Sihlabelelo 92

₁Kuhle kubonga wena, Simakadze,

nekuhlabelela egameni lakho,

wena Losetikwako Konkhe,

₂nekuvakalisa umusa wakho ekuseni,

nekwetsembeka kwakho ebusuku,

₃nakushaywa ihabhu

lenetintsambo letilishumi,

nelugitali, netintsambo telire.

₄Ngobe nguwe, Simakadze,

longente ngatfokota ngaloko lokwentile,

imisebenti yetandla takho

ingente ngahlabelela ngekujabula.

₅Maye, mikhulu imisebenti yakho, Simakadze!

Imicabango yakho ijule kakhulu.

₆Sihhundzahhundza

singeke sikwati loko,

umuntfu losilima angeke acondze

₇kutsi nome lababi bangahluma njengetjani,

nato tonkhe tigilamkhuba tichuma,

noko tiyawubhujiswa phakadze naphakadze.

₈Kodvwa wena, Simakadze,

uphakeme phakadze naphakadze.

₉Ngobe nato titsa takho, tiyawubhubha;

bonkhe lababi bayawusakatwa.

₁₀Kodvwa luphondvo lwami uluphakamisile

njengeluphondvo lwenkhabi lengumlalandle,

ungigcobe ngemafutsa lamasha.

₁₁Titsa tami ngitibuke emehlweni,

netindlebe tami titivile tinsongo

talabo lababi labemelene nami.

₁₂Lolungile uhluma njengelisundvu,

akhule njengemsedari waseLebanoni.

₁₃Labo-ke banjengetihlahla

letihlanyelwe endlini yaSimakadze,

bachuma etibuyeni taNkulunkulu wetfu.

₁₄Ebudzaleni babo

bayawuchubeka batsele titselo,

bafanane netihlahla letihlala tiluhlata,

ngobe tona tihlala ticinile,

₁₅kuze kubonakale kutsi Somandla ulungile,

yena ulidvwala lami,

yena unguSokulunga.