Zakhariya 12

₁Livi lesembulo:

Leli livi laSimakadze nga-Israyeli. Simakadze, lowendlale emazulu, lobeke tisekelo temhlaba, nalowabumba umoya wemuntfu ekhatsi kuye, utsi: ₂“IJerusalema ngitayenta ibe yindzebe leyenta tonkhe tive letiyitungeletile tidzayitele. Emadolobha akaJuda atawuvinjetelwa kanye neJerusalema. ₃Ngalelo langa, mhlazane tonkhe tive temhlaba tibutsene ndzawonye kutawumelana nayo, iJerusalema ngiyakuyenta ibe lidvwala lelisindzako kuto tonkhe tive. Bonkhe labetama kulisundvuta bayakutilimata bona. ₄Ngalelo langa onkhe emahhashi ngiyakuwashaya ngeluvalo, bagibeli bawo bona ngibashaye ngekuhlanya,” kusho Simakadze. “Liso lami liyawubasetikwendlu yakaJuda liyeluse, kodvwa onkhe emahhashi ebetive ngiyakuwaphumphutsekisa. ₅Baholi bakaJuda bayakutsi etinhlitiyweni tabo: ‘Bantfu baseJerusalema bacinile, ngobe Simakadze longuSomandla unguNkulunkulu wabo.’

₆“Ngalelo langa baholi bakaJuda ngiyawubenta bafanane nelibhodo lemlilo encunjini yetigodvo, bafanane nesidlwane lesivutsa emalangabi esitfungweni. Bayawucotfula ngesekudla nangesancele tonkhe tive letibatungeletile, kodvwa iJerusalema iyawusala seloku injalo nje endzaweni yayo.

₇“Simakadze uyawusindzisa emakhaya akaJuda kucala, kuze kutsi ludvumo lwendlu yaDavide kanye nelwetakhamiti taseJerusalema lungabi lukhulu kunelwakaJuda. ₈Ngalelo langa Simakadze uyawubavikela labo labahlala eJerusalema, kuze kutsi lababutsakatsaka kakhulu emkhatsini wabo babe njengaDavide, bese kutsi indlu yaDavide yona ifanane naNkulunkulu, ibe njengengilosi yaSimakadze lehamba embikwabo. ₉Ngalelo langa ngiyawuphuma ngiyewubhubhisa tonkhe tive letihlasela iJerusalema.”

₁₀“Ngiyawutfululela etikwendlu yakaDavide nasetikwabo bonkhe labahlala eJerusalema Moya wemusa newekuncusa. Bayakumbuka lowo lebamgwaza, bese bayamlilela njenganakulilelwa umntfwana lotelwe waba yedvwa kabo, bamdzabukele kakhulu, njengemuntfu nakadzabukela indvodzana yematubulo. ₁₁Ngalelo langa kulila kwaseJerusalema kuyakuba kukhulu, kube njengekulila kwaHadadi Rimoni etsafeni laseMegido. ₁₂Live liyawulila, lolo nalolo lusendvo ngekwalo, nebafati balo balile ngekwabo; lusendvo lwendlu yakaDavide nebafati balo, lusendvo lwendlu yakaNathani nebafati balo, ₁₃lusendvo lwendlu yakaLevi nebafati balo, ₁₄nabo bonkhe balolo nalolo lusendvo ngekwalo nebafati balo ngekwabo.”