Sihlabelelo 32

₁Ubusisiwe umuntfu

lotsetselelwe tiphambuko takhe,

nalotono takhe tisitjekelwe.

₂Ubusisiwe umuntfu

Nkulunkulu langambaleli tiphambuko takhe,

lonenhlitiyo lete inkhohliso.

₃Nangingasivumi sono sami,

ngidzangaliswa kutikhalela

lilanga lonkhe,

kuze kushaye ekhatsi emnkantjeni.

₄Imini nebusuku sandla sakho

sasimatima etikwami,

emandla ami oma

njengekomisa kwasehlobo. Cabanga.

₅Ngasivuma kuwe

sono sami,

angizange ngisifihle

siphambuko sami.

Ngatsi: “Ngiyawutivuma

kuSimakadze tono tami.”

Wena walitsetselela

licala lesono sami. Cabanga.

₆Ngako-ke wonkhe longcwele

uyawuthandaza kuwe

ngesikhatsi usenekutfolakala.

Ngempela ngesikhatsi

emagagasi etinhlupheko adlondlobala,

angeke amkhukhule.

₇Wena uyindzawo yami yekubhaca,

uyangiphephisa ekuhluphekeni

ungisingatse ngetingoma tenkhululeko. Cabanga.

₈Simakadze utsi:

“Mine ngiyawukufundzisa

ngikukhombise indlela

lofanele kuhamba ngayo, ngikweluleke,

liso lami lingesuki kuwe.

₉Ningabi njengelihhashi nome umnyuzi

kona lokungenakucondza

kudzimate kucondziswe ngematomu.”

₁₀Lomubi unekuhlupheka lokunyenti,

kodvwa lowo lowetsembele kuSimakadze

uhlala alondvolotwe ngumusa wakhe.

₁₁Jabulani kuSimakadze, netsabe,

nine lenilungile.

Nijabule nonkhe

nine lenicotfo ngenhlitiyo.