

uyawubasindzisa ngalelo langa

njengemhlambi webantfu bakhe.

Bayawumanyatela eveni lakhe

njengematje laligugu lacwebetelako kuwo umchele.

₁₇Maye, live lakhe liyawuba lihle bo!

Futsi liyawubukeka lilihle kakhulu.

Lokutinhlavu kuyawukwenta tinsizwa tiphumelele,

neliwayini lelisha lente emantfombatane ondleke.