Sihlabelelo 55

₁Hhawu, Nkulunkulu,

beka indlebe,

ulalele umthandazo wami,

ungakufulatseli kuncusa kwami.

₂Nginake, ungiphendvule.

Imicabango yami iyangihlupha,

sengidzimate ngakhatsateka,

₃ngenca yekuva tinsongo tetitsa

nencindzetelo yalababi,

ngobe bangiletsele kukhatsateka.

Tingiletsele kuhlupheka lokunyenti,

tiyangitfukutselela

tingibambele emagcubu.

₄Inhlitiyo yami iyatfutfumela

ngekhatsi kwami,

sengiseluvalweni lwekufa.

₅Ngiphetfwe kwesaba nekutfutfumela,

neluvalo selungicedze emandla.

₆Ngase ngitsi:

“Kube mane nginetimphiko njengelituba!

Ngabe ngindizela le khashane

ngiyewuhlala ekuphumuleni.

₇Yebo, bengitawubaleka

ngiye khashane,

ngiyewuhlala ehlane. Cabanga.

₈“Ngabe ngiphutfuma

endzawemi yami yekuphepha,

ngibe khashane nemoya nesivunguvungu.”

₉Hhawu, Simakadze,

citsa lusongo lwabo,

uphambanise inkhulumo yabo,

ngobe ngibona umbango

nekuphikisana kulelidolobha.

₁₀Lelidolobha kulitungeleta imini nebusuku,

kuhambahambe etikwetindvonga talo;

bubi nelusizi kubusa ekhatsi kwalo.

₁₁Umonakalo ungekhatsi kwalo

incindzetelo nebucili

akusuki enkhundleni yalo.

₁₂Akusiso sitsa sami lesingigalajelako,

ngobe kube bekungiso, bengingasibeketelela;

akusiye longitondzako longibangisako,

ngobe kube bekunguye, bengitambhacela.

₁₃Kodvwa nguwe, ntsanga yetfu,

lesishuca nawe, nalongumngani wami.

₁₄Sasihlalisana kamnandzi nawe

sasihamba nawe, nesicumbi,

nasiya endlini yaNkulunkulu.

₁₅Titsa tami atitunywe kufa,

tiye endzaweni yalabafile tisaphila,

ngobe bubi busemakhaya

nasetinhlitiyweni tabo.

₁₆Kodvwa mine ngikhala kuNkulunkulu,

Simakadze uyawungisindzisa.

₁₇Kusihlwa, nasekuseni, nasemini

ngiyatikhalela ngibubule kuye,

bese uyaliva livi lami.

₁₈Uyawungihlenga, anginike kuthula,

angivikele kulemphi lengibhekene nayo,

nome babanyenti labalwa nami.

₁₉Nkulunkulu utangiva,

angiphindzisele kubo,

yena lokhona phakadze. Cabanga.

Labantfu abaphendvuki,

abamesabi ngisho naNkulunkulu.

₂₀Lowo mngani-ndzini

sewucabana nebangani bakhe,

wephula sivumelwane sakhe.

₂₁Inkhulumo yakhe ishelelisa kwelibhotela,

noko inhlitiyo yakhe ifukamele imphi,

emavi akhe atsambe kwengca emafutsa,

noko atinkemba letilindzele kugwaza.

₂₂Lahlela imitfwalo yakho kuSimakadze,

yena uyawukusimisa;

angeke avume phakadze naphakadze

kutsi lolungile wakhe atanyatanyiswe.

₂₃Wena Simakadze nguwe

loyawubajikijela phansi,

emgodzini wekufa.

Bantfu bengati nenkhohliso

bangeke baphile,

ngisho nencenye yemphilo yabo.

Kodvwa mine ngiyakwetsembela kuwe.