Sihlabelelo 25

₁Ngiwuphakamisela kuwe, Simakadze,

umphefumulo wami.

₂Nkulunkulu wami, ngetsembele kuwe,

ngisindzise ehlazweni lekwehlulwa.

Titsa tami tingatijabulisi ngami.

₃Yebo, labo labetsembele kuwe

kute namunye loyawuhlazeka;

kepha bayawuhlazeka labo

labakuhlubuka ngelite.

₄Ngikhombise tindlela takho, Simakadze,

ungifundzise imikhondvo yakho.

₅Ngihambise ecinisweni lakho, ungifundzise,

ngobe wena

unguNkulunkulu wensindziso yami.

Litsemba lami likuwe lonkhe lilanga.

₆Simakadze,

khumbula umusa wakho nelutsandvo lwakho,

ngobe kwakuvele kukhona phakadze.

₇Ungatikhumbuli tono tami,

netiphambuko tebusha bami,

kodvwa ngikhumbule ngekwemusa wakho,

Simakadze, ngikhumbule ngekulunga kwakho.

₈Simakadze muhle ulungile,

ngako-ke ufundzisa toni

indlela lekungiyo sibili.

₉Labatfobekile ubaholela kulokulungile;

labatfobekile ubafundzisa indlela yakhe.

₁₀Tonkhe tindlela taSimakadze

tibubele neliciniso

kulabo labagcina sivumelwane sakhe

kanye nemiyalo yakhe.

₁₁Simakadze, ngenca yelibito lakho

ngitsetselele kona kwami,

ngobe kukhulu.

₁₂Ngubani lowesaba Simakadze?

Lowo uyawumfundzisa leyo ndlela,

lekhetselwe yena.

₁₃Yena lucobo uyawuhlala achume,

intalo yakhe iyawudla lifa lemhlaba.

₁₄Timfihlakalo takhe, Simakadze,

utinika labamesabako,

abafundzise kwati sivumelwane sakhe.

₁₅Emehlo ami ahlala abheke kuSimakadze,

ngobe nguye lokhipha tinyawo tami elugibeni.

₁₆Gucukela kimi, Simakadze,

ube nemusa kimi,

ngobe nginesitunge, ngihluphekile.

₁₇Ngiphumute kuletinhlupheko tenhlitiyo yami,

ungikhokhe etinhluphekweni tami.

₁₈Buka kuhlupheka kwami

nekukhandleka kwami,

ungitsetselele tonkhe tono tami.

₁₉Buka titsa tami,

kutsi setinyenti kanganani,

tingitondza ngelunya.

₂₀Londvolota imphilo yami,

ungephule ngingahlazeki,

ngobe naku ngikhosele kuwe.

₂₁Shangatsi bumsulwa nebucotfo bungangigcina,

ngobe litsemba lami likuwe.

₂₂Awu, Nkulunkulu! Khulula Israyeli

etinhluphekweni takhe tonkhe.