Sihlabelelo 24

₁Umhlaba nako konkhe

lokukuwo kwaSimakadze,

emave kanye nabo bonkhe

labahlala kuwo kwakhe,

₂ngobe wakusimisa etikwetilwandle,

wakusekela ekujuleni kwemanti.

₃Ngubani loyakwenyuka

intsaba yaSimakadze?

Ngubani loyakuma

endzaweni yakhe lengcwele?

₄Ngulowo lonetandla letihlantekile

nalonenhlitiyo lengenacala

longawulibatisi ngelite

umphefumulo wakhe,

nalongawafungeli emanga.

₅Simakadze uyawumbusisa,

yebo, Nkulunkulu wensindziso

uyawumenta abe msulwa.

₆Ngulesi-ke situkulwane

salabo labamfunako,

labafuna buso bakho,

Nkulunkulu waJakobe. Cabanga.

₇Nine masango, vulekani!

Nani minyango yasemandvulo

vulekani nitsi nge,

kuze iNkhosi yeludvumo itewungena.

₈Ngubani leNkhosi yeludvumo?

NguSimakadze, lichawe lelinemandla,

Simakadze lolichawe lekulwa.

₉Nine masango, vulekani!

Nani minyango yasemandvulo

vulekani nitsi nge,

kuze iNkhosi yeludvumo itewungena.

₁₀Ngubani yona leNkhosi yeludvumo?

Nguye Nkulunkulu longuSomandla,

nguye loyiNkhosi yeludvumo. Cabanga.