Sihlabelelo 51

₁Ngihawukele, Nkulunkulu,

ngekwemusa wakho;

yesula tiphambuko tami

ngekwesihawu sakho lesikhulu.

₂Ngigezisise ebubini bami,

ngihlambulule esonweni sami.

₃Ngobe ngiyatati tiphambuko tami,

sono sami sisembikwami njalo.

₄Ngonile kuwe, wena wedvwa,

ngente lokunengekako emehlweni akho;

ngako kwehlulela kwakho kumsulwa,

nekungilahla kwakho ngelicala kulungile.

₅Empeleni ngatalwa vele ngisesonweni,

ngaba soni kusukela make atsatsa sisu.

₆Ngempela, wena utsandza liciniso

lelingekhatsi enhlitiyweni;

ngako-ke uyawungifundzisa

timfihlakalo tekuhlakanipha kwakho.

₇Ngihlambulule ngehisophu,

ngitewuhlambuluka.

Ngigeze ngibe mhlophe kunangcocwane.

₈Ngigcwalise ngekujabula lokujulile,

kuze kutsi ematsambo ami lephukile atfokote.

₉Fihla buso bakho etonweni tami,

wesule bonkhe bubi bami.

₁₀Hhawu, Nkulunkulu,

dala kimi inhlitiyo lehlantekile,

uvuselele kimi umoya wekulunga.

₁₁Ungangicoshi ebusweni bakho,

ungangemuki

Moya wakho Longcwele.

₁₂Buyisela kimi kutfokota kwensindziso yakho,

ungisimise ngekungipha umoya lovumako,

₁₃ngiyawube sengifundzisa lababi

tindlela takho,

netoni tiyawuphendvuka tibuyele kuwe.

₁₄Hhawu, Nkulunkulu,

ngikhulule ecaleni lengati,

Nkulunkulu wensindziso yami,

khona lulwimi lwami luyawuhlabela

kulunga kwakho.

₁₅Hhawu, Nkhosi,

vula tindzebe temlomo wami,

kuze ngivakalise ludvumo lwakho.

₁₆Ngobe futsi ungeke weneliswe yimihlatjelo,

nome bengingakunika yona,

ngisho nemhlatjelo wekushiswa wonkhe

ungeke ukhone kukujabulisa.

₁₇Umhlatjelo lowemukeleka kuNkulunkulu

ngumoya lowephukile nenhlitiyo ledzabukile.

Nkulunkulu ngeke awubukele phansi.

₁₈Yentela iSiyoni lokuhle ngekwemusa wakho,

utakhe kabusha tindvonga taseJerusalema.

₁₉Khona-ke uyawujabula ngemihlatjelo lengiyo,

ngeminikelo leshiswa yonkhe,

khona-ke bayawunikela ngetinkunzi

elatini lakho.