Jabulisani labanye, ningatijabulisi nine
1Tsine lesicinile ekukholweni kufanele sitfwalisane nalababutsakatsaka ekwehlulekeni kwabo, singatijabulisi tsine. 2Ngako-ke akube ngulowo ajabulise makhelwane wakhe, khona atekwakheka. 3Ngobe naKhristu akatijabulisanga yena, njengobe kubhaliwe kutsi:
“Tinhlamba letatikhishwa ngulabo
lababekwetfuka tehlela etikwami.”
4Konkhe kwasendvulo lokusemBhalweni kwabhalelwa kufundzisa tsine, kuze sibe nelitsemba lelingumphumela wekubeketela newekucinisela lesikutfola kulowo mBhalo. 5Shangatsi Nkulunkulu, longumtfombo wekubeketela newekucinisela, anganinika kuphilelana ngekuthula lomunye kulomunye ngekwentsandvo yaKhristu Jesu, 6kuze kutsi nonkhe ngalivi linye nidvumise Nkulunkulu longuYise weNkhosi yetfu Jesu Khristu.
Tindzaba letimnandzi kubo bonkhe bantfu
7Ngako-ke yemukelanani, njengobe naKhristu anemukela, khona kutewudvunyiswa Nkulunkulu. 8Nginitjela kutsi Khristu waba sisebenti sebekusoka, khona atewubonakalisa buciniso baNkulunkulu ngekugcwalisa tetsembiso taNkulunkulu kubokhokho, 9kuze kutsi nebetive badvumise Nkulunkulu ngesihawu sakhe, njengobe kubhaliwe kutsi:
“Ngako-ke ngiyawukudvumisa
emkhatsini webetive,
ngiyawuhlabela ngidvumise libito lakho.”
10Kuphindze futsi kutsiwe:
“Tfokotani, nine betive,
kanye nesive sakhe.”
11Kuphindze futsi kutsiwe:
“Dvumisani iNkhosi,
nonkhe nine betive;
nebantfu bonkhe abadvumise yona.”
12Kantsi na-Isaya utsi:
“Kuyawufika umliba waJese,
lowo uyawuvukela kubusa tive,
tive tiyakwetsembela kuwo.”
13Shangatsi Nkulunkulu, longumtfombo welitsemba, anganigcwalisa ngako konkhe kujabula nekuthula ekukholweni, kuze niphuphume etsembeni ngemandla aMoya Longcwele.
Sizatfu sekubhala ngesibindzi kwaPawula
14Mine ngekwami ngenelisekile ngani, bazalwane bami, kutsi nine ngekwenu nigcwele kulunga, nagcwaliswa nangalo lonkhe lwati, niyakwati nekuyalana. 15Kepha nginibhalele ngesibindzi kulokunye ngentela kunikhumbuta ngenca yemusa lengiwuphiwe nguNkulunkulu 16wekutsi ngibe sikhonti saKhristu Jesu kubetive, ngikhonta njengemphristi ngekushumayela liVangeli leliphuma kuNkulunkulu, khona kutewutsi umnikelo longibo betive wemukeleke ungcwelisisiwe ngaMoya Longcwele. 17Njengobe ngikuKhristu Jesu ngineligugu ngaloko Nkulunkulu lakwenta ngami. 18Ngobe ngiyawubate sibindzi sekukhuluma lutfo lolunye ngaphandle kwaleto tintfo Khristu latente ngami. Khristu wasebenta ngemavi ami nangetento tami, kuze betive bamlalele; 19abesebenta ngemandla etibonakaliso netimangaliso, nangemandla aMoya Longcwele. Ngako-ke, ngacala eJerusalema ngahamba ngijikeleta ngaze ngefika nangase-Ilirikhu ngihamba ngishumayela liVangeli laKhristu kuto tonkhe tindzawo. 20Ngihlala nginenshisekelo lenkhulu yekushumayela liVangeli etindzaweni lapho Khristu angazange eviwe khona, khona ngingetukwakha esisekelweni lesibekwe ngulomunye umuntfu, 21njengobe kubhaliwe kutsi:
“Labangazange sebatjelwe ngaye,
bayawubona;
nalabo labangazange sebeve ngaye,
bayawuvisisa.”
Kutimisela kwaPawula kuvakashela eRoma
22Nguko nje sekungemahlandla lamanyenti ngivimbeleka kuta kini. 23Kodvwa njengobe nyalo sengiwucedzile umsebenti wami kulamave, nanjengobe sekungiminyaka leminyenti kangaka ngifisa kuta lapho ngitenibona, 24ngiyetsemba kutsi ngitakwendlula nginibone nase ngiya eSpaniya. Nase ngijabule nani sikhashane ngetsemba kutsi niyawungisita ngemalungiselelo nasengichubeka neluhambo lwami. 25Kodvwa kwanyalo ngisaya eJerusalema kuyawukhonta labangcwele. 26Ngobe kwaba kuhle kubaseMasedoniya nebase-Akhaya kutsi banikelele labangcwele labamphofu baseJerusalema. 27Kwaba kuhle kutsi batimisele bona kukwenta loko. Yebo, nanyalo kusadzingekile kutsi babasite labamphofu. Nangabe betive beta kutawuhlanganyela nabo etibusisweni tabo taMoya, nebetive bafanele-ke babasite ngetintfo labatidzingako kulemphilo yakulomhlaba. 28Nase ngikucedzile loko, sengibaniketile lokunikelwe, ngiyawuchubeka ngendlela yakini ngiye eSpaniya. 29Ngiyati kutsi nangifika kini, ngiyawuniphatsela inala yetibusiso taKhristu.
30Ngiyanincenga, bazalwane, ngeNkhosi yetfu Jesu Khristu nangelutsandvo lwaMoya kutsi nilwe kanye nami ekungikhulekeleni kwenu, kuNkulunkulu. 31Ngithandazeleni kutsi ngisindze engotini yalabangakholwa baseJudiya, nekutsi inkonzo yami eJerusalema yemukeleke kahle kulabangcwele, 32kuze kutsi ngite kini ngentsandvo yaNkulunkulu nangenjabulo ngitewuphumula kanye nani. 33Nkulunkulu wekuthula akabe nani nonkhe. Amen.
