Zakhariya 3

₁Simakadze wabe sewungibonisa Jeshuwa, umPhristi Lomkhulu, eme embikwengilosi yaSimakadze, naSathane eme ngasesandleni sakhe sekudla atekummangalela. ₂Simakadze wakhuluma kuSathane, watsi: “Simakadze uyakwekhuta wena Sathane! Simakadze, lokhetse iJerusalema, uyakukwekhuta! Lendvodza ayisiso sikhuni lesivutsako yini lesephulwe emlilweni?”

₃Jeshuwa abembetse tembatfo letingcolile ngesikhatsi aseme embikwalengilosi. ₄Lengilosi yakhuluma kulabasiti lababeme embikwayo, yatsi: “Mkhumuleni letimphahla takhe letingcolile.”

Yakhuluma kuJeshuwa, yatsi: “Ase ubuke, sono sakho sengisisusile, futsi ngitakwembatsisa imijiva lehlantekile lemihle kakhulu.”

₅Ngase ngitsi: “Mshuculiseni ngemshuculo lohlobile.” Ngako bamshuculisa ngemshuculo lohlobile enhloko yakhe, bamembatsisa, ngesikhatsi ingilosi yaSimakadze isemile eceleni kwakhe.

₆Ingilosi yaSimakadze yetsembisa Jeshuwa, yatsi: ₇“Naku lokushiwo nguSimakadze longuSomandla, utsi: ‘Nawutawuhamba etindleleni tami ugcine nemiyalo yami, indlu yami-ke uyakuyibusa uphatse netibuya telithempeli lami; mine ngiyawukunika indzawo emkhatsini waletingilosi letime lapha.

₈“ ‘Lalela, wena mPhristi Lomkhulu Jeshuwa, kanye nalabo bangani bakho labahleti embikwakho, labangemadvodza lasibonakaliso setintfo letitako: Ngitawuletsa inceku yami, Ligala. ₉Buka, litje lengilimise embikwaJeshuwa. Kunemehlo lasikhombisa kulelitje linye, mine ngitawucopha umbhalo kulo, nesono salelive ngiyawusisusa ngalanga linye,’ kusho Simakadze longuSomandla.

₁₀“ ‘Ngalelo langa ngulowo nalowo wenu uyawumema makhelwane wakhe kutsi atewuhlala ngekuthula ngaphansi kwemvini nemkhiwa wakhe,’ kusho Simakadze longuSomandla.”