Sihlabelelo 9

₁Simakadze, ngiyawukubonga

ngenhlitiyo yami yonkhe,

ngilandze ngayo yonkhe

imisebenti yakho lemangalisako.

₂Ngiyawujabula ngitfokote kuwe

ngidvumise libito lakho,

wena Losetikwako Konkhe.

₃Nakuchamuka wena,

titsa tami tiyancandzeka;

nawutibuka, tiyawa, tiphele.

₄Ngobe wena ulimele

lilungelo lami nendzaba yami;

uhleti esihlalweni sakho sekwehlulela

wakhipha sigwebo lesilungile.

₅Emahedeni uwatsetsisile,

lababi wababhubhisa,

wesula libito labo phakadze naphakadze.

₆Sitsa sibhujiswe phakadze naphakadze,

emadolobha aso uwabhidlitile,

angeke asaphushwa nakuphushwa.

₇Kodvwa Simakadze uhleti

esihlalweni sakhe sebukhosi baphakadze;

lesihlalo sakhe sebukhosi

usimisele kwehlulela.

₈Yena uyawukwehlulela umhlaba ngekulunga,

nguye futsi loyakwehlulela tive,

yebo, uyawutehlulela ngebucotfo, angakhetsi.

₉Simakadze usiphephelo

sebantfu labacindzetelwe.

Uyinqaba ngetikhatsi tekweswela.

₁₀Labati libito lakho

bayawukwetsembela kuwe,

ngobe wena, Simakadze,

awubafulatseli labakufunako.

₁₁Dvumisani Simakadze lohlala eSiyoni!

Tjelani tive ngetento takhe!

₁₂Yena ungumenaneli kulabacitsa ingati,

uyabakhumbula labahluphekile,

akakukhohlwa kukhala

kwalabasenhluphekweni.

₁₃Ngihawukele, Simakadze!

Bona kuhlupheka kwami

lengikubangelwe titsa tami.

Nguwe longephula emasangweni ekufa,

₁₄kuze ngilandze ngalo lonkhe ludvumo lwakho

emasangweni elidolobha laseSiyoni

ngijabulele kungikhulula kwakho.

₁₅Emahedeni asahholokoshele

emgodzini labewumbile;

asabanjwe elugibeni lolwetsiywe ngawo.

₁₆Simakadze sewutibonakalisile,

wakhipha sigwebo sakhe,

lababi babanjwa

ngumsebenti wetandla tabo. Cabanga.

₁₇Lababi baya ekufeni,

yebo, bonkhe labafulatsela Nkulunkulu.

₁₈Kodvwa labandzindzako

bangeke bakhohlakale phakadze naphakadze;

litsemba lalabahluphekako

lingeke linyamalale siphelane.

₁₉Vuka, Simakadze!

Ungavumi kutsi umuntfu akwedzelele,

betive abehlulelwe embikwakho!

₂₀Bente bakwesabe, Simakadze,

kuze bati kutsi babantfu nje. Cabanga.