Sihlabelelo 65

₁Yebo Nkulunkulu,

lukufanele ludvumo eSiyoni,

tetsembiso tetfu kufanele

tigcwaliseke kuwe.

₂Wena uva imithandazo uyiphendvule;

bonkhe bantfu bafanele kuta kuwe

₃ngenca yetono tabo.

Ngesikhatsi tiphambuko tetfu tisehlula

nguwe lositsetselelako.

₄Ubusisiwe umuntfu lokhetfwa nguwe

umsondzete kuwe,

uyawuhlala endzaweni yakho lengcwele.

Siyakwesutsiswa ngalokuhle

kwendlu yakho,

lithempeli lakho lelingcwele!

₅Usiphendvule ngemisebenti lemangalisako,

wena Sokulunga;

wena unguNkulunkulu wensindziso yetfu.

Bonkhe bantfu emhlabeni wonkhe,

nangesheya kwetilwandle,

betsembele kuwe.

₆Wena lowamisa tintsaba ngemandla akho,

watimisa uvunule emandla.

₇Ubindzisa kudvuma kwetilwandle,

uthulise kugubha nekuhlokoma kwemagagasi,

ubindzise siphitsiphitsi

lesicokotelisa tive.

₈Ngako bonkhe bantfu emhlabeni wonkhe

bayawutfutfumela

ngenca yetibonakaliso takho;

tento takho

tiletse kujabula lokukhulu,

emini nasebusuku,

emhlabeni wonkhe jikelele.

₉Unakekela umhlaba ngekuwupha inala,

uwuvundzise kakhulu.

Umfula waNkulunkulu ugcwele emanti.

Bantfu ubapha emabele.

Loku ukwenta kanje:

₁₀Unisa imvula leyenele emasimini,

udvubadvube emagadze awo;

utsambise umhlabatsi ngemvula,

ubusise nalokukhula kuwo.

₁₁Uhlobisa umnyaka ngetipho takho,

lapho uhambe khona kulandzele inala.

₁₂Emadlelo elihlane ahlume luhlata,

emagcuma avunule injabulo,

₁₃emadlelo embeswe yimihlambi,

tifundza tibe bovu tju emabele,

timemete kanyekanye

ngekuhlabelela ngenjabulo.