kuThithusi 2

₁Wena fundzisa loko lokufanele imfundziso lephilile. ₂Uyale emadvodza lamadzala kutsi atitsibe, azitse, acondze, acine ekukholweni, naselutsandvweni, nasekuciniseleni. ₃Kanjalo nabomake labadzala ubayale kutsi bahlonipheke ngesimilo, bangabi tinhlebi nome tigcili tekudzakwa, kufanele babe bafundzisi balokulungile. ₄Abafundzise bomakoti kutsi batsandze emadvodza abo nebantfwababo, ₅babe ngulabacondzile nalabacotfo; baphatse kahle emakhaya abo, balunge, batfobele emadvodza abo, kuze lingahlanjalatwa livi laNkulunkulu.

₆Ubayale nalabadvuna labasebancane kutsi batitsibe. ₇Wena-ke ube sibonelo lesihle ngato tonkhe tindlela. Ufundzise ngebucotfo nangekutimisela, ₈nangekukhuluma lokuphilile lokungasoleki, kuze kutsi labo labamelene natsi, bahlazeke ngekutsi bate lokubi labangahle bakusho ngatsi.

₉Uyale netisebenti kutsi titfobele baphatsi bato kuko konkhe, tibenelise, tingaphikisani nabo inkhani. ₁₀Tingebi, kodvwa tikhombise kwetsembeka kuko konkhe, kuze etintfweni tonkhe tihlobise imfundziso yaNkulunkulu uMsindzisi wetfu.

₁₁Empeleni umusa waNkulunkulu wekusindzisa ubonakaliswe kubo bonkhe bantfu. ₁₂Lomusa usifundzisa kutsi sikudzele kungakholwa, nekutsi sitilumule etinkhanukweni telive, bese siphila ngekuzitsa, nangekulunga, nangekumesaba Nkulunkulu kulomhlaba, ₁₃ngesikhatsi sisabheke kugcwaliseka kwelitsemba lelibusisekile, kubonakala kwenkhatimulo yebukhosi baNkulunkulu lomkhulu, uMsindzisi wetfu Khristu Jesu. ₁₄Yena watinikela ngenca yetfu, kuze atesihlenga ebubini bonkhe atingcwelisele sive lesisakhe, lesinenshisekelo kutsi sente imisebenti lemihle.

₁₅Khuluma letintfo ngekuyala nekwekhuta ngawo onkhe emandla. Akubete lokubukela phansi.