Sihlabelelo 6

₁Awu, Simakadze, ungangijezisi

ngentfukutselo yakho,

ungangishayi ngelulaka lwakho.

₂Ngihawukele, Simakadze,

ngobe sengidzangele, sengikhatsele,

ngiphilise, Simakadze,

ngobe ematsambo ami ayatfutfumela.

₃Umphefumulo wami utfutfumela kakhulu.

Pho, Simakadze, utawuze ungisite nini?

₄Buya, Simakadze, ungephule ekufeni,

khulula umphefumulo wami,

ngobe umusa wakho awupheli.

₅Kute lokukhumbulako ekufeni.

Ngubani lokudvumisako nje ethuneni?

₆Ngikhatsele kububula kwami,

ngimantisa umcamelo wami ebusuku,

ngimantise nembhedze wami ngetinyembeti.

₇Liso lami liyadzikita

ngenca yelusizi.

Liso lami liyaguga

ngenca yekukhaliswa titsa tami.

₈Khweshani kimi,

nonkhe nine benti balokubi,

ngobe Simakadze sewukuvile kukhala kwami.

₉Simakadze sewukuvile kuncusa kwami.

Simakadze sewukwemukele kukhuleka kwami.

₁₀Tonkhe titsa tami tiyawuhlazeka

titfutfumele kakhulu,

tidliwe ngemahloni,

tibaleke masinyane.