Sihlabelelo 79

₁Awu, Nkulunkulu!

Bahedeni sebangene efeni lakho,

bangcolisa lithempeli lakho lelingcwele,

bagucula iJerusalema bayenta tindzala.

₂Banikele tidvumbu tetinceku takho

kutsi tibe kudla kwemangce,

netidvumbu talabangcwele bakho

tibe kudla kwetilwane tesiganga.

₃Bacitse ingati yetinceku takho,

yageleta njengemanti,

eJerusalema lonkhe.

Kwabate nalongabangcwaba.

₄Sesijike saba yinhlekisa

kubomakhelwane betfu,

bayasihaya bahlekisa ngatsi

kulabakhelene natsi.

₅Kuyawuze kube ngunini, Simakadze,

lulaka lwakho luvutsa njengemlilo?

Lulaka lwakho luyawuvutsa

njengemlilo kuze kube ngunini?

₆Tfululela lulaka lwakho

etikwetive letingakwati wena,

nasetikwemibuso lengakhuleki kuwe.

₇Ngobe sebabashaye babacotfula bakaJakobe,

umuti wakhe bawenta sikhotsa.

₈Ungasibeki licala ngebubi babokhokho betfu,

sheshisa usihlangabete ngesihawu sakho,

ngobe sesidzangele kakhulu.

₉Sisite, Nkulunkulu wensindziso yetfu,

sisite ngenca yenkhatimulo yelibito lakho,

sihlenge usitsetselele tono tetfu,

ngenca yelibito lakho lelihloniphekile.

₁₀Betive basholani kutsi:

“Uphi-ke loNkulunkulu wabo?”

Shangatsi kuphindzisela kwakho

singakubona kwenteka kulabo

labacitse ingati yetinceku takho.

₁₁Shangatsi kububula kwetiboshwa

kungefika kuwe,

bese kutsi ngalamandla akho lamakhulu

ubephule labo lababange ekufeni.

₁₂Yebo, Simakadze,

buyisela esifubeni sabomakhelwane betfu

seyiphindvwe kasikhombisa

lenhlamba labakuhlambalate ngayo.

₁₃Tsine-ke lesisive sakho

netimvu telidlelo lakho,

siyawudvumisa wena ingunaphakadze,

silandzise ngeludvumo lwakho

etitukulwaneni nasetitukulwaneni.