Sihlabelelo 59

₁Hhawu, Nkulunkulu wami!

Ngephule etitseni tami,

ungivikele kulabo labangivukele.

₂Ngephule kulabo labatigilamkhuba,

ungisindzise kubabulali.

₃Ase ubheke,

ngobe bangilalele endleleni

bafuna kungibulala,

tichwaga titimisele kungihlasela

ngaphandle kwesono sami, Simakadze.

₄Batilungiselela kungibulala

ngaphandle kwesono.

Vuka, ungihlangabete ngelusito,

ungelekelele.

₅Wena, Simakadze,

Nkulunkulu Somandla,

unguNkulunkulu waka-Israyeli;

vuka-ke utewujezisa tonkhe tive,

ungahawukeli ngisho namunye

kulaba labangemambuka. Cabanga.

₆Onkhe emalanga kusihlwa bayaye babuye

bashaya umkhulungwane njengetinja,

bahambe bazula nalo lonkhe lidolobha.

₇Nabo phela, babhonsa ngemilomo yabo,

emilonyeni yabo kunetinkemba

ngobe batsi: “Ngubani losinakile?”

₈Kodvwa wena, Simakadze, uyabahleka,

tonkhe tive utenta inhlekisa.

₉Yebo, Mandla ami,

ngiyawulindzela wena,

ngobe wena, Nkulunkulu,

uyinqaba yami.

₁₀Nkulunkulu wami,

uyawungihlangabeta ngemusa wakho.

Nkulunkulu wami,

uyawungenta ngibabukele phansi

labatitsa tami.

₁₁Ungababulali,

funa sive sami sikhohlwe;

basakate ngemandla akho,

ubalahle phansi,

Simakadze, sihlangu setfu.

₁₂Emavi abo asono semilomo yabo.

Ababhajwe ekutigcabheni kwabo,

ngobe bayacalekisa, bacale nemanga.

₁₃Bacedze ngekutfukutsela kwakho,

ubanyamalalise baphele batsi nya,

kuze bantfu bati kutsi:

Nkulunkulu ubusa kaJakobe

nasemikhawulweni yemhlaba. Cabanga.

₁₄Bayabuya njalo kusihlwa,

bahlabe umkhulungwane njengetinja,

bahambe bazula lonkhe lidolobha.

₁₅Behla benyuka bafunana nekudla,

bahhonge nabangakesutsi.

₁₆Kodvwa mine ngiyawuhlabela

ngibabate emandla akho,

ngetsabele umusa wakho ekuseni,

ngobe wena uyinqaba yami,

waba siphephelo sami

ngesikhatsi sekuhlupheka kwami.

₁₇Yebo, Mandla ami,

ngiyawuhlabela ngikudvumise,

ngobe wena, Nkulunkulu,

uyinqaba yami.

Nguwe, Nkulunkulu,

longiphatsa ngemusa.