Sihlabelelo 22

₁Nkulunkulu wami!

Nkulunkulu wami!

Ungishiyeleni?

Ukhashane leni nekungisita?

Ukhwesheleni emavini ekukhala kwami?

₂Awu, Nkulunkulu wami!

Emini ngiyakhala,

kodvwa awungiphendvuli;

nasebusuku ngikhale, ngingaphumuli.

₃Wena ungcwele,

indvumiso yema-Israyeli

sihlalo sakho sebukhosi.

₄Bokhokho betsembela kuwe;

bakwetsemba, wabakhulula.

₅Bakhala kuwe, wabasindzisa;

bakwetsemba,

abazange bajabhiswe.

₆Kepha mine angisesiye muntfu walutfo,

sengaba ngumbungu nje,

ngisetfuko sebantfu,

nenhlekisa esiveni.

₇Bonkhe labangibonako bayangiphukuta,

badvubula imilomo bancife,

banikine netinhloko, batsi:

₈“Phela lowo wetsembele kuSimakadze,

akamkhulule yena-ke,

loSimakadze wakhe;

amphephise,

ngobe phela usime ngaye.”

₉Empeleni nguwe lowangikhipha

esiswini samake;

wangenta ngetsembela kuwe,

kusukela ngisamunya.

₁₀Ngetfulwa kuwe kwasekutalweni kwami,

waba nguNkulunkulu wami

kusukela esiswini samake.

₁₁Ungakhweshi kimi,

ngobe inhlupheko isedvute nami,

kute nalongangisita.

₁₂Titsa letinyenti tingitungeletile,

tinkunzi letinemandla taseBhashani

tingivimbetele.

₁₃Tingikhamisele imilomo yato

njengemabhubesi labhodla adladlabule.

₁₄Ngicitseke njengemanti,

emalunga ami onkhe ahhehlulukile,

inhlitiyo yami igucuke

yaba ngumtfwebeba,

yancibilika ngekhatsi kwami.

₁₅Emandla ami ome njengeludzengelo,

lulwimi lwami lunamatsele elwangeni;

wena ungilalisa phansi

elutfulini lwekufa.

₁₆Yebo-ke,

tinja tingihace ndzawo tonkhe,

nesicumbi salababi singitungeletile,

singibhobose tandla netinyawo.

₁₇Sengondze ngingumbambotiyabalwa,

bayangigolotela bangihheletele.

₁₈Behlukaniselana ngetimphahla tami,

bentelane inkatho ngengubo yami.

₁₉Kodvwa wena, Simakadze,

ungabi khashane nami!

Awu, mandla ami,

ngiphutfume ungisite.

₂₀Sindzisa umphefumulo wami enkembeni,

nekuphila kwami lokuligugu

ukwephule emlonyeni wetinja.

₂₁Ngephule emlonyeni welibhubesi,

ungisindzise etimphondvweni tetinyatsi.

₂₂Ngiyawulimemetela kubomnaketfu

libito lakho

ngikudvumise emkhatsini welibandla, ngitsi:

₂₃“Nine lenesaba Simakadze, mdvumiseni!

Nani nonkhe madvodzana aJakobe, mtuseni!

Nonkhe nine ntalo ya-Israyeli, mhlonipheni!

₂₄Ngobe akedzelelanga akanengwanga

yinhlupheko yalohluphekako.

Akabufihlanga buso bakhe kuye,

wamuva nakakhala,

acela lusito kuye.”

₂₅Ungivusela lusinga lwekudvumisa

emkhatsini welibandla lelikhulu.

Tifungo tami ngiyawutifeza tigcwaliseke

embikwabo bonkhe labakwesabako.

₂₆Labatitfobako bayawudla besutse,

labafuna Simakadze bayawumdvumisa,

bahalaliselwe kutsiwe:

“Shangatsi ningaphila

phakadze naphakadze!”

₂₇Umhlaba wonkhe uyakukhumbula

ugucukele kuSimakadze,

yonkhe imindeni netive temhlaba

tiyawukhotsama embikwakhe,

₂₈ngobe bukhosi baSimakadze,

nguye lobusa etikwetive.

₂₉Yebo, bonkhe labacebile emhlabeni,

bayawudla bakhotsame embikwakhe;

bonkhe labayakuya phansi elutfulini,

bayawuguca embikwakhe bakhonte,

yebo, nabo bonkhe

labangeke batibambe kutsi bafe.

₃₀Titukulwane takusasa titawumkhonta,

bantfu bayawusala

balandzise ngaSimakadze

etitukulwaneni nasetitukulwaneni.

₃₁Sive lesiyawutalwa siyawutjelwa kutsi:

“Simakadze wasisindzisa sive sakhe.”