Sihlabelelo 33

₁Yetsabani kuSimakadze,

nine lenilungile;

ingoma yekudvumisa

ibafanele labacotfo.

₂Simakadze mdvumiseni ngetingubhu,

nihlabele kuye ngehabhu

lenetintsambo letilishumi.

₃Mhlabeleleni ingoma lensha,

niyidlale ngebuciko,

nimemete ngekujabula.

₄Ngobe livi laSimakadze licondzile,

konkhe lakwentako kwetsembekile.

₅Simakadze utsandza kulunga nebumsulwa.

Umhlaba ugcwele umusa waSimakadze.

₆Emazulu entiwa ngelivi laSimakadze,

nako konkhe lokukuwo

kwentiwa ngemoya wemlomo wakhe.

₇Emanti elwandle wawabutsela ndzawonye,

kwaba shangatsi uwagcwalisa embiteni;

wenta titiba netitibakati tetilwandle.

₈Umhlaba wonkhe awumesabe Simakadze,

bonkhe labasemhlabeni

abatfutfumele embikwakhe.

₉Ngobe wakhuluma, kwenteka;

wakhalima, kwaba khona lutfo.

₁₀Simakadze ucitsa emacebo etive;

ushabalalisa imicabango yebantfu.

₁₁Emasu aSimakadze ayawuhlala emile

kuze kube phakadze;

nemicabango yakhe iyawuhlala imile

kuto tonkhe titukulwane.

₁₂Sibusisiwe leso sive

lesiNkulunkulu waso kunguSimakadze,

sive latikhetsele sona

kutsi sibe lifa lakhe.

₁₃Simakadze, asezulwini,

uyabuka emhlabeni

abone bonkhe bantfu.

₁₄Asesesihlalweni sakhe sebukhosi

ubukisisa bonkhe labahleti emhlabeni;

₁₅nguye lobumba tonkhe tinhlitiyo tabo,

abukisise tonkhe tento tabo.

₁₆Kute inkhosi lencoba sitsa

ngobe inemabutfo lamanyenti,

nesichwaga asincobi

ngebunyenti bemandla aso.

₁₇Lihhashi lemphi lingeke likukhulule;

nome lingaba nemandla lamakhulu,

lingeke likusindzise.

₁₈Empeleni liso laSimakadze

likulabo labamesabako,

yebo labo labetsemba umusa wakhe,

₁₉kutsi atewukhulula umphefumulo wabo ekufeni

abaphilise endlaleni.

₂₀Umphefumulo wetfu

wetsembele kuSimakadze,

yena ungumsiti wetfu nelihawu letfu.

₂₁Inhlitiyo yetfu ijabula kuye,

ngobe setsembele

egameni lakhe lelingcwele.

₂₂Yebo, Simakadze!

Umusa wakho awusembese

njengobe setsembele kuwe.