Sihlabelelo 29

₁Dvumisani Simakadze

nine tingilosi telizulu!

Simakadze mnikeni

bukhosi nemandla!

₂Libito laSimakadze

linikeni bukhosi lobulifanele.

Khontani Simakadze

ngetembatfo tebungcwele.

₃Liphimbo laSimakadze lisetikwemanti,

Nkulunkulu weludvumo uyadvuma,

Simakadze usetikwemanti lamanyenti.

₄Liphimbo laSimakadze linemandla.

Liphimbo laSimakadze linebukhosi.

₅Liphimbo laSimakadze lifohlota

tihlahla temisedari,

Simakadze ufohlota imisedari yaseLebanoni.

₆Wenta lemisedari yaseLebanoni

itjakadvule njengelinkhonyane;

ente iLebanoni neSiriyoni

itjakadvule njengenkhabi lencane yesiganga.

₇Liphimbo laSimakadze

libaneka emalangabi emlilo.

₈Liphimbo laSimakadze linyakatisa lihlane.

Simakadze utfutfumelisa

lihlane laseKhadeshi.

₉Liphimbo laSimakadze

litalisa tinyamatane

liphundle emahlatsi asale akhanya,

nelithempeli lonkhe lidvumisa

ngekumemeta ngavi linye,

litsi: “Ludvumo!”

₁₀Simakadze usesihlalweni sebukhosi,

ubusa zamcolo.

Simakadze usesihlalweni sebukhosi,

kuze kube phakadze naphakadze.

₁₁Simakadze bantfu bakhe

uyawubanika emandla!

Simakadze, bantfu bakhe

uyawubabusisa ngekuthula!