Sihlabelelo 8

₁Maye, Simakadze, Nkhosi yetfu!

Libito lakho liyababateka

emhlabeni wonkhe!

Wena ubeke ludvumo lwebukhosi bakho ngetulu kwemazulu.

₂Indvumiso yemandla akho uyibeke

emilonyeni yetinswane neyebantfwana.

Loko ukwentele kutibindzisa

titsa takho nalabamelene nawe.

₃Nangibuka etulu esibhakabhakeni sakho

ngibona umsebenti wetandla takho,

inyanga netinkhanyeti lotimisile, ngitsi:

₄“Pho, umuntfu abeyini-ke

kutsi ungadzimate umkhumbule;

nendvodzana yemuntfu beyiyini-ke

kutsi ungadzimate uyinakekele?”

₅Noko umente wacishe waba ngangawe,

Nkulunkulu,

wametfwesa umchele webukhosi neludvumo.

₆Umenta abuse etikwemisebenti yetandla takho,

konkhe wakubeka

ngaphansi kwetinyawo takhe:

₇tonkhe timvu, netinkhomo tonkhe,

yebo, netilwane tesiganga,

₈tinyoni letindizako,

netinhlanti telwandle,

nato tonkhe tidalwa taselwandle.

₉Maye, Simakadze, Nkhosi yetfu,

libito lakho liyababateka

emhlabeni wonkhe!